Yehezkiel 23
23
Ohola ot Oholiba e’birek en wiak tugu legesa wene
1At ’gain Onuk logo a’ge en an mo’gulneselat e, disogo egei.
2“Aphwami en dogo a’ge yu o. Hwe mesik ogulani hwami ’biren dogo welegesa a’ge re, 3Is e’birek enebe dogum pam o Mesir eba welat, hwami danian otluk, tennentemit o, oluk, il denaga legesa. O eba oruakhwe, enagamu ’gorlok togulat, dogum pam enagamu ’gorlolak erlakma, mugonoboluk onoboluk, tenentil lagalat, tugu legesa. 4Ebap onuk e, Ohola, ye, ot onuk e, Oholiba at o. Is e’birek ai re, an nugwami ’gela’geatma re, enemalik logomalik hwelani dagenebegisa. Ohola ai re, o Samaria at o. Ye Oholiba ai re, o kota Yerusalem at o. 5-6At Ohola ai re, nugwe ’gela’geatma re, babi til lasulat, at emin hwedik a’ge onosum ’bogorl esing a’ge ’gela’ge ’buktak o eiye welagai a’ge emin, ap enesegen eiye a’ge onuelak emin, kuda pam hurotluk laga legesa a’ge ap weim togwi a’ge aphwami Asyur a’ge ap souwe modok ebelak a’ge nak ebano en, tenniouwak o, oluk, is enebe enede en nil lasu lagama re, 7Is ap Asyur a’ge ’gain ebano en tuagoluk, mo’gulentil lasulat, ye, Tenniemit O, oluk, enede en nasu a’ge ebano, enasua erliktogwi a’ge ’berlegat emin til lasu ano pam, at ebeat wiagapsogo pasulat, taga laga o. 8At ebe dogum pam o Mesir eba en ap enemin nogo eselat, agamu tenho erlakma en ebe ano at enilen woluk-woluk togulat, at ebe ano enede en nasuam yogunat til nak lagalat, tugu legesa a’ge ano ukpo erlakma en ebenagaikmu taga laga. 9Asogoat taga lagarikmu no oluk e, at emin a’ge ede hwedik, en ede en nasu a’ge, ap Asyur a’ge ano, ene’gikmu pegi o. 10Pasuam e, is en hwe ai, eserli nogorlogo ukpogulat, emalik logomalik hwelani ebano herle wusogo wogonoboluk lagalat, ye, at ebe wa’gun pam wusogo pogulat, tegisa. Hwe ai, asogo til lasu laga ai pam o’gosogo pegesa o, oluk, at obok ’berlegat hwami ene’gerlakma en wigalluk laga.
11At takpesi a’ge ai, at ot Oholiba ano il hesi a’geat de, ebap en taga laga a’ge ano we weiyat a’geat de, ot nak e, modok logat ede en nil lasulat, danian modok tak pagathwerlil lasu laga o. 12Weim togwi a’ge en leik-louktak poluk o eiye a’ge emin, is ap segen eiye a’ge onuelak emin, ap kuda pam hurotluk no’gwi a’ge is Asyur a’ge ap Souwe ebelak a’ge ebano nak at en ogo re, ede en nil lasu lagama re, 13At en ogo tago ano pam at wiagap pil lasumu hegi o. Emin hegirat til lagaimu nil entegisat a’geat de,
14-15ot yu nak e, mesik eminat nobuak, oluk ede ebil denaga laga. At en ap Babel a’ge dogo ono’borl pam sing ’buktak ena’gul pagaiya sum ’buktak ap Babel a’ge onowirak weim obogwi enaluk a’ge ’gela’ge onogut hele’gik a’bosu borlu ’gela’ge pam ebelogo o hebat pam dopnosogo oruakma il entesirik. 16Perleneat is enebe ede en nasuam wene wusogo o Babel eba perakpesimu, 17Ap Babel a’ge ebano at e’bek wotluk ede en nasuam, ebale togogumu at nogosoma en enebam yamuk uak oluk til lagalat, wiagapsogo pegesa, wiagapsogo pogwiam ebit en ukpesi. 18At en telakmasogo we yogun tenniouwak opoluk, til lasulat, a’ge a’ge wogentil lasuam, an en wiak a’ge til lasu hwe yu nebit o, oluk, ebap ukpegi ’gela’ge ot asogoat ukpegi. 19Ukpegi a’geat de, at o Mesir eba en dogum welat, hwe danian til denaga laga eria pam eberak poluk, ebenagaikmu modok a’bigat til lasu laga. 20Is ap enede hwedik e onouwarli lok keledai onouwarli ’gela’ge, ye, ena’bosu lagabogwi ai, kuda a’bosu lagabiso ’gela’ge, is en nak nobuak o, oluk, is enebaget ede en nasu laga. 21An o Mesir eba en owan dogum oruakhwe, nagamu ’gorlok togulat, nagamu tenik-tenak modok welat, tugu legesa ano ’gela’ge, yogodak asogoat taknobogulom a’ge logwe, oluk, epasu laga o,” oluk, an mo’gulnesi.
