Yehezkiel 36
36
Israel obapsogo onobo a’ge paget mo’gulonto wene
1Aphwami en dogo a’ge yu o. “Disogo takhonobouwa o, oluk, is Israel a’ge welagai o’gwe dom-dom petne ebano mo’gulentasu lomup o. Asogo mo’gulentasulat e, Israel welagai o’gwe dom-dom yema logwe! Allah en egei a’ge yu henesa’go hologu lemis o. 2At otok modok welago a’ge Allah en egei ano re, yuat o. Is enemin il ’belak a’ge en dom-dom petne en togwi a’ge ano obok ’balogulat, dom-dom modok otok logo welago a’ge ano nis arat eiyetak pagathwerlegema re, hweinat o! Oluk, ogumu re, 3Is dom-dom eba, tagonobo a’ge mo’gulentasulat, At otok modok welago a’ge Allah en egei ano re, yuat o. Is Israel a’ge enemin il ’belak a’ge o’borl-o’borl oruak a’ge ebano en is Israel a’ge welagaimu dom-dom eba di iak yu iak erlagap poluk o wogogwi ’gela’ge takpogulat, di aphwami yu aphwami eiyerak pagathorlouwogoluk, sebelenebil ’gogulat togwi holuk e, aphwami ’berlegat en onobok ’balogulat, mi-miarak onobogulat, togu legesema re, 4Is Israel a’ge welagaimu dom-dom eba An Notok modok welegi a’ge Allah en mo’gulentasu a’ge yu, enesa’go hologu lemak o. Dom-dom yat a’ge emin, dom-dom sebelak a’ge emin, o dom ho’gorlak ik lasumu emin, o dogo ’berlegat emin, o moluk-moluk legenakma en di yu iak erlak a’ge emin, o hogul poluk ’bogologulat, di aphwami yu aphwami pema ono’borlma welagai a’ge ebano en mi-miarak onobogulat, tugumu, o kota-kota emin, at Allah otok modok welago a’ge en wene mo’gulonto egei ano re yuat o. 5At otok modok welago a’ge Allah en eselat, is an no’gwiang ano delhwerlegesarik, eiyerak pagathorloluk, onogola enagai hogulat, onolot het hogulat, mi-miarak pogulat, asogo tugulat di a’ge yu a’ge dengtak pegesama re, nolot het odouk ’gela’ge tagalat, disogo takhenebaik o, oluk, is Edom a’ge emin, di aphwami yu aphwami pema ’berlegat emin, mo’gulentegis o. 6Asogoatma re, Israel a’ge ono’gwiang ukpogu legesa ano, hat en dom-dom yat a’ge emin, dom-dom sebelak a’ge emin, o dom petne ik lasu ’gwe eba emin, o dogo ’berlegat emin, mo’gulentasulat, At otok modok welago a’ge Allah en egei ano re, yuat o, is di aphwami yu aphwami en Israel wiagapsogo onobogulat, mi-miarak onobogulat togu legesema re, an nolot het odouk ’gela’ge tagalat wene mesik mo’gulentaik,” egei o. 7At otok modok welago a’ge en egei ano re, yuat o. Is di aphwami yu aphwami Israel o’borl-o’borl wale’gik welagai a’ge ebano is ogo re, wiagap enebasuam e, aphwami en, yu takpasu yuat de hwein niat a! Oluk, demat ua o, oluk, ho’buk ’balegis o, oluk, egeimu re, mo’gulhentegis o. 8Is Asogoat tagenebaik a’geat de, Is Israel a’ge welagaimu dom-dom eba nak e, an neiyagai Israel ai nak e, wolom erlakma enat togolik onowi pam louwama re, Is enebaget di agan yu agan aganuk porluk til lasulat, e’gen ikhasulat, tuagoluk, dom-dom eba en a’bosuap pil lasu lema o. 9Israel a’ge welagaimu dom-dom eba pam en nede atiarak nebasuam e, nede aganhan ebam pasuam e, eniabuk ai pam tak pagathorlogulat, di owi yu owi yetil lagalat, tua ani o. 10Dom dom eba pam aphwami a’bik yarluk takpouwa ano re, Israel a’ge ’berlegat wigalogo enebasuam, o kota-kota aphwami erlak agalat o mong aga a’ge ano ebalema aphwami a’bigat la’gogulat, o moluk-moluk lasegei a’ge ebano ebalema worogulat tua o. 11Dom dom eba pam, aphwami emin, onuam emin, a’bigat weiyelak enebasuam, dagenebil lagalat, enebe a’bigat weigal ema o. O naduk dom-dom eba petne aphwami enebe a’bigat eiyetak pagathwerlegesarik welegesa ’gela’ge, takpaikmu re, naduk di a’ge yu a’ge yogo a’ge e’gen a’bigat ikhasu laga ’gela’ge erlak, yogodak e ebenagaik, modok miasogo ikhasu lemagoluktak paik o. Asogo tagoam e, is en An Nonuk logo a’ge Allah at enaluk ema o. 12Is aphwami an neiyagai Israel ai dom-dom eba petne no’gwi wogwi welat at ebe eiyerak pagathorloluk welat, is enemining a’ge ’gela’geat agalat, tuagoluk, takpaikmu re, at emin welat, dagagai a’ge ebano at dom-dom en mesik emin erlagapsogo pasu lema erlagat o, oluk, egeimu re, mo’gulhentegis o.
