Yehezkiel 21
21
“At Allah uagun e, o Babel at o,” oluk, egei wene
1At Allah en an mo’gulneselat e.
2“Aphwami en dogo a’ge yu o. Hil o Yerusalem yetholuk hiak anni pam aphwami en erliktugumu di owi yu owi mo’gulentasulat, is Israel ono’gwiang tagonobo wene ano mo’gulentasulat taga lomup o. 3O Israel welagai a’ge ebano mo’gulentasulat, At Allah en egei ano re yuat o. Is enemin il’belak welegema re, an en nua’gun lisogo poluk is ene’gerlakma ap enede op a’ge emin, ap nede wiak a’ge emin, ena’guluak erlagapsogo enebaik o. 4Is ene’gerlakma ap enede op a’ge emin ap enede wiak a’ge emin, modok erlagapsogo enebaikmu re, nua’gun owi ogola en ’gegilogo is aphwami o sogweik akhit welagaimu en ’bekhit o abel akhit o’gwe hegit welagai a’ge ’berlegat enebam pasumu niouwa o. 5Owi pam en ’gegilogo enebam pasu lemarik pobuk owi pam ebalema yagarak po erlakma en ne’gikmu tenak oruak ene is aphwami ’berlek en, At Allah enat tegei o, oluk, enaluk ema o.
6Asogoatma re, aphwami en dogo a’ge yu o, hede wathwerlasu lemin o. Is ’berlegat enil pam nebit-nebat eselat, hede wathwerlasu lemin o. 7Hede wathwerlasulat holuk e, is en hat mo’gulhogulat e, Hat no paget hede wathwerlasu legen o? oluk, mo’gulhogwi holuk, hat en erlak o. An wene tu a’ge mesik hwelegistik, nede wathwerlasu legi o. Is enebe lo’bok enede nalagalat, is ’berlegat enalo’gwe selang eselat, is ’berlegat enanni erlak agalat, is ’berlegat enemie serap hogulat, tugu lema o, oluk, mo’gulontomup o. Asogo tagonobo a’ge ano til wema o, oluk, demat til wema o, oluk, ’gain An notok modok welago a’ge Allah enat egimu re, mo’gulontomup o, oluk, an mo’gulnesimu mo’gulentegis.
8Pobuk At Allah en wene mesik an mo’gulneselat e.
9Aphwami en dogo a’ge yu o. Allah en egei ano re yu o, oluk, mo’gulonto a’ge ano re, yuat o, wa’gun mesik ’gwia egei o! Wa’gun mesik ’gwia egei o! Wa’gun ai ’get a’ge ’gabelik oruak o, wa’gun e’gat merlelak a’ge pam mep herlelik oruak o.
10Aphwami warenebeil louwagoluk, wa’gun ’get modok ’gabelik welat, e’gat modok merlelak welat, takma re, o obinal tago ai ’gela’ge, wa’gun ai e’gat mep herlil-herlil oso yo.
An neiyagai is Yehuda a’ge bouwa’gun ’belak a’ge pam enede aganhan ema epegen? Wa’gun ai en di e, yu e, bouwa’gun ’belak a’ge pam hele’gik a’ge ano mi-miarak pasu o.
11Wa’gun ai, e’gat merak poluk, e’gikmu tenak welat tuagoluk modok arat hwalogo pegimu re, at ap aphwami warenebiso a’ge en wa’gun ai, e’gikmu tenakho welat, ’gerat lerisokhwe, e’gat pam mep herlil-herlil eselat, tago yo.
12Aphwami en dogo a’ge yu o. Wa’gun ai en an neiyagai Sebelogo enebasulat, is Israel onuelak ’gaindek ’berlegat sebelogo enebasulat, tuagoluk, ’belik oruakma re, iak logat eselat, lo’gu mariselat, taga lemin o wa’gun ai en is enemin, an neiyagai emin, hegitsogoat laikmu re, hede wathwerlasulat, ha’gul wathwerlasu lemin o.
