Yehezkiel 24
24
Sogoluak pam ’gwerik soru a’ge paget ebam elitsogo mo’gulentesi wene
1Woknonoboluk nonobou wegesema oruakhwe tahun 8 takpoluk, mesik pelelak a’ge dugwi 9 pelelak poluk, mesik pelelak a’ge tanggal 10 dugwi ai a’ge pam At Allah en an mo’gulneselat,
2 #
2Raj. 25:1; Yer. 52:4 “Aphwami en dogo a’ge yu o. O agauwa tanggal 10 a’ge yu odo ’balogo pomup o. O Yogodak agauwa yu pamat, Ap ’gain o Babel a’ge en o kota Yerusalem pang enebil ’gwi laik oluk tagoma re, tanggal yu opsogo odo ’balogo pemen o. 3Is an niak hologo tu enebit a’ge yu wene ebam elitsogo mo’gulentasu lomun o. Asogo mo’gulentasulat, At onuk logo a’ge Allah en egei ano re yuat o. Sogoluak odouk mu ’gwelak a’ge pam pogulat, asogo poluk ik na’gogo pogulat, tuak o.
4-5Ik asogo hasukhwe, domba esei oruak a’ge holuk wokho worogulat, einnyo modok op a’ge awe ’gwerik emin, odogun ’gorik emin, wokho sogoluak ogola ik sakhasumu ebano ’belak pogulat, uak omo’gok oruak a’ge holuk nak sogoluak ogola ik sakhasumu ’betesogo ’gwelabogulat, togu lemarik, uak ano Sak houwagoluk, odouk pobuk narlogulat, uak ano ik iak osoma ebano Sorogulat, tuak egei o.
6-8At otok modok welago a’ge Allah en egei ano re yuat o. O kota e’gerlakma eba enebe werak a’ge enemep ai, ’gwiang aling en sebel agoma no oluk, ’gwiangma ’belabu erlak o. At e, helep asu erlak ebak a’ge pam herlelik pesi o. Emep herlelik a’ge nil holuk e, nolot het agalat, wusogo enebil legesa a’ge o’go wo a’ge eberak welat, At emep ai, ’gwiang aling en sebelisoma no oluk, helep asu erlak ebak a’ge pam herlelik paikmu re, aphwami enemep herlelil no’gwi ’gwe o kota eba, nede o! Sogoluak ogola einnyo sak hasulat soduk lobok oso a’ge ano, ho tu erlakma en lo’boktak oruak a’ge ai nede o! einnyo ’belaksogo a’ge ai, sa en horlo epegep? oluk, Helep walho erlakma yogun-yagan a’ge mesik wokho lebikpasulat, mesik wokho lebikpasulat, taga lemak o,” oluk, egei o.
9Asogoatma re, At otok modok welago a’ge Allah en egei ano re, yuat o. Aphwami enemep herlilogo pil lagaimu, o kota ai ebe nede o! An ogo re, e ’gelogo laga’bikmu re, 10E logon emin dalogo pil ligagalat, odouk ’gwielak pasulat, takpoluk, einnyo ano oduk op ago a’ge emin ne’garlok he’garloktak poluk arat li lebeksogo sak hasulat, uak ano re, odouk e narlogo sak hasulat, tuak o. 11Asogo takpoluk, Sogoluak yagarak erlak we a’ge odouk e’gen pam pouwak o. Pogwiam aganhan en besi ano momi delengtak pasulat, Sogoluak besi a’ge pam hele’gik a’ge e’gerlakma besi a’ge erlakma en mu a’ge mesik wolom no oluk odouk nasulat, ye, Soduk daktak a’ge eba ano erlak agalat, tuak o. 12Soduk daksogo welago a’ge ai, erlak emagoluk, an en set lilagaiksogo nak tagalat, odouk mu’gwalise legi a’geat de, Soduk esing a’ge ai soduk daksogo nak pil wagama re, erlak om erlakma en modok-modogat oruak nak o, oluk egei o.
13“Soduk ebam daktak welago ’gela’ge re, at e’gerli erlak a’ge telakma enemak pil lasu aiat o. At Soduk ebam e’gerlik welago a’ge ano an en enebam e’gela hosogo hwikhogwi ’gela’ge, tegis a’geat de, ebam e’gerlik a’ge ano erlak om a’ge ebit epesimu re, nolot het en takpo a’ge ano yamuk u erlakhwe ebam Soduk ano e’gerl gat welema o. 14An Allah enat egi o. Ye, wene egi a’ge ai tu erlige horok lau wagama re, an mo ik erlak, at arat tik o. An en at nedeap pasulat, takpo a’ge eberegis a’ge oruakhweat de muat mesik takpo a’ge eberiselat, tik erlak at ebabut emin, til lasu a’ge emin, pobirak poluk motluk-motlugat at wene ebam a’ge no’gorlogo o’go hegitsogoat tak paik o,” oluk, An modok-modok welegi a’ge Allah enat egi o, oluk mo’gulnesimu en mo’gulhegis o, mo’gulesi.
