Ulangan 6
6
Wene lok logo a’ge enesa’go weregei wene
1At Musa en e, is aphwami Israel a’ge logon disogo mo’gulentesi,
“His o agauwa wolom erlakma enat ’goluk wolorogupmu eba welat, wene Nenaik ’gain Onuk Logo a’ge Allah en nenesa’go weregei wene yu, at en e,
Is hegitsogo togu lemagoluk mo’gulontomup o, oluk mo’gulnesi. 2His henebe emin, his en dogo’gwe a’ge emin, o eba henebe umur yatsogoat wolorogup en e, henelaluk welat Nenaik ’gain Onuk Logo a’ge Allah hau wusogo erliktogulat, at en nenesa’go weregei wene ’berlegat an en mo’gulhentasu legi a’ge yu hwelak poluk hegitsogo togu lomup o. 3Holuk e, his aphwami Israel a’ge narilak norokhwi. Henesa’go opsogo hwelit o. Nenaik ’gain Onuk Logo a’ge Allah en nene’balak mo’gulentasulat e,
O ’gwiang moli opma di a’ge yu a’ge modok a’bikmu eba welat hena’gul onuk lok otluk op modogat wolorogup oluk, wene werak enebesi ai ’gela’ge at wolorogup en e, wene nenesa’go weregei wene mo’gulhentasu legi a’ge yu, henebit om erlakma en hwelak poluk hegitsogo togu lomup o.
4 #
Mrk. 12:29
Narilak norokhwi Israel a’ge yu logwe. Wene yu henede eberak modok wolomup o. Nenaik ’gain Onuk Logo a’ge Allah emategat o. 5#Mat. 22:37; Mrk. 12:30; Luk. 10:27Henede emin, henebabut emin, henanni emin, mesigat otluk, Nenaik ’gain Onuk Logo a’ge Allah henede hwedik wolomup o. 6#Ula. 11:18-20An en,
Disogo togu lomup, asogo togu lomup, oluk yogodak henesa’go weregis wene ai, modok memerak pagup no yo. 7Henede eberak modok welat, heneiyagai mo’gulontogwi modok wolomup o. Honowi pam welat emin, odipmu en emin, set hwalogulat emin, ebela lagalat emin, ’belo’gogwi modok wolomup o. 8Henede eberak wolomogoluk, wene nenesa’go weregei wene ai hene’gik pam erlelogulat, hene’berli pam erlelogulat, togu lomup o. 9Honowi ’goduk e’berli pam pelal wokho pogulat, o seli ’goduk emde ’belak a’ge pam pelal wokho pogulat, togu lomup o,” oluk mo’gulentesi.
Wene ’belak a’ge sagalogo pogwiam togulom a’ge enede ebesogo mo’gulentesi wene
10 #
Kej. 12:7; 26:3; 28:13 At Musa en asogo mo’gulentesirik, mesik disogo mo’gulentesi,
“Nenaik ’gain Onuk Logo a’ge Allah en nene’balak Abraham emin, Isak emin, Yakub emin, mo’gulentasulat e,
O eba his wokhentaik o, oluk wene weragenebesi. Holuk e, Allah en o kota lok modok op a’ge his en worogwi erlak a’ge wokhentaik o. 11O werik di a’ge yu a’ge op a’ge his en pegep erlak a’ge ogola modok ’beterak a’ge wokhentaigat o. Ye, ik omugwe his en ebale hele’gu erlak a’geat wokhentaik o. Yabuk anggur yabuk emin, e zaitun yabuk emin, owi his en yorogwi erlak a’geat wokhentaik o. Nenaik ’gain Onuk Logo a’ge en his wokhonoboluk o eba henebei lasuam e, his di a’ge yu a’ge no a’ge eiye otluk honogum ningsogo no’gulat, 12Nenaik ’gain Onuk Logo a’ge en his aphwami Mesir a’ge en eneragam a’ge ’gela’ge takhonoboluk tenhentarok oruakma delogo wokhonoboluk liplau waga a’ge ai ebe memerak pagup no oluk ebe eberak modok wolomup o. 13#Mat. 4:10; Luk. 4:8At Nenaik ’gain Onuk Logo a’ge Allah hau do’goksogo erliktogulat, at ebaget nak togu lomup o. Ye, ho’buk ’baluogoluk holuk e, at onuk pam nak ’balogu lomup o. 14Aphwami ena’gul onuk mu a’ge o his wolorogupmu eba heneragam o’gwe a’ge en,
Nenaik ebe yuat, oluk mu a’ge erliktogwi a’ge ai, his logon erliktogu lorogup no yo. 15At Nenaik ’gain Onuk Logo a’ge Allah nis sennentarok modok welago a’ge ai ebabut e, aphwami logon en, mu a’ge paget,
Nenaik aiat, oluk ogwi a’ge ai, enede ebam he’berik poluk erliktu ebit modok epasu ai en e, his en,
Nenaik ebe ai o, oluk henedemu a’ge pam he’berik poluk erliktogup holuk e, at Nenaik ’gain Onuk Logo a’ge Allah olot het modok henebam poluk, henebe modok erlagap honobua ani o.