Oholiba o wiak o’go ebam po wene
22Asogoatma re, An notok modok welegi a’ge Allah en at Oholiba takpo ano re, yuat o. “At emin ede hwedik welat, tu a’ge ’gela’ge nak togwi holuk e, e’gin otluk ukpesi ano enat at sebelak poumagoluk ede ’gagalik o. At o’borl o’gwe welagai a’ge ’berlegat. 23Is Babel a’ge emin, Kasdim a’ge ’berlegat emin, ap Pekod a’ge, Soa a’ge Koa a’ge ano emin, aphwami Asyur a’ge ’berlegat is enemin ’berlegat ai, ap souwe ebelak o eiye a’ge emin, ap enesegen oruak a’ge onuelak emin, kereta pam weim togwi enaluk a’ge onuelak emin, ap ’gain emin, is ’berlegat kuda pam denagai a’ge ebano re, 24At sebelak pouwogoluk, enesegen onogodok emin, kereta weim togwi a’ge emin, we a’ge emin, leik-louktak poluk aphwami a’bik odoktak a’ge emin waga lemarik, sing sum lok-lok a’ge emin, wei a’ge emin, wogulat, a’gul sum erik a’ge ’buktogulat, takpoluk, pang lo’guogoluk, wale’gogukhwe, is en wiak o’go at ebam pou wagoluk, ene’gikmu paikmu is aphwami eniak hologwi erlak holuk tagonobogwi ’gela’geat hegitsogoat takpouwa o.
25An nemin nede hwedik tu epasukhwe, is aphwami mu a’ge enemin enede hwedik togwi ai nebit o, oluk, nolot het en ene’gikmu enebaikmu onolot het en warono’bogulat, ena’gul emin, enesa’go emin, sebasogo pogulat, ’bullak enebaik a’ge ano wa’gun pam waronobogulat, at emalik logomalik hwelani herle waronoboluk lagalat, ye, ado ’bullak a’ge ebano odouk en nouwagoluk, narlik pogulat, tua o. 26At osum e, no’gorlogo age’golom pogulat, ebetne alli a’ge modok opsogo ebelak a’ge ebano horloluk yarluk ogulat, tua o. 27At o Mesir eba e’gerli erlagat a’ge telakmasogo pil lasulat, tenniouwak opoluk yogunat til lasulat, taga laga a’ge louktak til wago a’ge ebano an en erlagapsogo paik o. Erlagapsogo pasuam e, at en o Mesir eba welat, til lasu laga a’ge ano eberak poluk, pobuk logon emin tagalom a’ge logwe, eige, oluk, pobuk logon ua erlak o.
