Yehezkiel 35
35
O Seir takpo wene
1 #
Yes. 34:5-17; 63:1-6; Yer. 49:7-22; Yeh. 25:12-14; Amo. 1:11,12; Oba. 1:1-14; Mal. 1:2-5 At Allah en an mo’gulneselat,
2“Aphwami en dogo a’ge yu o. Hat hil dom Seir akhit eba yethasu loroguntik, hat disogo takhobouwa o, oluk, mo’gulemin o. 3Mo’guleselat, at otok modok welago a’ge Allah en egei ano re yuat o. At dom Seir en tiso ai, an en nebit epasumu re, ne’gik anni pam en wiagap pasulat, dom eba di iak erlagap pasulat, yu iak erlagap pasulat, tagalat, 4O kota-kota at ebam oruak a’ge ebano moluk-melaktak pasulat, tagoam e, dom Seir ano aphwami welagai erlakma o leimuat ema o. Asogo tisoam, An Allah at haluk ema o. 5O naduk en ’bekhit, yogodak hwerli at en is Israel olot het enebam pil wagalat, is Israel a’ge en togu legesa o’go tagonobo a’ge arat horok lau wagoam, e’gin enebam aga ai erlige wa’gun pam waronobuagoluk eneselei a’ge ene’gikmu enebesimu re, 6Is Seir a’ge ai, eneselei a’ge en waronobuagoluk, ene’gikmu enebasuam mugonoboluk-magonoboluk waronobogu lema o, oluk, nelaluk notok modok welago a’ge an Allah enat egi o. Is eneselei a’ge en waronobuagoluk, ene’gikmu enebesimu warenebil legesema re, werak ebano o’go waronobuogoluk mugonoboluk laga lema o. 7An en dom Seir ai, di iak-yu iak erlagap poluk o wogo pasulat, aphwami ebela ’gwe ai lak-wak ogwi a’ge ebano an en ena’guluak erlagap pasulat, tik o. 8O Seir dom pam eba aphwami wusogo werak nak ’bete ua o. O Seir dom-dom petne, at o’gwiang do’go ’balogo pil-pil laga a’ge, dom pam ik lasu ’gwe emin, wa’gun pam aphwami werak nak ’beterak welema ani o. 9O Seir eba di iak-yu iak erlagap pasuam modok-modogat welemagoluk, takpasuam, at welagoma kota-kota eba aphwami welema modok erlak o. Asogo tisoam, henaik Allah anat henaluk ema o.
10An Allah o eba oruakhweat de, at Seir en eselat, is aphwami ena’gul onuk ’biren eria emin, is ono’gwiang emin, nis eiyetak pagathorloluk welat, nis en a’geat emak o, egeimu re, 11At Seir ano en, is ’gela’ge an egi ho a’ge logwe, eige, oluk, ebit modok tagenebasulat, olot het is enebam pasulat, tegei ano ’gela’ge, at asogoat takpasulat, ye, at owene a’bosu ’balogo poluk, o’go takpasu erlige ano, At Allah enat taknebesimu hegi, oluk, aluk emagoluk takpasulat, tik o, oluk, nelaluk notok modok welago a’ge an Allah en demat egi o. 12Asogo tisoam, at Seir en, Israel a’ge enebabut ai pam di iak-yu iak erlagap poluk o wogo pesimu, Anat eiyetak pagathorlouwagoluk ne’gikmu pesimu hegi, oluk, Israel enebabut ai, mia modogat epasulat, obok ’balil laga a’ge ano ’berlegat, at Allah enat hwalegeimu hegi, oluk, enaluk ema o. 13His en an mi-miarak noboluk logo pogulat, At Allah en tiso ai nenebit o, oluk, eniak mo u erlakma en yogunat ’gwerlilogo il no’gulat, togwi ano, an nesa’go hwelegis o.
14-15Nesa’go hwelegismu en e, at ebam en di iak-yu iak erlagap poluk o wogo pil lasukhwe, aphwami o’gwiang pam welagai a’ge ’berlegat enagai houwa o. Is Israel a’ge welagaimu enemening a’ge ’gela’ge enede hwedik ano re, di iak-yu iak erlagap poluk o wogo pasuam, at agai hesimu re, at Seir asogoat tak paik o. Dom Seir ai emin, o Edom ’berlegat emin, di yu iak erlagap poluk o wogo pasuam, an Allah nemategat enaluk ema o,” oluk, At otok modok welago a’ge Allah enat egeimu re, hat dom Seir at mo’gulhegis o, oluk mo’gulesi.
Currently Selected:
Yehezkiel 35: Wul
Highlight
Copy
Compare
Share
Want to have your highlights saved across all your devices? Sign up or sign in
