Yehezkiel 34
34
Aphwami Israel a’ge onuelak tenentarok welagai a’ge paget egei wene
1-2Nenaik ’gain Onuk Logo a’ge en wene asogo mo’gulnesirik, mesik disogo mo’gulnesi,
“Hat aphwami en dogo a’ge yu. His aphwami Israel a’ge onuelak ononuk logo a’ge wam domba tenakho welagai ’gela’ge tenhentarok welagai a’ge ai, wene disogo yagontomup o,
His en aphwami Israel a’ge wam domba tenak wolom ’gela’ge, tenentarok welat, is enebaget togwi erlak, honu’gwarek paget nak logo poluk togu legep ai en, eige, nede a’ge yema o. Wiagaphonobua o. 3His en domba agamu a’bosu no’gulat, asu tualogo honosum egesugulat, domba logon esei a’bik a’ge se’gerlogo no’gulat, tu ’gela’ge, is ene’gik his no’gularat de, enebe opsogo tenentarok welegep erlak ai o. 4Is enebe wam domba ’gela’ge tenentarok welegep a’ge ai, is logon enanni erlak a’ge degelonobu erlakma en, enebam ou a’ge obap onobu erlak, yebil enebam a’ge heronobogwi erlak, ’gebela nelakpoluk nalegesa a’ge holuk hwiakho togolik wogonoboluk wom erlak, henebabut wiak welat, henanni wiak tagonobogu legep ai o. 5#Bil. 27:17; 1Raj. 22:17; Mat. 9:36; Mrk. 6:34Is enebe tenentarok a’ge erlakma re, enebe enemetik-enematek ’bogul-’bagalsogo mene orlomene ebabut wiak a’ge emdema lai legesa ai o. 6An no domba ai enebe ’bogulogo dom yat a’ge petne, duk petne ligotluk eba no’gwi welat, enebe logon o di owi yu owi ’bogulogo lagalat, tigisa a’ge, aphwami is enilen wogonobogulat, heraonobogulat, tu a’ge mesik enebe erlak o.
7His ap aphwami Israel a’ge tenentarok welegep a’ge yu, an henaik ’gain Nonuk Logo a’ge en mo’gulhentaik a’ge ai, henesa’go opsogo hwelit o. 8His neiyagai Israel a’ge tenentarok welegep a’ge yu, henaik Allah ’gain Nonuk Logo a’ge nelaluk welegi a’ge niak yu hwelip o! His en is enebe nuam domba oluk esan no’gwi a’ge ai enebe palonobogulat, degelonobogulat, tu erlakma en, honu’gwarek paget nak logap pogulat is ugonobogu legep ai en, enebe tenentarok a’ge erlakma re, enebe mene orlomene ’gela’ge en aromsogo wogonoboluk nasulat, tiso yo. 9Ai en e, his aphwami Israel a’ge tenentarok welegep a’ge yu, an niak ai henesa’go opsogo hwelip o. 10An en his henebe neselei a’ge ’gela’ge nil yethentasu legi o, oluk henaik ’gain Nonuk Logo a’ge en egi o. Is enebe nuam domba ’gela’ge his en tenentarok welemagoluk hene’gik pam pegi a’ge ai, pobuk his en tenentarok wolorogup erlak oluk togolik hwerlaik o. His honu’gwarek paget nak logo pagathorlogulat pogulat, his en is enebe wam domba ’gwerik no’gwi ai ’gela’ge no’gulat, togu lorogupno oluk, his hene’gik pam en delenebik o,” oluk mo’gulnesi.
“Neiyagai nuam domba ’gela’ge tenentarok welegi a’ge nebabut op e, anat o,” oluk egei wene
11Nenaik ’gain Onuk Logo a’ge en asogo mo’gulnesirik mesik disogo mo’gulnesi,
“An nu’gwarek en is enebe hera enebiselat, degelenebiselat, tik o. 12Ap uam domba eiye a’ge en o domba ’bogulogo loluk oruakma herasogo mesikmu odoksogo onoboluk tenentarok welago ai ’gela’ge, neiyagai enebe o hiktakma ’bogulogo o di owi yu owi legesa a’ge ai welagai o’gwe lo’bok en togolik wogonoboluk weik o. 13An en aphwami is enebe ena’gul onuk mu a’ge ene’gerlak o’gwe da ya eba en lebigonobou wotluk odoksogo onoboluk e, onu’gwarek onowi pam togolik wogonoboluk weik o. Asogo wogonoboluk wotluk, is enebe onowi dom petne eba emin, do’go’gwe emin, o leimu e’gela moli op wolomma eba emin tenentarok welat, degelenebise leik o. 14An en e, is aphwami Israel a’ge onowi pam eba, enebale o dom pam e’gela moli opma enebaik o. Is eba enebaikmu welat, e’gela dom pam op a’ge no’gulat, set hwalogo ’boutak welat, togu lema o. 15An nebe is nuam domba ’gela’ge tenentarok welat, is set hwalogulomma ebale herasogo enebaik o, oluk an henaik ’gain Nonuk Logo a’ge en arat egi o.
16Is no domba ’gela’ge ai, enebe logon nalegesa a’ge holuk hera enebiselat, logon ’gebela nalegesa a’ge holuk, togolik wogonoboluk wagalat, enebam yebil oruak holuk e, het enebiselat, logon enebam ou holuk obabenebiselat, asogo tagalat, logon enemikmik wiak a’ge enesei a’bik enanni a’bik welagat a’ge holuk e, warenebik o. Ap onuam domba eiye a’ge en hegitsogo degelonobogwi ’gela’geat an en is asogo degelenebik o.
