Ulangan 7
7
“Nenebe Allah en poliknenebesirik yo’go nenebesi,” oluk mo’gulentesi wene
1 #
Per. 13:19
At Musa en asogo mo’gulentesirik, mesik disogo mo’gulentesi,
“Nenaik ’gain Onuk Logo a’ge Allah en o his pobuk wolorogupmu eba wokhonoboluk loluk, aphwami ena’gul onuk a’bik a’ge lebigonobua o. Lebigenebasulat e, ena’gul onuk sabiren ai re, his ’gela’ge erlak. We, is ena’gul onuk e, logat, enanni a’bik a’ge, mukho lebigonobua o. Is ai re, ena’gul onuk Het a’ge emin, Girgasi a’ge emin, Amori a’ge emin, Kanaan a’ge emin, Feris a’ge emin, Hewi a’ge emin, Yebus a’ge emin, mukho lebigonobua o. 2Nenaik ’gain Onuk Logo a’ge Allah en is aphwami ai his hene’gik pam onoboma, his en is mabenap onoboluk enebe henede en logon ugonoboluk,
Nenemin hwedik wolomok o, oluk wene weragonobo modok mia o. We, enebe modok perlengsogo warenebip o. 3-4Is en e, his heneiyagai Nenaik ’gain Onuk Logo a’ge emin hwedik a’ge ’goboksogo ukpoluk, is en,
Nenaik ebe yuat, oluk, is en a’ge erliktuagoluk mo’gulontogu lemano oluk e, his en, is onogulani a’ge wogonobogulat, his honogulani a’ge is elit wogonobu oluk ogulat, tu modok mia o. His en dogwi asua ai erliktogup holuk, Nenaik ’gain Onuk Logo a’ge en olot het emarik e, his henebe perleneat erlagap honobua ani o. 5#Ula. 12:3Ai en e, is en a’ge onodogwi enasua uam warotluk narlogwi e’gen a’ge ebale werik a’ge ano modok moluktogulat, helep a’ge daintak poluk, modok asua oluk opogwi a’ge ai harlok-herlaksogo hwikhogulat, onodogwi ebe hwe a’ge Asyera ogut hele’gik a’ge ai moluk-melaksogo hwikhogulat, dogwi asua a’ge wusogo poluk erliktogwi a’ge ai odouk narlogulat, til lu o. 6#Kel. 19:5; Ula. 4:20; 14:2; 26:18; Tit. 2:14; 1Pet. 2:9His henebe Nenaik ’gain Onuk Logo a’ge eiyagai ’gain orogup en e, di aphwami yu aphwami ’gwiangma welagai a’ge ’berlegat ena’gul onuk lo’bok ene’gerlakma en wenakho ’gegilogo henebesirik yo’go henebesimu henebe eiye Nenaik ’gain Onuk Logo a’ge Allah at ai en e, ’berlegat asogo til lu o.
7His henebe Nenaik ’gain Onuk Logo a’ge ede hwedik modok en polikhonoboluk yo’go henebesi ai re, henebe aphwami logon ena’gul onuk lok welagai ai ’gela’ge welegep puk. Erlak o. His hena’gul onuk we, modok weiyat welegep a’geat o. 8Asogo a’geat de, Nenaik ’gain Onuk Logo a’ge henebe modok ede ai en e,
Disogo takhonobua, oluk nene’balak wene weragenebesi a’ge ano, ebe dipsogoat louk uagoluk henebe polikhonoboluk yo’go henebesi o. Asogo yo’go henebesi ai en, his henebe aphwami Mesir a’ge onue ’gain onuk logo a’ge Firaun eragam a’ge ’gela’ge welemagoluk tenhentarok oruakma, Nenaik ’gain Onuk Logo a’ge anni modok a’bik ai pam delhenebegeitik wokhonoboluk liplau waga ai o. 9#Kel. 20:5,6; 34:6,7; Bil. 14:18; Ula. 5:9,10Nenaik ’gain Onuk Logo a’ge Allah emetik-emategat welat, ebabut wene wusogo woknenebegei a’ge hegitsogo nak tago a’ge ai pam eberak modok-modok wolomup o. Aphwami Nenaik ’gain Onuk Logo a’ge ebe enede hwedik welat, at en,
Disogo togu lomup, asogo togu lomup, oluk nenesa’go weregei wene ano hwelak poluk togwiam at enebe ede en lerentasu modok oruakma, wene werak nenebesi a’ge ai ebe dipsogo modok louktak enebasukhwe eneiyagai 1.000 hwerli dagetil laga lema ani o. 10Asogo a’geat de, is aphwami at ebit a’ge ai edeap onobo erlakma enat perlenesogo wene enebam pouwa o. 11Holuk e, wene his togulom a’ge yogodak mo’gulhentegis a’ge ai, ’berlegat hwelak poluk hegitsogo togu lomup o,” oluk mo’gulentesi.