28An notok modok welago a’ge Allah en, is ap at ebit enebasulat, ye, emin hegitsogo nak togwi holuk e, e’gin en ukpasulat, tegei a’ge ano, ene’gikmu paigoluk, taga legi o. 29Pasuam e, enebirap modok takpogulat, at en hwedigat tagalat wesi a’ge ebano, is en delhorlogulat, at osum ’buktak erlak agap a’ge golom pogulat, tuama re, at ap emin yogunat til lasu holuk e, hwe yu nogorlogat o, oluk, ene’gerli hogu legesa a’ge ano, arat enagat ema o. Asogo takpo ano re, at e’gerli erlak a’ge ano telakma takpil lasulat, op at taknobuak o, oluk, til lasulat, taga laga ano pam wiak o’go at omuat tak pagathorlouwa o. 30Di aphwami yu aphwami yogunat tenniouwak o, oluk, ede en nil lasulat, enasua erliktago ano pam wiagap pagathwerlasulat, tegei o. 31At ebap en wiak til lasu laga ano at ot enat til lasumu re, ebap en taga laga o’go ik e’be pam ne’gak a’ge ’gela’ge wogegis a’ge ano at ot nouwagoluk, e’gikmu paik o, oluk, egei ai o.
32At otok modok welago a’ge Allah en egei ano re, yuat o. Ebap egeik e’be ai emde lok ogorlukmu en emde loropsogo ne’gak, oruakma re, orat nouwa o. Asogo nasuam e, aphwami en mi-miarak pogulat, Aha! oluk, eidarak obogulat, tua ani o.
33Ebap Samaria egeik e’be ano re, ogorlok en uak emi lung toluk lasulat, di iak erlak, yu iak erlak agalat tagalom a’ge ’gela’geat ne’gakma re, at nasuam e, ede modok ’balagalat, ede modok-modok wiak agalat, tago hagun ani o.
34At en ne’gak a’ge ano nasulat, aling emin nasu lomtik sogoluak sapsogo poluk, saptak a’ge mesik wokho agamu garok-keraksogo paik o, oluk An Notok modok welegi a’ge Allah enat egi o, oluk egei ai o. 35Asogoatma re, At otok modok welago a’ge Allah en egei ano yuat o. At en, an memerak nebasulat, ye, o’borlma peberik nebasulat, tegeimu re, e’gerli erlak a’ge a’ge telakma enemak pil lasulat, we yogunat tenniouwak, opoluk til lasulat, til lasu laga ano o’go tak obo a’ge ne’gak a’ge ano arat nasu lemak o,” oluk, egeimu re, mo’gulhegis o, oluk, mo’gulegis.
E’birek onowiak o’go tagonobo wene
36-37At Allah en an mo’gulneselat, aphwami en dogo a’ge yu o. Hat en Ohola Oholiba e’birek onowiak erlagap poluk wiak o’go mo’gulonto epegen? Onowiak erlagap poluk wiak o’go mo’gulonto epasu holuk, hwe ogun ukpoluk yogunat til noso ai ’gela’ge til no’gulat, ye, ene’gik pam ap enemep oruakhwe, togwi ai asua modok tu puk a’geat til lagaimu re, telakmasogoat hiak annisogo mo’gulentagun o. Hwe ogun ukpoluk, ap mu a’ge mesik emin la’boliso ai ’gela’ge an oruakhweat de, is di asua yu asua onogorlok hogulat, enemalik dogo poluk, yu re, At Allah eiyagaiat o, oluk, pulogo nebegesarik at de enasua onso o’boru ’gela’ge nouwagoluk enebaget wusogo odouk narlogulat, tugu legesa o. 38Ai nak tu erlak o. A’geat de, mesik e, mia nobogulat, tigisa ano re yuat o. O agauwa eria pamat an nowi omu degelak welagoma ano wiagapsogo pogulat, ye, nogo 6 nogoluk loruk o’gwe set hwal horlogulom a’ge nebaget pulogo pagathwerlegimu at de o ai pam yogunat til lagalat, tugu legesa. 39Enemalik wusogo enasua enebaget odouk narligisa ai erligeat, an nowi omu degelakma ebano ’gwi lotluk, tu puk a’ge modok takpil legesa. Demat an nowi werik aiat wiagap pil legesa.