17His no domba ’gela’ge ai, an henaik ’gain Nonuk Logo a’ge en ik a’ge ai, niak henesa’go opsogo hwelip o. His henebe lo’bok, wene henebam pasulat, no’gorliselat, tagalat, his logon henebe domba ’gela’ge henebabut op a’ge ai, henematekma honoboluk, his logon henebabut wiak kambing ’gela’ge ai, is op a’ge ene’gerlakma en henematekma honoboluk, degelhenebik o. 18His en e’gela o leimu moli op a’ge no’gularat de, logon honoyuk en ’besilogo wiagap togulom no a? Ye, ik op a’ge no’gularat de, ik ai pobuk modok il wiagapsogo po no a? 19Aphwami an no domba ’gela’ge logon en, e’gela his honoyuk en ’besilogo pegep a’ge ai emin, ik orogole wiagapsogo ’bo pegep a’ge ai emin, op a’ge erlak en yogunat nil no’gwi ai o.
20Ai en e, an henaik ’gain Nonuk Logo a’ge en disogo mo’gulhentaik,
His nuam domba esei a’bik a’ge ’gela’ge yu, an nebe pobuk wotluk e, his henebabut henemik-mik wiak henanni a’bik a’ge ’gela’ge ai henematekma honoboluk, enanni erlak a’ge ’gela’ge enematekma enebasulat, degelhenebik o. 21His en wam domba um en, awe en, iak en, is enanni erlak a’ge wusogo woroksogo hwigentasu ai ’gela’ge, neiyagai yo’go ’belak no’gumu ’bogulogo pare’gwe lebigonobogu legep ai o. 22Asogo a’geat de, an no domba ai modok wiaksogo tagonobuano oluk, an nu’gwarek en is enebe delenebik o. Asogo delonoboluk, enebe lo’bok enebabut op a’ge enematekma enebasulat, enebabut wiak a’ge enematekma enebasulat, degelenebik o. 23#Wah. 7:17Asogo degelonoboluk, is enebe tenentarok welat delonobogu lemagoluk, onue ’gain Onuk Logo a’ge neragam a’ge Daud onuk logo a’ge ’gela’ge edikpoluk emetik-ematek en tenentarok welemagoluk wogentaik o. 24#Yeh. 37:24An is enaik ’gain Nonuk Logo a’ge Allah otluk, is onue onuk logo a’ge Daud ’gela’ge ai, onue e’gik pam welema a’ge otluk, tua o, oluk an henaik ’gain Nonuk Logo a’ge en arat egi o. 25An neiyagai no domba ’gela’ge ai enede ha’buksogo op welat, onogorlok erlak leimu welat, e’gelema nogo ogulat, togu lemagoluk wene disogo weragenebegi o,
Mene orlomene emin, wam maro ebabut wiak a’ge emin, his oruakma o da ya welago a’ge ai ’berlegat mukho lebikpaik o, oluk wene weragenebegi.
26An en is enebe obap enebasulat, an nu’gwarek nodom pam esa’go da ya eba welemagoluk mo’gulentaik o. Asogo mo’gulontoluk, moru nasu hegitsogo, ’gwiang sakhorak poluk obap pasu lemagoluk wogentasu leik o. 27Is enebe ono’gwiang pam eba op oruakma, an en is eniabuk o’gwe eba, e e’gen a’bik wogentasulat, yabukmu di a’ge yu a’ge yogo a’ge ebe obat wogentasulat, tik o. Ye, aphwami logon en is wiaksogo eneragam a’ge ’gela’ge ene’gik ningsogo tenentarok oruakma, an en herle hebilogo delonobumu, is en e,
Nenaik ’gain Onuk Logo a’ge re, arat o, oluk enaluk ema o. 28Selei a’ge en hogul a’ge horlogwi ai ’gela’ge, aphwami ena’gul onuk muat a’ge en enebe wogonoboluk, mene orlomene ebabut wiak a’ge iak en sarluksogo wogonoboluk nasulat, taga lema erlak o. We, is logon en onogorlok emagoluk tagonobo erlakma en op modok welema o. 29An is eniabuk o’gwe ’gwiang moli op modok wogentasuam e, o is oruakma ebano so’boru obouk aga lema modok erlak o. Ye, aphwami ena’gul onuk muat a’ge en neiyagai ene’gerli emagoluk eniak esegen wogontogu lema erlagat o. 30Asogo tagonoboma, aphwami ’berlegat en e,
Aphwami Israel a’ge enebe Allah eiyagai o. Holuk e, at en tenentarok welago yo, oluk enaluk ema o, oluk an henaik ’gain Nonuk Logo a’ge en arat egi o.
31His henebe demat nuam domba ’gela’ge oluk esan a’ge oruakma honso’boru wokhentasu legi o. His henebe an neiyagai welegep o. Ye, an his henaik Allah at welegi o, oluk an henaik ’gain Nonuk Logo a’ge en arat egi o,” oluk egei.
Currently Selected:
Yehezkiel 34: Wul
Highlight
Copy
Compare
Share
Want to have your highlights saved across all your devices? Sign up or sign in