“His wene hwelak poluk hegitsogo togu lorogup holuk e, Allah en obaphenebise lema ani o,” oluk, mo’gulentesi wene
12 #
Ula. 11:13-17
At Musa en asogo mo’gulentesirik, mesik disogo mo’gulentesi,
“Allah en,
Disogo togu lomup, asogo togu lomup, oluk nenesa’go wusogo mo’gulnentesi a’ge ai, his en pobirak poluk, henebit om erlakma en togu lorogup holuk, Nenaik ’gain Onuk Logo a’ge Allah en,
Disogo takhenebaik, oluk wene werakhenebesi a’ge ano ebit om erlakma enat ebe dipsogo louktak henebasu lema o. At en e, nene’balak mo’gulentasulat,
Henebe modok nede weleik o, oluk wene wusogo wogenebegei ai ’gela’ge, his asogo edeap henebiso modok welema o. 13At en, his edeaphonoboluk, obaphenebiso modok oruakma re, his heneiyagai a’bik dagonobogukhwe enebe seik-’beik ogu lema o. Ye, his heniabukmu di a’ge yu a’ge yogo a’ge obap pasuam, gandum emin, anggur emin, zaitun e’gen a’bosu minyak na’gogulom a’ge emin, e’gen a’bik ese lemaat ani o. Ye, at en e, hene’gikmu a’ge obap pasuam, honuam sapi emin, kambing emin, domba emin, a’bigat ema o. Nenaik ’gain Onuk Logo a’ge en nene’balak mo’gulentasulat e,
Disogo wokhentasu leik o, oluk wene weragenebesi hegitsogoat, his o wolorogupmu eba oruakma ’berlegat wokhentasuam asogoat wogu lorogup ani o. 14At en e, his di a’ge yu a’ge a’bik ebam louk-louk wokhentasukhwe wogu lorogup ai ’gela’ge, aphwami ena’gul onuk lo’bok ’gwiangma yema welagai a’ge ai logon wogentasukhwe wogu lema modok erlak o. His henebe ’berlegat emin, honuam ’berlegat emin, logon modok abeli ema erlagat o. 15His henebe Nenaik ’gain Onuk Logo a’ge en ’gwelakhentarok oruakhwe re, at en, aphwami Mesir a’ge ou enebam pasulat, di wiak yu wiak enebam pasulat tisokhwe, his henil domok hogu legep ano ’gela’ge mesik henebam pouwa modok erlak o. We, is aphwami henemin selei a’ge ai enebam pasu lema ani o. 16Asogo pasuam Nenaik ’gain Onuk Logo a’ge en, aphwami ena’gul onuk lo’bok enebe hene’gik pam pouwa a’ge ai enebe logon henedeap onobu erlakma en modok erlagap onobogu lomup o. His en is aphwami ai en,
Nenaik ebe aiat o, oluk ogwi a’ge ai en erliktogwiam, ’baik herle pam ’gotnok oso ai ’gela’ge his henebe ’gotnok ogup ani o.
17His honogola en e, aphwami ena’gul onuk lo’bok ai enebe modok a’bigat ai,
Nis en mugonto re, mia, oluk opogu legep hwi a. 18Asogo opo erlakma en, is honogorlok wolorogup o. Nenaik ’gain Onuk Logo a’ge Allah en ap ’gain Firaun Mesir a’ge emin, aphwami at en eragam enebasu laga a’ge ’berlegat emin, tagenebasukhwe henil domok hogu legep ano henede eberip o. 19Nenaik ’gain Onuk Logo a’ge en, aphwami Mesir a’ge tenhentarok oruakhwe wokhonoboluk liplau weigoluk annisogo modok a’bik tagalat, di wiak yu wiak modok wiaksogo enebam pasulat, elalin a’ge a’bigat tagenebasulat, tegei ai henede eberit o. Is asogo tagenebesi ’gela’ge aphwami henemin selei a’ge ena’gul onuk lo’bok ’berlegat honogorlok welegep a’ge ai, asogoat tagenebaik o. 20Nenaik ’gain Onuk Logo a’ge en ’gin ’gela’ge perakpasuam onogorlok en e, yogunat togu lemarik, is logon hweiye hisak lai louwa a’ge enebe alemaremaat ani o. 21Holuk e, aphwami ai honogorloksogo wolorogup o. Nenaik ’gain Onuk Logo a’ge Allah lok modok onogorlok a’ge en tenhentarok modok welema o. 22Wam seiye iak anni wiak a’ge a’bik wotluk wiagaphonobuano oluk, aphwami heneselei a’ge ai mesik erlige perleneat lebigonobo mia o. We, weiyat mukho lebigenebil enebil, arat lebigonobua o.
23Nenaik ’gain Onuk Logo a’ge Allah en is aphwami heneselei a’ge ai hene’gikmu po ’goluk, yogun a’ge mukho-makho lebigonobogwiam modok alemarema o. 24Is heneselei a’ge ai onuelak ’gain enebe hene’gikmu poma, his en is enebe waronobogwiam, ononuk modok meme ogwiam eberak welema modok erlak ani o. Is enebe ’berlegat his en waronobogup ai o. Mesigat nak holuk elaluk welat, weim a’ge tenak poluk, his wathonobuogoluk tua modok erlak o. 25Is enasua owi wusogo poluk erliktogwi a’ge ai odouk narlik pomup o. Emas emin, perak emin, asua a’ge o’borl pam oruak holuk nagai oluk opoluk hogul honu’gwarek paget hwerlagup o. Nenaik ’gain Onuk Logo a’ge Allah en e, asua owi werik poluk erliktogwi a’ge ai apseri a’ge takpasu ai en e,
Narlik pomup o, oluk mo’gulhentesi a’ge ai iak sagalogup holuk e, henebe warorogup ani o. 26Allah en ai a’ge hweim pesimu wiak ema ai his eminat wiagaphonobuano oluk, asua owi wusogo his honowi pam logon pagup o. Henaik ’gain Onuk Logo a’ge en e, ai a’ge hweim pasu ai en, his en ai a’ge honogola en mi-miarak poluk apseri a’geat wolomup o,” oluk mo’gulentesi.
Currently Selected:
Ulangan 7: Wul
Highlight
Copy
Compare
Share
Want to have your highlights saved across all your devices? Sign up or sign in
