Ulangan 8
8
Allah en nene’balak ’gwiang op a’ge wogentaigoluk wene weragenebesi o, oluk mo’gulentesi wene
1At Musa en asogo mo’gulentesirik, mesik disogo mo’gulentesi,
“Nenaik ’gain Onuk Logo a’ge en, nis nene’balak o his wolorogupmu eba is wogentaigoluk wene weragenebesimu eba, his opsogo henelaluk welat henebe a’bik orogup ai en e, at en e,
Disogo togu lomup, asogo togu lomup, oluk egei wene ai his yogodak mo’gulhentegis ai ’berlegat henebit om erlakma en hegitsogo togu lomup o. 2At Nenaik ’gain Onuk Logo a’ge Allah en e,
His henede opoluk no’gosogo togup. Wene an en,
Disogo togu lomup, asogo togu lomup, oluk henesa’go weregis wene ai hwelak poluk hegitsogo togu lorogup a? Erlak a, oluk henebabut ’baligoluk, ebela walegat o leimu aphwami erlak o’gwe wokhonoboluk wagaihwe, 40 tahun aga ai henede eberit o. 3#Mat. 4:4; Luk. 4:4Asogo wokhonoboluk wagalat, his so’boru nele welemagoluk takhenebesirik, so’boru manna his emin, hene’balak emin, oduk heneperlak en no erlak a’ge nouwagoluk wokhentesi ai o. At en asogo takhenebesi ai re, disogo mo’gulhentaigoluk,
Aphwami so’boru nak no’gulat, enelaluk modok welagai erlak o. We, an henaik ’gain Nonuk Logo a’ge niak oso a’ge ai ’berlegat wogwi holuk, henelaluk modok wolorogup o, oluk mo’gulhentaigoluk tegei ai o. 4Holuk e, 40 tahun eria pam welat, his honosum modok derlep eselat, honoyuk periselat, tu erlak o. 5Henaik ’gain Onuk Logo a’ge Allah en e, ap en enemalik enesa’go worogwi ai ’gela’ge takhenebil waga ai henede eberit o. 6Holuk e, at Nenaik ’gain Onuk Logo a’ge Allah en,
Disogo togu lomup, asogo togu lomup, oluk henesa’go weregei wene ai hwelak poluk hegitsogo togulat, honogorloksogo togu lomup o. 7At Nenaik ’gain Onuk Logo a’ge en his wokhonoboluk o ’gwiang modok moli opma, ik lok a’ge emin, wei a’ge elaruk egeik emin, a’bikmu, ik ’gwiang ogola’gwe en houwalogo o do’go ’berlegat ’gwelabil lasulat, dom petne ’gwelabil lasulat, tagoma eba wokhonoboluk louwa o. 8O eba re, di gandum yu gandum emin, jelai emin, anggur emin, e ara emin, e delima emin, e zaitun emin, e’gen modok a’bik eselat, ’gin a’bosu a’bik welat, tak oruak o. 9O eba his so’boru nele agalat, di a’ge yu a’ge erlak agoam henerlagaik welat, togu lorogup erlak o. Ye, helep ia ogola eba ’besieme’gen edip eba wogulat, dom petne en ’gwiang delogo tembaga wa’gogulat, togu lorogup o. 10Asogo welat, honso’boru honogum ningsogo modok no’gulat, Nenaik ’gain Onuk Logo a’ge Allah en ’gwiang moli modok op a’ge wokhontouwa a’ge ai paget at hau worogulat, togu lorogup ani o,” oluk mo’gulentesi.
“Nenaik ’gain Onuk Logo a’ge ebe memerak po erlakma en henede eberak wolomup o,” oluk, enede ebesogo mo’gulentesi wene
11 #
Hos. 13:5,6 At Musa en asogo mo’gulentesirik, mesik disogo mo’gulentesi,
“His en Nenaik ’gain Onuk Logo a’ge ebe memerak pagupno oluk henebabut heberlogo wolomup o. At en,
His disogo togu lomup, asogo togu lomup, oluk egei a’ge yogodak mo’gulhentasu legi a’ge ai ’berlegat, his en logon hwelak poluk hegitsogo tu erlakma en honogola en si-seram takpoluk wolorogup no yo. 12Honso’boru honogum ningsogo no’gulat, honowi henebe wolomma opsogo worogulat, 13honuam sapi, kambing, domba emin, hono uang, emas, perak emin, hena’ge-a’ge pam logon emin, modok a’bik agalat, tago holuk, 14honu’gwarek en erlikhorlogulat, at Nenaik ’gain Onuk Logo a’ge en his henebe aphwami Mesir a’ge en eneragam a’ge tenhentarok oruakma delogo wokhonoboluk liplau waga a’ge ano ebe memerak pogulat, tuno oluk e, henebabut heberlogo togu lomup o. 15At Nenaik ’gain Onuk Logo a’ge en his henebe ebela ’go yu, o lei lok aphwami enebe modok erlakma, onogorlokma, herlegetie aphwami warenebiso a’ge emin, erlelim ’gela’ge iak orluk a’bik a’ge emin, modok a’bikmu wokhonoboluk waga laga ai o. Ik modok erlakma ’gwiang a’bosu modok erlakma wokhonoboluk wagalat, his honogum ningsogo nagup en ik helep ogola a’ge elaruk hwalogo wokhentasulat, til waga laga ai o. 16O leimu aphwami erlakma yema en so’boru manna his hene’balak enil ho erlak eneperlak a’ge his nouwagoluk wokhentil waga laga ai o. Asogo takhenebil waga laga ai re, ologun pam obaphenebaigoluk, henebabut ’baliselat, henede en logo poluk erlikhorlo erlakma en sebelak poluk togu lemagoluk takhenebasulat, til waga laga o.
17Holuk e, his en e,
Nis nonu’gwarek nenanni pam en herasogo nenebe ’gain nenilmu oruak a’ge ’gela’ge pagathorlogu lege, oluk henede epagup o. 18We, Nenaik ’gain Onuk Logo a’ge Allah en di a’ge yu a’ge yema woknentasu hegi, oluk henede eberak wolom o. At en nene’balak mo’gulentasulat,
An en his disogo takhenebasu leik, oluk wene wusogo wogenebegei ai en, asogo takhenebasukhwe modok hwerli yogodak ogo henebam modok eberagat oruak ai o.
19Nenaik ’gain Onuk Logo a’ge Allah ebe memerak po erlakma en ebam eberak modok welat, honogola en, mu a’geat paget,
Nenaik ebe aiat, oluk erliktogulat, henebe at eragam a’ge agalat, togup no yo. Asogo a’geat de, his en erliktogup holuk, at Nenaik ’gain Onuk Logo a’ge en henebe modok erlagap honobua, oluk henede eberak wolorogup en yogodak mo’gulhentegis ai o. 20At Nenaik ’gain Onuk Logo a’ge Allah iak hwelak poluk hegitsogo togwi erlak holuk e, at en aphwami ena’gul onuk mu a’ge his henilem enebe modok erlagap enebaik ai ’gela’ge, henebe modok erlagap henebaik o,” oluk mo’gulentesi.
Currently Selected:
Ulangan 8: Wul
Highlight
Copy
Compare
Share
Want to have your highlights saved across all your devices? Sign up or sign in
