Ulangan 11
11
Allah modok lok logo a’geat oruak o, oluk mo’gulentesi wene
1Mo’gulentesirik, mesik mo’gulentasulat, “At henaik Allah ano henede hwedik takpogulat, at en tu epesi a’ge emin, wene le’gelogo pesi a’ge emin, tugulom a’ge wene polik pesi a’ge emin, disogo tip, asogo tip, oluk egei a’ge emin, ningsogo tenakho welat, modok-modoktilat laga lomup o.
2-7 #
Kel. 7:8–12:13
#
Kel. 14:28
#
Bil. 16:31,32 At henaik Allah lok logo oruak holuk eige, ogulat, at e’gik anni ano pam at en til lasulat, e’gik dum’bil hasu ano pam takpasulat, enaluk emak oluk elalin tu puk a’ge tagalat, ap ononuk oruak a’ge o Mesir a’ge Firaun ebe pam emin, at eiyagai o Mesir a’ge enebe pam emin, modok nogorlok a’ge takpasulat, o Mesir a’ge enesegen eiye a’ge emin, onuam kuda emin, ono’gwiangso emin, his Mukhonoboluk wagaimu re, at henaik Allah en e, ik ye’gelak Laut Merah wogonoboluk, ede ’burlmu ebano sebelak oluk, enebe erlagapsogo pasulat, o leimu en wokhonoboluk o yema honobou wagalat, takhenebil wagalat, a’gul onuk Ruben a’ge ap Eliab eiyagai, Datan emin, Abiram emin, onowi emin, onowi emin onowi welagaimu eba a’ge emin, onowi sabo werik welagai a’ge emin, is eniak hwelegisa a’ge emin, ’berlegat his Israel a’ge hene ’gerlakma a’ge ’gwiang en emdema yagat onobuagoluk takpasulat, tegei ano re, his heneiyagai en enil hogulat, is Mesir a’ge enede eberuak oluk, tagenebasu a’ge ano enaluk agalat, tuak oluk tu erlak o. A’geat de, at Allah en modogat nogorlok a’ge elalin tegei ano re, his modok henil dokhumsogoat hegepma re, wene o yogodak mo’gulhentasu a’ge yu hede eberit o,” oluk mo’gulentesi.
Enede demat opogwi holuk, enede aganhan enebam pogulat, demat opogwi erlak holuk wene enebam pogulat, tugulom wene
8-9Pobuk mesik emin mo’gulentasulat e, “His ik Yordan ’balogo liplai laguptik o his wolomma ebano Henannisogo ’gwi laguptik ’gwiang eiye otluk welat, ye, at Allah en hene’balak emin, ene’balak emin, ’gwiang modok opma ’gin a’bosu emin tamuk a’bosu emin, ik elaruk ’gela’ge porlolu sogo libagoma, wokhentaik, oluk, wene, modok daksogo ho’buk ’balogo mo’gulentasumu ebano welat, sebal modok otluk waragalat, togu leripogoluk, an en wene disogo tip, asogo tip,” oluk, wene mo’gulhentasu legi a’ge yu pobirak poluk tugu lemis o.
10’Gwiang his ’gwilaguptik eiye otluk wolomma eba re, aphwami en no’gulom a’ge owi a’ge yogo poluk ik hwalogo ’gwelak pogwi ai ’gela’ge, his o Mesir ebano welat, yabuk e’gin-pe’ginsogo yogo poluk e’gen ’balogo no’gu legeptik liplau wege eriano ’gela’ge erlak ani o. 11A’geat de, his ik Yordan ’bil’bal liplai laguptik eiye otluk wolomma eba re, moru ’bogorl pam en ’buagalat, dom petne ebano emin, o dogo ’gwe emin, a’bosu oruak a’ge modok pil lagama ebanoat lagup ani o. 12Hono’gwiang ai re, at henaik Allah enat ’gwelakharok welat, il ’gwelabogo welat, asogo tagokhwe, di tahun yu tahun so’boru yorogup hwerli en ’bekhit edip eme’gen muk aga lema hwerliat aga lema ani o.
13 #
Ima. 26:3-5; Ula. 7:12-16; 28:1-14 His en e, at henaik Allah henede hwedik takpogulat, henede emin, henebe emin ’berlegat, at nak wogotluk motluk lagalat, tugu leripok oluk, an en wene disogo tip, asogo tip, oluk, o yogodak mo’gulhentasu legi a’ge yu modok opsogoat pobirak poluk tugu lemis o. 14Pobirak poluk togwi holuk e, owi a’ge yorogwi eria hegit e, a’gum ’bak tuagoluk o moru wokhentasulat, ebe e’gen ’balu a’ge lau wago eria hegit e, e’gen peruak oluk o moru wokhentasulat, asogo tagokhwe gandum e’gen ’balogulat, anggur e’gen a’bosu ’berelogo na’gogulat, e Zaitun a’bosu na’gogo pogulat, asogo takpoluk pagathorlogu lorogup ani o. 15Ye, honuam e’gela nasulom a’ge di degel takpasulat, his honso’boru honogum ningsogo no’gu o’gu emak oluk wokhentasulat, togolik ani o.
