Ulangan 9
9
Aphwami Israel a’ge en Allah iak hwelak poluk tu erlakma en tigisa wene
1At Musa en asogo mo’gulentesirik, mesik disogo mo’gulentesi,
“His aphwami Israel a’ge yu narilak norokhwi. Henesa’go opsogo hwelit o. O yogodak e, aphwami ena’gul onuk his henemin hegit modok erlak o. We, is ena’gul onuk logat, ye, enanni modok a’bik a’ge onowi pam sebelo ’gurik wolomogoluk ik Yordan ’balogo leborogup ai o. Is onowi kota re, modok lok a’ge, leget helep pam modok yat e, ’bogorl pam hegit werik oruak o. 2Ye, aphwami enebe enebagase modok lok a’ge re, enanni modok a’bik a’ge, oruakma, aphwami pema en e,
Is ai enemin weim obogulat mabenap onobo modok mia o, oluk onobok ogukhwe henesa’go domok hweligep ani o. 3Asogo a’geat de, yogodak at Nenaik ’gain Onuk Logo a’ge Allah ebe odouk ano en di a’ge yu a’ge odouk en perlengsogo nil lasu ai ’gela’ge, honorogole akhit naduk-naduk lasulat is aphwami ai modok mabenap onoboluk lagaimu henil domok hagubat ani o. Asogo mabenap onoboluk lagaimu, his, at Nenaik ’gain Onuk Logo a’ge en,
Pobuk disogo tul, oluk wene werakhenebesi hegitsogoat, his en is aphwami ai mugontogulat, erlagap onobogulat, perleneat togup ani o.
4-5At Nenaik ’gain Onuk Logo a’ge en his henebaget is asogo mugentasuam, his henede en e,
Nis modok op o. Nenaik ’gain Onuk Logo a’ge agai a’ge nak togu lege pam, at en nis o yema woknonto hegitsogo woknentesi hegi, oluk epagup no yo. Asogo togu legep modok erlak a’geat o. Nenaik ’gain Onuk Logo a’ge en aphwami eba mugontouwa ai re, is enebabut modok wiak togwi ai enat o. Nenaik ’gain Onuk Logo a’ge en e, nis nene’balak Abraham emin, Isak emin, Yakub emin, mo’gulentasulat e,
Asogo wokhentaik, oluk wene weragenebesi a’ge ano emin louk uagoluk ede epesi ai en e, o eba his sebelo ’guagoluk wokhontouwa o. 6His honogola en e,
Nenaik ’gain Onuk Logo a’ge en o ’gwiang modok moli opma eba nis eiye om a’ge hegitsogoat eiye emagoluk woknentesi puk. Modok erlak, oluk pobi tip o. His e, hena’gul modok helep ’gela’ge welat aphwami eniak hologo tu modok erlak ano hisat o.
7His en o Mesir ukpoluk o leimu aphwami enebe erlakma wagalat e, ’bekhit o yema wegep hwerli en, Nenaik ’gain Onuk Logo a’ge Allah olot het emagoluk emin weim ’gela’ge til wegep ano henede eberip o. 8Henebabut asogo til wagalat, dom Sinai pam welat, Nenaik ’gain Onuk Logo a’ge olot het emagoluk modok ebenagaikmu at tigepma, at en his henebe modok erlagap henebaigoluk egei ai o. 9#Kel. 24:18Asogo takhenebesi ai re, Nenaik ’gain Onuk Logo a’ge en wene wusogo woknenebegei wene helep ebak a’ge pam pelal wokho pesi a’ge waigoluk dom pam ligegirik agauwa 40 pam so’boru emin, ik emin modok no erlakma en eba welegi ani o. 10His henebe dom edipmu odoktak oruakhwe, at Nenaik ’gain Onuk Logo a’ge ebe odouk magale ogola welat iak nenesa’go wusogo at u’gwarek e’gik enat helep ebak a’ge ’biren a’ge pam pelal asogo wokho pesi a’ge an woknesi ai o. 11Asogo woknesi ai re, agauwa 40 arat welegirikmu en wene wusogo woknenebegeitik helep ebak a’ge ’biren eria pam pelal wokho woknesi ai o.
12Asogo woknesirik, at Nenaik ’gain Onuk Logo a’ge en e, disogo mo’gulnesi,
Aphwami o Mesir en wogonoboluk wegen a’ge ebano en wiak modok tigisa ai en e, hat perlene ’bin o. Is en e, an en,
Disogo togu lomup, asogo togu lomup, oluk henesa’go weregis a’ge ano perleneat sagalogo ukpegesarik e, dogwi erliktogu lomogoluk mesik werigisa o, oluk mo’gulnesi ai.
13Asogo mo’gulnesirik, mesik disogoat mo’gulnesi,
Aphwami eba enebabut e, niak hologo tu mia welat ena’gul modok helep ai an naluk o. 14Holuk e, is eba aphwami en enebe memerak pouwagoluk, an en is modok erlagap paigoluk epasu legi ai re, hat en an ne’gebela ’gwe ’balogun o. Is modok erlagap onoboluk, hat nak e, is aphwami Israel a’ge ena’gul onuk weiyat enanni erlak ai ’gela’ge erlak. At e, hat en dogo’gwe a’ge ena’gul onuk lok enanni a’bik a’ge enaigat takhebaik o, oluk mo’gulnesi ai o.