13At otok modok welago a’ge Allah en egei ano re yuat o. Aphwami en dom-dom mo’gulogulat e, aphwami enebe hemedema yagat enebiselat, aphwami ena’gul onuk hat pam en dogo a’ge enemalik a’ge ebano erlagapsogo pasulat, taga legen o, oluk, mo’gulogumu re, 14Dom dom eba, aphwami logon emin emdema yagat enebiselat, aphwami ena’gul onuk dom-dom petne en dogo a’ge ebano mesik eminsogoat erlagapsogo pasulat, taga leik erlak o, oluk, An notok modok welago a’ge Allah enat egi o. 15Di aphwami yu aphwami en, hweinat o! Oluk, ogwi ano, dom-dom mesik eminat esa’go holuagoluk, an en tak paik erlak o. Aphwami ena’gul onuk lo’bok en dom-dom eba mi-miarak pogwi a’ge ano, mesik emin mi-miarak pogulat, ye, dom-dom eba en, at pam en dogo a’ge ena’gul onuk ano a’ge mesik emin erlagapsogo pasulat, tik erlak o, oluk, An Notok modok welago a’ge Allah enat egi o, oluk, egeimu re, mo’gulhentegis o, oluk, mo’gulentegis.
16At Allah en wene mesik an mo’gulneselat e,
17“Aphwami en dogo a’ge yu o. Is Israel a’ge en is onu ’gwarek ono’gwiang pamat welarat de, eniak wiak ano pam, wiak til lagaiam, ono’gwiang ai re, orogole wiagapsogo pegesa o. Hwami en dogwi hogulat enemep sum pam egelik a’ge enil holuk e, yethagup o, oluk, ogwi ai ’gela’ge, An nil pam is eniak wiak welat til lagai a’ge ai, modok wiak at welaga o. 18Asogo welat, ’gwiang ai pam aphwami enemep enemak pil lagalat, enasua ogut erliktil lagai ano pam ono’gwiang wiak enemelmel a’ge modok takpil lagalat, tugu legesema re, an nolot het is enebam pasulat, 19Is eniak wiak pam, til lagai ano pam, mugonoboluk onoboluk uak lol enebegistik, di aphwami, yu aphwami, ene’gerlakma perakpasulat, di owi yu owi yarluk tagenebasulat, tegis o. 20Di aphwami yu aphwami ene’gerlakma eba legesarik, welat, is legesema ebano en ogulat e, At Allah eiyagai yuat a’ge at de ono’gwiang wogentegismu ebano en lebik enebesi yu, yerentemit o, oluk, ogu legesa ano pam e, nonuk modok omu degelak oruak a’ge ano, wiagapsogo pogu legesa o. 21Is Israel a’ge en di aphwami yu aphwami ene’gerlakma legesa ma ene’gerlak o’gwe ’berlegat ebano welat, nonuk modok omu degelak op a’ge ano wiagap pegesema re, an nede wathwerlasu legi ani o.”
“An en his Israel a’ge henebe pobuk ’gerap henebaik o,” oluk mo’gulentesi wene
22Allah en mo’gulneselat e,
“Is aphwami ena’gul onuk Israel a’ge en nonuk wiagarogwi ai en, an henaik ’gain Nonuk Logo a’ge en is enebaget ik a’ge ai mo’gulontomup o,
His aphwami Israel a’ge yu. An en pobuk tik a’ge ai re, his henebaget puk. We, his henebe di owi yu owi ’bogologulat, nu’gwarek nonuk wiagarigep ai en, nu’gwarek nonuk paget tik a’ge mo’gulhentaik o. 23An nu’gwarek nebe modok degelak welegi nonuk logo a’ge his henebe aphwami ena’gul onuk mu a’ge ene’gerlakma welat wiagarigep a’ge ai op modok emagoluk tak paik o. Asogo tagalomma, is en an henaik ’gain Nonuk Logo a’ge nebe enaluk ema o, oluk henaik ’gain Nonuk Logo a’ge Allah en arat egi o. An henaik ’gain Nonuk Logo a’ge nemetik-nemategat degelak modok welegi ai, is aphwami ena’gul onuk mu a’ge en enil holuk pobi nobuagoluk, an en disogo takhenebaik o. 24An en his henebe aphwami ena’gul onuk lo’bok emin, onowi lo’bok emin, henemin oruakma henebe odokhenebil, honu’gwarek hono’gwiangma togolik wokhonoboluk laik o. 25Asogo wokhonoboluk loluk, his dogwi asua pam onsobul hohenebiselat, di a’ge yu a’ge logon en wiagap henebegei a’ge ai ’berlegat onsobul hohenebiselat, ik op a’ge pam ’gwete hegeik werakhenebaik o. 26#Yeh. 11:19,20His hena’gul helep, henede ningtak ai ukpoluk pobuk henede ’get a’ge henebabut ’get a’ge wokhentasulat, an niak hologo togulom a’ge takhenebasulat, tik o. 27His en, an en,
