Yehezkiel 22
22
Is Yerusalem a’ge wiak togu legesa wene
1At Allah en an mo’gulneselat,
2“Aphwami en dogo a’ge yu o. Hat en e, o yu wiak o’go takpo epegen? Hat en ap enemep herlilogo pogumu o kota yu uak lologo o wiak o’go takpo epegen? Asogo tu epasulat holuk, at wiak tu puk a’ge tago ano disogo taga legen o, oluk, 3mo’guleselat, At otok modok welago a’ge Allah en egei a’geat o, oluk mo’gulonto ano re yuat o. E’gerlakma aphwami enemep herlilogo pil lasu ano pam e, o wiak o’go ebam pasulat, asua ogut heli’gogo pil lasu ano pam e wiagap pagathwerlasulat, o kota ai ebe nede o! 4Aphwami enemep herlilogo pil laga ano pam wiagat tagalat, asua ogut heli’gogo pil laga ano pam ebe wiagap pagathwerlasulat, tegei ano pam at wolom a’ge o agauwa ano horogat lau wagalat, at wolom a’ge di tahun yu tahun ano erlagapsogo pil lasulat, tegimu re, di aphwami yu aphwami en at didarak obogulat, di owi yu owi eba welagai a’ge en mimiasogo pogulat, tugu lemagoluk tak paik o. 5O kota e’gerlakma eba modok wik-wiaksogo welagai ai pam onuk wiak aga ai re, di aphwami yu aphwami horoksogo welagai a’ge emin, o walekma welagai a’ge emin, enat mi-miarak pogu lema ani o. 6Is Israel a’ge onuelak ’gaindek o kota eba e’gerlakma welagai ano, onomu-onomu en ononuk logo ano pam aphwami wusogo enebil lagai ai pobi tit o. 7#Kel. 20:12; 22:21-22; Ula. 5:16; 24:17O kota e’gerlakma eba aphwami enaiklak enemin, enialak emin mi-miarak-onobogulat at e’gerlakma eba ap ’bok a’ge e’gin enebam pogulat, malik mongnu a’ge emin, hwami tugwe a’ge emin, sebelak onobogulat, tugu legesa o. 8#Ima. 19:30; 26:2At kota ai en di a’ge yu a’ge nebaget polik oruak a’ge ano, mi-miarak pasulat, nogo 6 nogoluk loruk o’gwe set hwalogulom wene mo’gulentegis a’ge ono oruakhweat de, sagalogo poluk, we yogunat til lasulat, taga laga o. 9At e’gerlakma eba aphwami waronobuagoluk, eniak eseiat enebam pil lagalat, at e’gerlakma eba dom-dom petne asua togwi ’gwe ebano uam werak noluk, hwami emin, ap emin, togwi erlak a’ge yogunat til lagalat, 10#Ima. 18:7-20At e’gerlakma eba enaiklak nogogumu enil ’gwelak enta’gogulat, at e’gerlakma eba hwami dugwi owan hogwi a’ge ebano enemin nogou mia, oluk wene ’belakhweat de, sagalogo poluk, tenontogulat, 11At e’gerlakma eba is ap logon en enarilak Onugwamiat de, modogat wik-wiak tagonobogulat, is ap nin mu a’ge en ene’gerli ho erlakma en enereilak a’geat de wiagapsogo yogunat tenontogulat, is logon mu a’ge en enaik mesigat a’ge en enarilak enemalik hwelani wiagap onobogulat. 12#Kel. 23:8; Ula. 16:19; Kel. 22:25; Ima. 25:36,37; Ula. 23:19Ye, o kota e’gerlakma eba ap waronobuagoluk, ono’go ’balogo no’gulat, togwi o. At en o uang wogentasu a’ge tenak welat, o’go woknemis o, oluk, mo’gulentasulat, at o uang tenakho welagai ano pam a’bigat logon lo’boksogo hwerlasulat, iak anni pam en aphwami mi-miarak enebasulat, ena’ge-a’ge wasulat, asogo tagalat, an niak ’belak ano at modok eperlagapsogo pesi o, oluk, an Allah enat egi o.
13Aphwami mi-miarak onobogulat, ena’ge-a’ge wasulat, at e’gerlakma ebano aphwami wusogo enebil lasulat, tago ai pam an demat ebenagaikmu ne’gik sogou-sogo paik o. 14An en at wiak o’go takpo ai erlige at modok o’borlogouk erlagap poluk welat, e’gik modok anniap poluk welat, tagoma hagun epegen? modok erlagat o. An Allah enat egimu re, an enat tik o. 15Is at e’gerlakma oruak a’ge ebano di aphwami yu aphwami ene’gerlakma perakpasulat, di owi yu owi ’berlegat mukho yarluk tagenebasulat, asogo toluk wiak enemelmel a’ge, tago a’ge ano ai hwerliat erlagapsogo paik o. 16Di aphwami yu aphwami en, at omu enat wiak enemelmel a’ge tagoam tegis o, oluk, ogwiam e, an Allah at enaluk ema o,” oluk, mo’gulnesimu re, hat o kota Yerusalem mo’gulhegis o, oluk, mo’gulegis.
