Ulangan 10
10
At Musa en e, Allah en wene 10 pam nenesa’go wusogo pobuk wogesi a’ge mo’gulentesi wene
1At Musa en asogo mo’gulentesirik mesik disogo mo’gulentesi,
“An asogo se’ban Nenaik ’gain Onuk Logo a’ge mo’gulegismu, pobuk at en e, disogo mo’gulnesi,
Musa, helep ebak a’ge ’biren naduk ’baligen eriano ’gela’ge ’bale’bin o. ’Balogun holuk e, owi peti e a’ge mesik heli’gogo woluk ne’bek dom a’gul pam orlu manup o. 2Helep eria pam e, helep pam naduk pelal wegi a’ge hat en ’goluk-’gelaksogo hwikhegen ano ’gela’ge an asogoat pobuk pelal waik o. Asogo waikmu re, helep eria re, peti ai ogola yagasogo pomup o, oluk mo’gulnesi ai o.
3Asogo mo’gulnesimu re, an ’bu egirik e, peti e onuk akasia ai a’ge hele’giselat, helep ebak a’ge naduk ’biren ’balegis ’gela’ge ’balogo pasulat, tegistik e, woluk dom pam ligegi ai o. 4Asogo woluk ligegimu, his henebe dom ai edipmu odoktak oruakhwe, o ai erlige at Nenaik ’gain Onuk Logo a’ge ebe odouk magale e’gerlakma welat,
Disogo togu lomup, asogo togu lomup, oluk wene ebe 10 pam nenesa’go weregei wene ai pelal naduk wesi ’gela’ge togolik wesirik e, helep ai an woknesimu woluk dom pam en togolik ’bu egi ai o. 5Asogo woluk ’bu egirik, Nenaik ’gain Onuk Logo a’ge en,
Disogo tip o, oluk mo’gulnesi ’gela’geat, helep ebak a’ge ’biren eriano peti heli’gogo pegi a’ge ai ogola yagasogo pegi. Asogo pegi eria hwerli en ’bekhit, o yogodak hwerli ogo ebayat welago yo,” oluk mo’gulentesi.
6 #
Bil. 20:28; 33:38 (Pobuk is aphwami Israel a’ge ano aphwami Yaakan a’ge enegeik omugwe pelakma en e, aphwami Mosera a’ge onowi pam wegesa. Wegesarikmu en Harun ebe waragama ebe werak ’gwiang ’balogo saligisarik, at omlogo Eleazar aik ebalema ebe Allah eiye welemagoluk edikpegesa o. 7Asogo edikpegesarik, o eba en o Gudgod wegesarik en ’bekhit o Yotbata enegeik a’bik oruakma eba wegesa. 8#Bil. 3:5-8Wegesema, at Nenaik ’gain Onuk Logo a’ge dom ai pam en aphwami ena’gul onuk Lewi a’ge at ebaget togulat, peti at en wene wusogo woknenebegei a’ge ogola yagarak a’ge ai paget wene le’gelogulat, at en aphwami logon obap enebise lemagoluk onuk ’balogo mo’gulentasulat, togu lemagoluk enebe at u’gwarek paget pagathwerlesi ai o. Asogo pagathwerlesimu, is yabuk ai a’ge togwi modok hwerli yogodak ogo togwiat welagai o. 9At Nenaik ’gain Onuk Logo a’ge Allah en aphwami ena’gul onuk Lewi a’ge mo’gulentasulat e,
“His ’gwiang wokhontoma eiye om ’gela’ge re, an nebeat eiye wolorogup ani o,” oluk mo’gulentesi hegitsogoat, is aphwami ena’gul onuk Lewi a’ge ai enebe Allah eiye welat, ’gwiang is ena’gul onuk mu a’ge en eiye aga legesa ai ’gela’ge, is logon eiye aga legesa modok erlak o.)
10 #
Kel. 34:28
At Musa en asogo mo’gulentesirik mesik disogo mo’gulentesi,
“An naduk agauwa 40 en dom pam welegi ’gela’geat welegi ai o. Asogo oruakma, at Nenaik ’gain Onuk Logo a’ge en an niak pobuk mesik hwelegeirik,
His henebe erlagap henebaik erlak o, oluk naduk egei ’gela’geat egei ai o. 11Asogo egeitik, an en o nis nene’balak wogentaigoluk wene weragenebesimu eba wokhonoboluk woma his ’goluk eiye orogup oluk yo’go nebesi ai o,” oluk mo’gulentesi.