13Is enebabut ’baligoluk, wa’gun ai perakpou weigatma re, at wa’gun en ebit epasulat is Yehuda onobouwa’gun ’belak a’ge ano pangtak poluk wolom mia holuk, no’gosogo ema no? Oluk, An notok modok welegi a’ge Allah enat egi o.
14Asogoatma re, aphwami en dogo a’ge yu o. Disogo takhonobouwa o, oluk, hiak anni pam mo’gulentasulat, he’gik dap tagalat, tip o. Wa’gun ai pam ’birenam noluk, mesik nasulat, tuak oluk, ukpomup o, wa’gun ai re, aphwami waronobu a’geat oruakma re, wa’gun ai pam en aphwami a’bigat waronobu a’ge welat, is en o’borl-o’borl eba erlagapsogo pil laik ani o. 15Is enede nal agalat, enebe a’bik werak ’gelil agalat, tuagoluk, an en, wa’gun ai pam wathenebik o, oluk ’goduk ’gwi lagai o’gwe ’berlegat edik enebil legesema oruak o, wa’gun ai o obinal yebekhasu ’gela’ge ebale hele’gikmu re, aphwami waronobuogoluk eigat pam mep herleliso ai modok nogorlogat o. 16At wa’gun ai ologun ligakhit en dungtak pei lasu o’gwe holuk e, eba akhirat warenebil lasulat, ye, ologun ’belagakhit o’gwe dungtak pasu holuk, ebayat warenebil lasulat, tuak o. 17Asogo tagokhwe an ogo re, ne’gik dap hasulat, nolot het agalat tago a’ge ano sebelogo pasulat, tik o, oluk, An Allah enat egimu re, mo’gulontomup o,” oluk, an mo’gulnesi o.
Ap ’gain Babel a’ge ua’gun pam en tu wene
18At Allah en an mo’gulneselat.
19-20“Aphwami en dogo a’ge yu o. Ap ’gain o Babel a’ge en ua’gun horloluk louwagoluk o mesik eba en ebela ’biren walsogo pomup o. Is aphwami Amon a’ge ono kota Raba sebelogo pei lo a’ge ’gebela yuat o, oluk, odo ’balogo pasulat, ye, mesik e is Yehuda emin, o kota Yerusalem pak annisogo wogo a’ge ano emin, sebelogo pei lo a’ge ’gebela yuat o, oluk, odo ’balogo pasulat, takpoluk, enaluksogo odo ’belak a’ge ai ’gebela babut ’birenma eba edikpomup o. 21Ap ’gain Babel a’ge lasulat, ’gebela adugwalma eba ’gebela ’gogwe lo no oluk aluk emagoluk, ogodok e’biang ’gebane agoma haik oluk pobi hasulat, at en a’ge asua mo’guleselat, wam wusogo emep ’gwelakhasulat, tua ai en egi ai o. 22Asogo tagalat, ogodok e’gik ’bekhit akhit oruak a’ge ano, e’biang hwalogo o Yerusalem akhit yethai lasu holuk e, o Yerusalem lai lotluk pakleget wogo a’ge ano hut-lat? tugulat, osilak en waronobo’gogulat, neneselei a’ge noweim yu a, oluk, ngai wai ogulat, ’goduk ’gwi lagaimu la’guk uak oluk, puk togulat? ’gwiloma ’gwiang palogo lagabil ligagalat, helep pak wogoma ’gwilo a’ge paget e ’berlatak pogulat tuagoluk mo’gulentaik o. 23Asogoat mo’gulentaik a’geat de, at iak oso holuk nak nenesa’go hologu lomok o, oluk, ho’buk ’balegisa ano en o Yerusalem sebelogo pei lo a’ge at en a’ge asua en mo’gulema a’ge ano re tu erlakma en, iageseiat mo’gulesimu hege o, oluk, opouwa a’geat de, ho’buk ’balegisa ano a’ge ano oruakhwe, muat mesik togwi holuk e, at ai enat tenak onoboluk, herle waronoboluk laik egei o.” 24Asogoatma re, At otok modok welago a’ge Allah en eselat, is at iak holu nenebit o, oluk, loksogo ogwi ai pam e, is wiak til laga legesa a’ge ano, aphwami enaluk emama re, til lagai ai pam enebe tenak onoboluk herle wusogo wogonoboluk laik oluk mo’gulnesimu en, mo’gulhentegis o.