Yehezkiel ugwe waraga wene
15At Allah en an mo’gulneselat,
16“Aphwami en dogo a’ge yu o. An en o agauwa mesik erlige e’gin modok mia a’ge mesik hebam pasulat, at hede hwedik modok welegen a’ge anoat waik o. Wasu holuk e, hat en at ewen lebiselat, olo’gu mariselat, ye, hil pam hil a’bosu ’belakpou wagalat, tu mia o. 17Waikmu warago holuk e, leweni dain tu mia o. A’geat de, hiak paget nak hede wathwerlasulat, hosum ha’gul pam erla’gulik nak welat, hoyogut owi ’buktak nak welat, tak wolomup o. Horogole orlomu hwerlasulat, pong poluk onso’boru sakhu no’gwi a’ge ano hat nasulat, tu mia o,” oluk, an mo’gulnesi.
18Mo’gulnosoam e, hubet o’gwe aphwami wene mo’gulentesirik, huba’go nugwe arat waraga o. Waragoam e, loruk o’gwe wene le’gelogo mo’gulnesi a’ge ano ’gela’geat tegis o. 19Asogo tagoam e, is aphwami eba en an mo’gulnogulat, hat en til lasu legen ai nis taknonobo a’ge oruakhweat de, tugumu no oluk mo’gulnonto erlak epegen a?
20-21Asogo mo’gulnegisema, an en is mo’gulentasulat, “At Allah en his aphwami Israel a’ge mo’gulhonto a’ge mo’gulnesi ano re yuat o. At otok modok welago a’ge Allah en eselat, nenanni wolom a’ge edip yuat o, oluk, onogola enagai hogwi a’ge, ’gwelakhogulat enede aganhan lobuk eselat, enede hwedik takpogulat, togwi a’ge an nowi werik omu degelak a’ge ano, an en wiagapsogo paigoluk taga legi o. Enemalik logomalik emin, hwelani emin, ugonoboluk wegesa a’ge ebano, wa’gun en nouwama re, 22Nasu holuk e, hat Yehezkiel en taga legen ano ’gela’geat is en ogo asogoat tuak o. Onorogole hisak horlogulat, is aphwami en pong poluk so’boru sakho no’gwi ano, is no’gulat togwi ai o. 23Ena’gul pam sum erla’gulik welat, onoyuk owi ’buktak welat, asogo tak welat, onoweni dami weni edip lebikpogulat, lo’gu marogulat, togwi o. At e, is onowiak o’go enebam pogwiam enebe lologunsogo pil lasulat, is-is nak en ogulat, yu re, no’gosogo taknenebasu o, oluk, ogulat, tugu lema o. 24Hat Yehezkiel ai, is en tu a’ge hebe il wal a’geatma re, hat en taga legen ai ’gela’geat is asogoat tuak o. Asogo togwi holuk e, An notok modok welago a’ge Allah anat enaluk ema o, oluk, mo’gulontomup o,” oluk, mo’gulnesimu en, mo’gulhentegis o.
25Disogo mo’gulontomup o, oluk mo’gulneselat, “aphwami en dogo a’ge yu o. Is enemin eneiyagai logomalik hwelani emin en, enede hisakho tugulat, enil ’gwelakhogulat, enede aganhan hogulat, enede enagai hogulat, enede en logo pogulat, Nenanni wolom a’ge re, yuat o, oluk, ogulat, togwi a’ge ano, an en erlagapsogo pasu ai erlige 26Ap mesik hweiye libema a’ge en o agauwa ai erlige en nak wene woluk hat mo’gulhosu weik ani o. 27O ai erlige hiak logon u erlakma en walorogun erlaktik, hiak pakniasulat, at wene mo’gulhosu ma a’ge ano he’birek wene ’balogun ani o. Asogo togun ano pam en is aphwami il walageat orogunmu re, Allah anat enaluk ema o,” oluk, an mo’gulnesimu re, mo’gulhentigis o.
Currently Selected:
Yehezkiel 24: Wul
Highlight
Copy
Compare
Share
Want to have your highlights saved across all your devices? Sign up or sign in