Nenaik ’gain Onuk Logo a’ge en, “An nebaget disogo togu lomup o,” oluk mo’gulentesi wene
12Asogo mo’gulentesirik, mesik disogo mo’gulentesi,
“His aphwami Israel a’ge, narilak norokhwi. Yogodak Nenaik ’gain Onuk Logo a’ge en e,
His en disogo togu lomup o, oluk mo’gulhentasu a’ge aiat togu lomup o. Nenaik ’gain Onuk Logo a’ge Allah honogorloksogo welat, at en,
Disogo togu lomup, asogo togu lomup, oluk nenesa’go weriso wene ai ’berlek hegitsogo togulat, togulat e, henebe emin, henede emin, henebabut emin, mesigat otluk Nenaik ’gain Onuk Logo a’ge henede modok hwedik welat at ebaget togu lomup o. 13Nenaik ’gain Onuk Logo a’ge en e,
Disogo togu lomup, asogo togu lomup, oluk nenesa’go weregei wene yogodak mo’gulhentegis a’ge ai ’berlegat his honu’gwarek op orogup en e, hologo modok togu lomup o. 14’Bogorl likho welago ai Nenaik ’gain Onuk Logo a’ge Allah en a’geat o. Ye, ’gwiang ebe emin, di a’ge yu a’ge ebam welago a’ge ’berlegat emin, at en a’geat o. 15Asogo a’geat de, Nenaik ’gain Onuk Logo a’ge en nis nene’balak edeap enebegei ai nak e, modok logat o. Asogo edeap enebegei ai en, aphwami nena’gul onuk nis a’ge is ena’gul onuk lo’bok logon a’bigat ene’gerlakma en ’gegilogo poliknenebesi a’ge yogodak nenebe at eiyagai poliknenebesi a’ge modok welege ai o. 16Holuk e, hwerli yogodak ya en, at iak hologo tu erlakma en hena’gul helep ’gela’ge togup o. We, heneiyagai ap a’ge enagap ene’gerlimu a’ge ’balonobogu legep ai ’gela’ge, honu’gwarek henede degelogoat iak hologo togu lomup o. 17#1Tim. 6:15; Wah. 17:14; 19:16; Per. 10:34; Rom. 2:11; Gal. 2:6; Efe. 6:9At Nenaik ’gain Onuk Logo a’ge Allah re, aphwami logon en mu a’ge enebaget,
Nenaik ebe aiat, oluk ogwi a’ge ’berlegat emin, di a’ge yu a’ge anni oruak a’ge ’berlegat emin, mia ’gela’ge anni erlak a’ge oruakhwe re, at nak e, modok lok logo anni modok a’bik welago. Ai en e, at iak hwelak poluk hegitsogo togulom o. At e, is pema oruak o’gwe nak agalat, pema ebit welat, is oruak akhit emagoluk o’go hisakho wogogwiam wasulat, tago modok erlak o. 18At e, malik se’bin a’ge emin, hwami sugwe a’ge emin, aphwami mu a’ge en wiagap onobo erlakma en hegitsogo tagonobogu lemagoluk is oruak akhit ago yo. At en, aphwami ’bok a’ge nis nenemin welagai a’ge ai ede modok welat, onso’boru no a’ge emin, onosum ’bukhorlo a’ge emin, wogentasu o. 19Ai ’gela’ge his ogo re, aphwami Mesir a’ge onowi pam henebe ap ’bok ’gela’ge welegep ai en e, aphwami ’bok a’ge ai henedesogoat lerontogu lomup o.
20His en e, Nenaik ’gain Onuk Logo a’ge Allah honogorlok welat, at ebaget nak togu lomup o. His henebe at ematek ebam he’berik welat, at onuk nak ’balholuk ho’buk ’balogu lomup o. 21Nis nenaik e, at Allah at ai en e, arat erliktogulom o. At en his pobi tuagoluk elalin a’ge modok loksogo tagalat, onogorlok a’ge tagalat, tisokhwe his henil domok hegep ai o. 22#Kej. 15:5; 22:17; 46:27 Nis nene’balak o Mesir legesa ai enebe weiyat 70 nak legesa a’geat de, Nenaik ’gain Onuk Logo a’ge Allah en nenebe a’bik emagoluk taknenebesimu re, yogodak nenebe hwerli a’bik e, hwesagal ’bogorl pam welago ai ’gela’ge welege ai o,” oluk mo’gulentesi.
Currently Selected:
Ulangan 10: Wul
Highlight
Copy
Compare
Share
Want to have your highlights saved across all your devices? Sign up or sign in