25Ye, Allah iak pobirak po erlakma en wiak tiso a’ge o wiak o’go ologun pam takpo a’ge arat horok lau waga a’ge Israel onue ’gain ai re, 26At otok modok welago a’ge Allah en takpo egei ano re yuat o. At yogodak oruak ’gela’ge welema erlakma re, a’gul pam sum lo’boktak a’ge ano no’gorlogo hwikhasulat, e’gare-’gare ’buktak a’ge ano no’gorlogo hwikhasulat, tuak o. Is ap enede sebelak a’ge holuk logo pasulat, ye, enede logo oruak a’ge holuk e, modogat sebelak pasulat, tik o! 27Ye, disogo ema o! Yusogo ema o! An en o kota ai moluk-melaktak paikmu re, at omu en o kota eiye wolom a’ge ano paget tak pagathorlouwa a’ge ano owan wom erlakhwe ebalema woru erlakma en moluk-melak tagat welema o. Ye wago holuk nak e, eiye welemagoluk an en tak paik, mo’gulemin o, oluk, egeimu re, mo’gulhegis o, oluk, mo’gulegis.
Allah ua’gun e Babel atma re Amon a’ge takpouwa wene
28 #
Yer. 49:1-6; Yeh. 25:1-7; Amo. 1:3-15; Zef. 2:8-11 Aphwami en dogo a’ge yu o. Is Amon a’ge en togwi ano pam, eniak mi-miarak pogwi ano pam At otok modok welago a’ge Allah en tagonobo a’ge egei ano re, yuat o, oluk, mo’gulonto ano re yuat. Wa’gun mesik lekhesi o! egei o! wa’gun mesik lekhesi egei o! Aphwami warenebik oluk, arat ’gegilik welat, nil lasulat, o obinal yebekhasu ’gela’ge, enetluk lasulat, tuagoluk, e’gat mep herlelik, welat, tago oruak o. 29His takhonobo a’ge nabi disogo hegi o, oluk, mo’gulontogwi ano re, eniageseiat mo’gulontogulat, ye, hin wok a’ge pam mo’gulontogwi a’ge ano muat oruakhwe mo’gulontogumu re, eniageseiat mo’gulontogulat togumu re, is ap wiak togwi a’ge waronobu erlige horok lau wagalat, ologun pam wiak o’go tagonobo a’ge horok lau wagalat, tagoam wa’gun ai, is ap wiak togwi a’ge ano ono’gorlop pam dungtak oruak o.
30At ua’gun ’belik oruak ano re, ’gerelak oruakma pei louwak o. At dak agalat a’gul onuk lok agalat, suema ebano an en at uak lologo wiak o’go tak paik ani o. 31An nolot het ebam pasulat, nolot het odouk ’gela’ge ebam pasulat, At ebe wokho ap enebabut wiak a’ge aphwami enebe erlagapsogo onobo ’gwi a’ge ano arat enaluk a’ge ano ene’gikmu pasulat, tago yo. 32At ebe ai re, e ’gelak ’gelageatma re, odouk en nasulat, emep ai re, o ’gwiangma eba herlilogo-dal agalat ye, at onuk eberak wolom erlakma en memeragat pasulat, tik o, oluk, An Allah enat egi o, oluk, egeimu re, mo’gulhegis o, oluk mo’gulegis.
Currently Selected:
Yehezkiel 21: Wul
Highlight
Copy
Compare
Share
Want to have your highlights saved across all your devices? Sign up or sign in
