Yehezkiel 25
25
O Amon eba takpo wene
1 #
Yer. 49:1-6; Yeh. 21:28-32; Amo. 1:13-15; Zef. 2:8-11 At Allah en an mo’gulneselat e,
2“Aphwami en dogo a’ge yu o. Is o Amon a’ge oruakma, eba horogole pei laguntik, is tagonobo a’ge ano mo’gulentasu lomup o. 3Mo’gulentasulat e, At otok modok welago a’ge Allah en egei ano henesa’go hologu lemis o, oluk, mo’gulentasu loroguntik, At otok modok welago a’ge Allah en egei ano yuat o. An nowi werik omu degelak a’ge ano wiagapsogo pogulat, is Israel a’ge ono’gwiang pam di iak erlak, yu iak erlak welemagoluk, tak-pogulat, ye, is Yehuda a’ge herle waronoboluk hwik entai lagalat, togwi holuk e, is en e, hweinat! Obat tagenebegesa Oluk, egesema re, 4An en o Amon ai, is aphwami o mo il liplau wago hegit eba welagai a’ge ebano en eiyetak pagathorlouwagoluk, ene’gikmu paik o. Ene’gikmu paikmu, Is en Aphwami Amon a’ge ene’gerlakma eba onowi rabo sum owi emin, onowi emin, uthorloluk welat, is Amon a’ge enagan e’gen daganogo no’gulat, Onuam agamu na’gogo no’gulat, togu lema o. 5An en o kota Raba ano re, unta enagan e’ga ’balogo nil laga lomma heli’gogo pasulat, ye, o Amon ai, kambing domba enagan e’ga nil denaga lemarik, set hwalogo wolomma takpasulat, tik o. Asogo tisoam e, is en An Allah at enaluk ema o,” oluk, egei o.
6At otok modok welago a’ge Allah en egei ano re yuat o. “O Israel takpogogwi holuk, is o Amon a’ge en, obat tegisa, oluk, enede aganhan en ene’gik dap hogulat, onoyuk darlik hogulat, tigisema. 7O Amon takpo a’ge paget egi a’ge ano yuat o, oluk, ne’gik ’bilhasuam e, is aphwami ena’gul onuk lo’bok en waga lemarik, o Amon wiagapsogo pogulat, o ai pam di a’ge yu a’ge oruak a’ge ebano hogul woluk lagalat, tua ani o. Di aphwami yu aphwami ene’gerlakma o ai, erlagapsogo pasu holuk e, o Amon ano yuat o, oluk, mesik emin ogu lema erlagat o. An en o Amon erlagapsogo pasuam e. An Allah at aluk ema, oluk, mo’gulontomup o,” oluk, mo’gulnesimu re, mo’gulhentegis o, oluk, mo’gulnentesi.
O Moab eba takpo wene
8 #
Yes. 15:1–16:14; 25:10-12; Yer. 48:1-47; Amo. 2:1-3; Zef. 2:8-11 At otok modok welago a’ge Allah en egei ano re yuat o. O Moab emin, Seir emin, en ogulat e, is Yehuda a’ge ai re, di aphwami yu aphwami hegirat egesa o, oluk, egesema re, 9O Moab o’gwiang hwerli oruak a’ge pam eneselei a’ge en ’gu agaimu no oluk, o kota-kota arat modok op a’ge anni oruak ogulat, Bet-Yesimot emin, Baal-Meon emin, Kiryataim emin, ai re, naduk Sebelhwerla ’gumagoluk, tak paik o. 10Aphwami ena’gul onuk Amon a’ge di aphwami yu aphwami ene’gerlakma en ononuk eberak welema no oluk, an en is aphwami o mo porlu ago hegit eba welagai a’ge ebano en o Amon eiyetak pahat horlouwagoluk, ene’gikmu pasulat, o Moab eminat wogentaik o. 11Wogentasulat, is Moab a’ge onowiak o’go enebam pouwema re, pasuam e, An Allah at enaluk ema o, oluk, egeimu re mo’gulhentigis o, oluk, mo’gulentigis o.
O Edom eba takpo wene
12 #
Yes. 34:5-17; 63:1-6; Yer. 49:7-22; Yeh. 35:1-15; Amo. 1:11,12; Oba. 1:1-14; Mal. 1:2-5 At otok modok welago a’ge Allah en egei ano re yuat o. “Is o Edom a’ge en is Yehuda a’ge onolot het en tagenebegesa ano pam wiak logat tigisema re, 13O Edom an nanni pam takpasulat Aphwami at pam welagai a’ge emin, Onuam emin, erlagapsogo pasulat di iak, yu iak erlak a’ge, o wogo welemagoluk, takpasulat, o Teman en ’bekhit o Dedan hwerli wa’gun pam werak waremagoluk takpasulat, tik o, oluk, An notok modok welago a’ge Allah enat egi o. 14Is Edom a’ge tigisa pam nolot het en o’go tagonobo epasu a’ge ano, tagonobouwagoluk neiyagai Israel a’ge enede pam eba tagenebaikmu re, an nolot het hasulat, nolot het odouk ’gela’ge tagalat, tago ano is asogoat tagenebil laga lema o. An nolot het en o’go tagenebil lasu legi ano is o Edom a’ge enaluk ema o,” oluk, at otok modok welago a’ge Allah en egeimu re, egi o, oluk, mo’gulentigis.
Is o Filistin a’ge tagonobo wene
15 #
Yes. 14:29-31; Yer. 47:1-7; Yoe. 3:4-8; Amo. 1:6-8; Zef. 2:4-7; Zak. 9:5-7 At otok modok welago a’ge Allah en egei ano re yuat o. “Is Filistin a’ge en ogulat e, Israel a’ge ai modok nenebit o, oluk, onolot het en tigisa o’go waronobogulat, ye, o page nadugat u, nenemin weim hwerlitak a’ge re yuat o, oluk, is Yehuda a’ge modok erlagapsogo onobo a’ge enede opogulat, togwiam e. 16An notok modok welegi a’ge Allah en tagonobo a’ge oso ano re yuat o. Is aphwami Filistin a’ge an nolot het pam tagenebaigoluk tagoma re, is aphwami Kreta a’ge erlagapsogo enebasulat, ye, is Filistin a’ge pema ik laut esa’go ’gwe welagai a’ge ebano, ena’gulak erlagapsogo pasulat, tik o. 17Nolot het en entigisa a’ge o’go tagonobo epasu a’ge ano, modok mubelesogo takpasulat ye, nolot het odouk ’gela’ge inagalat, tigisa a’ge o’go enebam pasulat, tik o. Nolot het en tigisa a’ge o’go enebam pasuam an Allah anat enaluk ema o,” oluk, egeimu en, egi o, oluk, mo’gulentegis.
Currently Selected:
Yehezkiel 25: Wul
Highlight
Copy
Compare
Share
Want to have your highlights saved across all your devices? Sign up or sign in