15Asogo mo’gulnesimu holholuk, togolik edenogo ’bu eigoluk e, at en wene nenesa’go wusogo woknenebegei wene helep ebak a’ge ebe ’biren a’ge pam pelal wogo a’ge ano ne’gik pema-pema woluk dom ano odouk magale ligagokhwe ’bu egi o. 16Asogo ’bu agalat nil ’gwelakhentegis ’gal e, his en Nenaik ’gain Onuk Logo a’ge Allah en,
Disogo togu lomup, asogo togu lomup, oluk nenesa’go weregei wene ano sagalogo re, honu’gwarek paget, dogwi emas a’ge odouk pam erleberak poluk sapi ’gela’ge Nenaik ’gain Onuk Logo a’ge ilem modok wiak tigepma nil hegi ai o. 17Asogo hegirik e, Allah en wene wusogo woknenebegei wene helep ebak ebe ’biren a’ge pam pelal wogo a’ge ano henilem lekholuk ’bo pegi ’gal e, modok ’goluk-’gelaksogo mesik-mesik yarluk egei ai o. 18Asogo ’bo poluk e, pobuk dom pam ligotluk, Nenaik ’gain Onuk Logo a’ge ilem nodogorlu pam hurotluk erliktago modok agauwa 40 pamat, ik emin, so’boru emin, no erlakma en ’bonuk welegi ai o. Ye, asogo tegis ai re, at Nenaik ’gain Onuk Logo a’ge en e,
An nilem modok wiak tigep o, oluk egeitik e, olot het a’bik aga. 19#Ibr. 12:21Nenaik ’gain Onuk Logo a’ge en, odouk magale modok lobuk iogoluk tiso ai ’gela’ge, at olot het his henebam modok het otluk henebe modok erlagap henebigoluk tegei ai, an nogorlok a’bik aga o. Asogo a’geat de, pobuk mo’gulegis ai ogo re, Nenaik ’gain Onuk Logo a’ge en an niak esa’go hwelegeiat o. 20At Nenaik ’gain Onuk Logo a’ge en olot het Harun ebam poluk, ebe modok werigoluk tegei a’ge de, an en at ebaget se’banat egi ai o. 21Asogo tegistik, his hene’gik en emas a’ge erleberak poluk dogwi asua wiak a’ge sapi ’gela’ge werigep a’ge ai an en odouk olomu ’gwelebak poluk narlik pegi o. Asogo narlik pasuam ne’geimu re, damulogo modok ’gwiang aling ’gela’ge agama re, ik elaruk dom pam en ’bulogo ’bu ago a’ge ai olomu hwikhegi o.
22 #
Kel. 17:7; Bil. 11:3,34 Ye, his o Tabera emin, Masa emin, Kibrot-Taawa eba welat, at Nenaik ’gain Onuk Logo a’ge olot het uagoluk wiak tigep ai o. 23#Bil. 13:17,31; Ula. 1:21,26; Ibr. 3:16Asogo toluk, at Nenaik ’gain Onuk Logo a’ge en his o Kades-Barnea eba ukpoluk, o his wokhentaikmu eba wolomogoluk wagalat, Nenaik ’gain Onuk Logo a’ge en,
Disogo sebeli ’gwilu oluk mo’gulhentesi a’ge ai,
Demat mo’gulnentesi, oluk hwelak poluk tu henebit en iak sagalogo wiak tigep ai o. 24An his henebabut pageat naluk agarikmu en, Nenaik ’gain Onuk Logo a’ge iak sagalogo togwi modok welegep o.
25Asogo togu legep ai en, Nenaik ’gain Onuk Logo a’ge en henebe erlagap henebigoluk tegei ai an naluk o. Asogo tegei ai en, an Nenaik ’gain Onuk Logo a’ge ilem nodogorlu pam hut otluk agauwa 40 pam welat, se’ban disogo eselegi.
26Naik o. ’Gain Honuk Logo a’ge ereiya logo welegen a’ge naik. Hat hu’gwarek heiyagai ai is aphwami Mesir a’ge en eneragam a’ge tenentarok oruakma hanni a’bik a’ge pam, delogo wogonoboluk liplau wegentik ai re, enebe erlagapsogo pagun no yo. 27Hat en is aphwami Israel a’ge enebabut modok wiak eniak hologo tu mia ena’gul helep ’gela’ge welat wiak modok togwi a’ge ai hilen wogonobogun modok erlak o. We, is heragam a’ge en Abraham emin, Isak emin, Yakub emin, is ai nak enebam hede eberip o, naik. 28Hat heiyagai ai, enebe modok erlagap enebagun holuk e, aphwami Mesir a’ge en disogo mo’gulhema ani,
Allah en e, eiyagai o is wogentaigoluk wene weragenebesimu ebano welemagoluk, enebe wogonoboluk laga ebano re, at en wogonoboluk lo mia agama re, enebe apseri en o leimu aphwami erlakma eba en warenebigoluk wogonoboluk lagama hegi, oluk mo’gulhema ani o. 29Ai en e, hat hogola eberin o, naik. Is heiyagai ai, hat heiyagai emagoluk poligenebegentik, hanni modok lok ai pam is o Mesir en wogonoboluk waga legen ai hede eberin o, naik, oluk mo’gulentegis ai o,” oluk mo’gulentesi.
Currently Selected:
Ulangan 9: Wul
Highlight
Copy
Compare
Share
Want to have your highlights saved across all your devices? Sign up or sign in