16Henede ’bugap pogulat, henede ’gagalogwi holuk e, Allah hono’borlma ukpoluk, ebalema dogwi asua honogorlogap sogo erliktogulom no, oluk henede en pobirak poluk wolomup o. 17Ye, opsogo pobitak pogwi erlak holuk e, at henaik Allah olot het henebam pasulat, honoso’boru owi yorogup a’ge e’gela modogat ’bugap sogo pou wagoluk, moru wema no oluk ’bogorl pam ’goduk lasogo pasulat, his o op a’ge wokhentasumu eba aregen wolom erlakma en perlenesogoat waremagoluk takhenebasulat, takhenebasumu no oluk, 18#Ula. 6:6-9Wene mo’gulhentegis a’ge yu, henedemu opsogo wogu loroguptik modok eberak wolorogup en, hene’gik pam emin, hena’guluakma emin henaluk welat eberagat welemak o. 19Heneiyagai ’gomo yagontogulat, honowi pam hweriogo welat, ’gebela pam lagalat, set hwalogo welat, yabuk tugulat, opsogoat mo’gulontogu lomup o.
20-21At henaik Allah en ’gwiang wokhentaik o, oluk, wene daksogo ho’buk ’balogo hene’balak mo’gulentegismu ebano welat, ’bogorl yu erlak om erlakma en owan oruakhwe, his heneiyagai henemin henelaluk modok yatsogo weleripok oluk wene mo’gulhentegis a’ge yu honowi ’goduk petne emin, ’goduk ’gwi lagaimu emin, ’berlegat odo ’balogo pogu lomup o.
22His en henaik Allah henede hwedik takpogulat, hede hwedik takpo a’ge takhenebasu a’ge ano motluk lagalat, henede at ebam nak ningtak welat, togu leripogoluk, an en wene disogo tip, asogo tip, oluk mo’gulhentegis a’ge yu ’berlegat opsogo nak til lagai holuk e. 23At henaik Allah naduk agalat di aphwami yu aphwami his ’gela’ge erlak enebe lok enebagase perik nak enanni a’bigat a’ge ai mukho lebik enebaikmu his en e, is ono’gwiangma his eiye otluk wolorogup ani o.
24 #
Yos. 1:3-5
Ono’gwiang his wolom ai re, o leimu en ’bekhit dom Libanon hwerli emin, ik Efrat en hwerli ’bekhit ik lok a’ge ye’gelakma o mo obuk ilasu hegit eba emin, honoyuk sebit hil lagupmu eba ’berlegat his eiye otluk wolorogup ani o. 25Ye, at henaik Allah en wene hwalogo mo’gulhentesi ano ’gela’geat, o his honoyuk pil loma eba ’berlegat his henebe onogorlok hontogulat, onuak lup’bo pouwagoluk at nenaik Allah en takhonobouwama re, is aphwami ai a’ge en his hene’gebela ’gwe’balogo honobouwa erlak o.
26Asogoatma re, o yogodak ya pamat, hweim on henebam pesi a? ede aganhan on henebam pesi a, no a’ge on mik hwerlagup his en nak walhemit o, oluk, mo’gulhentasumu re, pobi tip o.
27At henaik Allah en wene disogo asogo tip, oluk egei wene an yogodak mo’gulhentasu legi a’ge yu opsogo hwelak poluk togwi holuk e, nede aganhan henebam pasulat, 28Ye, at henaik Allah en disogo tip, asogo tip, oluk oso a’ge ano hwelak poluk disogo til laga lomup o, oluk, an yogodak mo’gulhentasu legi a’ge yu tu erlakma en ukpoluk, Allah ebalema mukat his heneperlak a’ge mesik de motluk lagai holuk e, hweim henebasulat taga leik ani o.
29 #
Ula. 27:11-14; Yos. 8:33-35 Asogoatma re, at henaik Allah en o his eiye otluk wolomma eba arat henebei lasu holuk ede aganhan henebam po ano re, dom Gerizim pam eba welat en ogulat, ye, hweim henebesi ano re, dom Ebal pam eba welat en togulat, togup ani o. 30Dom ’biren eria, re, ik Yordan esa’go etle akhit ’gebela lok a’ge yogoma o mo il obuk ilasu a’ge hegitsogo eba aphwami Kanaan a’ge ono’gwiang o Araba dogo hwat la’buktak pesimu, o Gilead horoksogo e da hou legenakma O More ebanoat oruak o. 31His o yogodak yu pamat ik Yordan ’balogo liplai laguptik at henaik Allah en his o eiye otluk weleripogoluk, ’gwiang wokhentasumu eba ’gwi lu o. Ye, arat ’gwi laguptik eiye takpoluk welat, 32Wene le’gelak pesi a’ge ano emin, tugulom wene emin, an yogodak mo’gulhentasu legi a’ge yu, modok opsogoat togu lomup o,” oluk, mo’gulentesi.
Currently Selected:
Ulangan 11: Wul
Highlight
Copy
Compare
Share
Want to have your highlights saved across all your devices? Sign up or sign in