Disogo tip, asogo tip, oluk henesa’go weregis wene ai ’berlegat tenak welat hegitsogo togu lemagoluk takhenebasulat, Narogun honogola pasulat, tik o. 28His henebe pobuk ’gwiang an en hene’balak wogentegismu eba wolorogup o. Eba welat, his an neiyagaiat agalat, ye, an his henaik Allah at agalat, wolorogup o. 29His di a’ge yu a’ge logon en onsobul wiagap henebegei a’ge ai en herle werak ’gela’ge tenhentarok oruakma delhenebik o. Asogo delhonoboluk e, his so’boru obouk wokhonto erlakma en, gandum ebe moli op ’baktagalat, e’gen op a’ge a’bik egesise lemagoluk mo’guleik o. 30An en e, his henebe aphwami ena’gul onuk mu a’ge ene’gerlakma welat so’boru obouk en hononuk wiagaphonobogu lema no oluk, an en heniabukmu e yogo a’ge modok a’bik egesise lemagoluk wokhentasulat, di a’ge yu a’ge e’gen heniabukmu yogo a’ge ebe a’bik aga lemagoluk wokhentasulat, tik o. 31Asogo wokhentasukhwe welat, his henebabut ’gorlo modok togu legep a’ge ai emin, wiak togu legep a’ge ai emin, honogola ebetholuk e, honogola en e,
Nis wiak modok enemelmel a’ge togu legema hegi o, oluk henebit ema ani o. 32His aphwami Israel a’ge yu, an en asogo takhenebaik ai his henebaget puk, erlak o. Holuk e, his wiak togu legep a’ge ai henede ebetholuk e,
Ne’gerli o. Ne’bigene en tegis e, oluk pobi tip o, oluk henaik ’gain Nonuk Logo a’ge en arat egi o,” oluk mo’gulnesi.
33Nenaik ’gain Onuk Logo a’ge en asogo mo’gulnesirik mesik disogo mo’gulnesi,
“An en his honowiak arat ho honobolukmu en, his honowi kota welegep o’gwe lo’bok weleripok oluk mo’gulhentasuam welat, o moluk-melaksogo pegesa a’ge ai pobuk togolik worua o. 34His honowi pam eba, aphwami ebela ai pam lagalat, heniabuk modok wiagapsogo pegesa ai ’gela’ge enil hogu legesa a’geat de, pobuk di a’ge yu a’ge elit yorogu leripok oluktak paik o. 35An en e, ’berlegat asogo tak paik ai en, aphwami en enil holuk,
Nadugat e, yabuk yema modok wiagapsogo pegesa a’ge ano, yogodak o onuk Eden op welaga ai ’gela’ge aga o. Ye, o kota yema re, poluk agalat, modok wiak agalat, moluk-melaksogo ukpogulat, tigisema hogu lege ano yogodak e, o kota leget pakleget ningsogo ut agalat, aphwami enebe a’bik agalat, tegei ai nogorlok o, oluk erlik tuaat o. 36His henarilak ena’gul onuk mu a’ge heneragam o’gwe enebe logon enelaluk welema a’ge en e,
O kota ’berlegat modok wiagap pegesa a’ge ano aphwami Israel a’ge enaik ’gain Onuk Logo a’ge en togolik weriselat, yabuk modok wiagap pegesa a’ge ano pobuk opsogo yeriselat, tegei hegi, oluk enaluk ema o. An henaik ’gain Nonuk Logo a’ge en arat egi ai, ebe tigat o,” oluk egei.
37Nenaik ’gain Onuk Logo a’ge en asogo egeitik logon disogo egei,
“His aphwami Israel a’ge yu, an en domba seik-’beik oso ai ’gela’ge, his henebe modok a’bik takhonobouwagoluk, togolik yo’go noboma nesa’go holholuk asogo takhenebaigat o. 38Ye, o Yerusalem an nebaget togulat, domba an watnoum a’ge modok a’bik welaga ai ’gela’ge, kota ’berlegat wiagat tigisema aphwami enebe erlakma en poluk oruak a’ge ai, pobuk enebe modok a’bigat ema o. Asogo agoam his en e,
Nenaik ’gain Onuk Logo a’geat o, oluk pobi nobua ani o,” oluk egei.
Currently Selected:
Yehezkiel 36: Wul
Highlight
Copy
Compare
Share
Want to have your highlights saved across all your devices? Sign up or sign in