16 #
Kel. 17:1-7; Mat. 4:7; Luk. 4:12 His wagalat, o Masa eba Nenaik ’gain Onuk Logo a’ge Allah anni oruak a, erlak a, oluk ebabut ’baluogoluk til wegep ai ’gela’ge togu lorogup nogo. 17At Nenaik ’gain Onuk Logo a’ge Allah en wene nenesa’go weregei a’ge ai ’berlegat hwelak poluk hegitsogo togu lomup o. 18His en, at Nenaik ’gain Onuk Logo a’ge en,
Op nak disogo tu o, hegitsogo disogo tu o, oluk epasu a’ge nak togu lomup o. Asogo togu lorogup holuk e, his op modogat wolorogup ani o. Nenaik ’gain Onuk Logo a’ge en o ’gwiang moli opma nene’balak wogentaigoluk wene weragenebesimu eba hisat eiye orogup ani o. 19Eiye agalat, nenaik Allah en wene werak nenebesi a’ge hegitsogo re, his en heneselei a’ge ai mukho lebigonobomup o.
20Pobuk his heneiyagai en e,
Nenaik ’gain Onuk Logo a’ge Allah en,
Wene an en henesa’go weregis wene ai ’berlegat hwelak poluk hegitsogo togu lomup o, oluk mo’gulnentesi ai nopaget, 21oluk hin wokhentasu holuk, his en e, disogo mo’gulontogu lomup,
Nis naduk e, ’gain Mesir a’ge en eragam a’ge taknonoboluk, tennentarok oruakma, Nenaik ’gain Onuk Logo a’ge anni a’bik ano pam delogo woknonoboluk liplau waga. 22Woknonoboluk liplau weigoluk, aphwami Mesir a’ge emin, onue ’gain ebe emin, osi ’gain a’ge ’berlek emin, onogorlok a’ge modok elalinat tagenebasuam nis nenil domok hege o. 23Asogo tagenebesirik, nis aphwami o Mesir a’ge en asogo sennentarok oruakma, at en delogo woknonoboluk liplau wagarik, o yema nene’balak wene weragenebesi hegitsogoat woknentaik oluk woknonoboluk waga o. 24Nenaik ’gain Onuk Logo a’ge Allah en e, wene,
Disogo togu lomup, asogo togu lomup, oluk nenesa’go weregei wene ai hwelak poluk hegitsogo togulat, at ebe onogorloksogo erliktogulat, togu lemagoluk mo’gulnentesi. Nis en asogo togu lomul holuk, at en nis nena’gul onuk yu a’ge sennentarok modok oruakma re, op modogat wolomul o. 25Nis en, Nenaik ’gain Onuk Logo a’ge en,
Disogo togu lomup, asogo togu lomup, oluk nenesa’go weregei wene ai ’berlegat nenebit om erlakma en hwelak poluk hegitsogo togu lomul holuk, nis at ebam lo’buktak welema o, oluk mo’gulontogu lomup o,” oluk mo’gulentesi.
Currently Selected:
Ulangan 6: Wul
Highlight
Copy
Compare
Share
Want to have your highlights saved across all your devices? Sign up or sign in