Odouk nasulat he’berlogo pasu ’gela’ge re, Israel a’ge aiat o, egei wene
17Pobuk At Allah en an mo’gulneselat,
18“Aphwami en dogo a’ge yu o. Odouk nasulat, he’berlogo pasu ai ’gela’ge re, Israel a’geat oruakhwe entasu legi o. Besi perak a’ge odouk worogo poluk, wiak holuk e, he’berlogo ukpogwi a’ge Besi tembaga emin, timah amolit oruak a’ge emin, Besi uak emin, besi timah esing a’ge emin, ai ’gela’ge ai re, is Israel a’geat o,” oluk, mo’gulnesi o. 19Asogoatma re, At otok modok welago a’ge Allah en egei ano re yuat o. Is Israel ’berlegat ai re, odouk nasulat, heberlogo pasu ’gela’geat agama re, an en o Yerusalem eba odoksogo enebaik o. 20Besi perak emin, Besi tembagaemin, besi uak emin, besi timah amolit oruak a’ge emin, timah esing a’ge emin, aphwami en odoksogo poluk, odouk en a’bosu dep-’bok ’buagoluk, werarogwi ai ’gela’ge, an en nolot het hasulat, nolot het odouk ’gela’ge takpasulat, asogo tagalat, is asogoat odoksogo enebasu leiktik, o kota eba ’gwelebak onoboluk, odouk orlouk en, ’besi uak orlop-orlop ’bi lasu ai ’gela’ge, is asogoat tagenebaik o. 21Is Israel odoksogo onoboluk, nolot het odouk ’gela’ge puhasuam, odouk orlouk en besi uak orlop-orlop ’biso ai ’gela’ge, o kota ogola eba enebe asogoat tagenebaik o. 22Besi odouk werarogumu odouk orlouk en besi perak orlop-orlop ’bi lasu ai ’gela’ge, o kota ogola eba enebe asogoat tagenebaikmu re, an Allah enat nolot het enebam pasu a’ge ano enaluk ema o, oluk, egeimu re, mo’gulhentegis o, oluk mo’gulentesi.
Israel a’ge onuelak wiak tugu legesa ai en egei wene
23Pobuk At Allah en wene mesik emin, an mo’gulneselat,
24“Aphwami en dogo a’ge yu o. Hat en ’gwiang ai mo’guleselat, at ai, nolot het ema erlige moru en ’gwiang obap pasu erlak ai ’gela’ge, o moru a’bosu ’biso erlak ai ’gela’geat welegi o. 25Is aphwami onuelak ’gaindek o eba welagai a’ge ebano en enede mesigarap poluk, eberogulat, singa en at no a’ge sebelak poluk lebilogo nasulat, iak weisogoat ’gin oso ’gela’ge, is aphwami enemdema yagat onobogulat, di a’ge yu a’ge o’go lok emin, enede hwedik a’ge emin, delhorlogulat, togwi ai pam, o eba re, is hwami tugwe nak a’bigapsogo enebasu o. 26#Ima. 10:10Is ap an nebe eiye a’ge o eba welagai a’ge ebano en an niak ’belak pelal wogo a’ge ano mi-miarak pogulat, yogunat sagalogulat, nebaget omu degelak a’ge ai na’ge ano wiagapsogo pogulat, asogo togulat, yu re, asua o, yu re, we tu o, oluk wene werak a’ge ano enagat ebabut ho erlakma en we yogunat, til lagalat, yu re, op o, ye, yu re asua erlak op a’ge o, oluk ogwi ano re, mu a’ge puk o erlak o mesigarat o, oluk, mo’gulentil lagalat nogo 6 nogoluk loruk o’gwe set hwalhorlogu lomma pulogo pegimu tugukhwe at de, enil nonto erlak uak oluk mosogo welat, togwi ano pam is ene’gerlakma an nonuk ano anni erlagat aga o. 27Is ap onuelak onu’gwarek a’ge o eba ene’gerlakma oruak a’ge ebano re, wam teiye is no a’ge lebilogo no’gwi ai ’gela’ge welat, aphwami enage a’ge horlouwogoluk, enebe wusogo enebi lagalat, ena’guluak erlagapsogo onobogulat togwi o. 28Disogo ema o, oluk, mo’gulontogwi a’ge ano en Soduk holuk a’bosu worogwi ano ’gela’ge, onuelak onu’gwarek a’ge en wiak til lagai ai re, asogoat ti lagai ai o. Is en, nenabi disogo hege o, oluk, we eniageseiat mo’gulontogulat, eniageseiat hin wokho mo’gulontogulat. At otok modok welago a’ge Allah en disogo mo’gulnentesi o, oluk, mo’gulontogwi o. 29Is o eba welagai a’ge ebano en aphwami lalonobogulat, eniak anni pam ena’ge-a’ge delhorlogulat, ena’ge hisak horlogulat, is ap e’gin enebam oruak a’ge emin, ene’gik erlak a’ge emin, Sebelak onobogulat, is ap ’bok a’ge onowene opsogo ’balu erlakma en wiak-wiak ’belakpoluk, wiak o’go tagonobogulat, togwi ai o. 30An en o ai erlagapsogo pasumu no oluk, helep leget ebalema pak wokho pasulat, ye, wogo a’ge emde ’belak o’gwe ai en warenebil ’gu agaimu no oluk, o ai paget emde ’belak a’ge ai ’gwelap harok welat, tuak oluk, ap mesik palegis a’ge re, ebe erlagat hegi o. 31Erlagat hegirikmu re, nolot het is enebam pasulat, nolot het odouk ’gela’ge here tagalat, enebe erlagap enebiselat, asogo, tagenebasukhwe, til laga legesa o’go onomuat enebam paik o,” oluk At otok modok welago a’ge Allah enat mo’gulnesimu re, mo’gulhentegis o, oluk mo’gulentesi.
Currently Selected:
Yehezkiel 22: Wul
Highlight
Copy
Compare
Share
Want to have your highlights saved across all your devices? Sign up or sign in