40Ye, mesik tigisa a’ge re, yuat, ap o walekma welagai a’ge ebano wemagoluk yo’go perak enebegesema wagaihwe, is onogola enagai en ot e’birek ’gume modok ebelogo werak poluk, enebetne lik louksogo ’buk horlogulat, takpoluk 41E’ben op hogwi a’ge emin, Zaitun a’bosu emin, erliknobogulat, tugulom a’ge wogentegis a’ge ano, wokho e delak a’ge pam horok eriano poluk is nogogumu modok opsogo hele’gik a’ge ano pam hurotluk yerentarok welegesa. 42Is o’borl o’gwe pema-pema o’borlma ebano aphwami enagai en eniak eli-orluk lagaihwe, is ap a’bosu enede ’balagai a’ge noluk honuk-honuk togwi a’ge o leimu a’ge ap o’borlma en eniak eli-orluk lagai a’ge ano enemin, ’gwi legesarik, hwami eriano ebap ot emin tigene ono’gorlopma wantak onobogulat, ’gare ’gare modok ebelak a’ge modok ena’gul pam ’buk tagonobogulat tigisa. 43Asogo togwiam e, an en epasulat, hwami onogunlak ugonoboluk, yogunat til lagalat, onogola enagai ano erlak aga yu hwami demat a’ge erlak danian a’geatma re, tenontogwi a’ge nak ogu lemak, oluk epasuam e, enemin nogo il legesa. 44Ap en hwami da tenentil ene’bek a’bik wagaiam e, enemin nogogulat, tenontogwi ai ’gela’ge, is ap ai en hwami ene’gerli erlagat ena’ge-a’ge telakma tagenebil lagalat, Ohola, Oholiba e’birek enemin, nogwil denaga legesa. 45Is hwami ai, onogunlak ugonoboluk we, yogunat til lagalat, ye, ene’gik pam ap enemep welat, tugumu re, is hwami onogunlak ugonoboluk, yogunat til lagalat, ap warenebil lagalat, togwiam e, onowiak no’gorluarik honowiak o’go disogoat henebam ema o, oluk, mo’gulontogwi ai ’gela’ge, is ap modok op enede horak a’ge ebano en is ot ebap ai onowiak erlagap poluk, wiak o’go tagonobouwa oluk mo’gulnesi o.
46At odok modok welago a’ge Allah en eselat e, “Ap nak lek hogulat e, is ano sebelogo onobogulat, onuak erlik ’bo pogukhwe, ena’ge-a’ge yogunat delhorloluk yarluk ogulat, tuak o. 47Ap esan ai en helep pam ot ebap e’birek domuk-demaksogo waronobogulat, ’garok pam enebe ’garok-’geraksogo waronobogulat, enemalik logomalik hwelani warenebil lagalat, ye, onowi werik odouk ’gwelabogo pogulat, tua o. 48Asogo togwi ano pam is hwami o eba ene’gerli erlak ena’ge-a’ge telakmasogo pil lagai ano erlagapsogo paikmu re, is hwami ai, ’berlegat an en tagenebaik a’ge yu, pobirak poluk, ot ebap e’birek entugu legesa ’gela’ge nis asogo tul erlak o, oluk, ua o. 49A’geat de, is ot ebap e’birek nak e, ene’gerli erlak ena’ge telakma pil lagai o’go isat hogulat, ye, asua onogorloksogo erliktugulat, wiak til lagai o’go onomu naga at hogulat, tua o. Asogo hogu lemarik, An notok modok welago a’ge Allah anat enaluk ema o,” oluk, mo’gulnesimu re, mo’gulhentegis o, oluk, mo’gulentegis.
Currently Selected:
Yehezkiel 23: Wul
Highlight
Copy
Compare
Share
Want to have your highlights saved across all your devices? Sign up or sign in
