Ulangan 12
12
“Allah paget pogulomma togulom a’ge ebale mesigarat,” oluk mo’gulentesi wene
1At Musa en asogo mo’gulentesirik, wene mesik disogo mo’gulentesi,
“Nene’balak enaik ’gain Onuk Logo a’ge Allah en, o his wokhentaikmu ebano modok welat, at iak hologo togulom a’ge re, ebe yu,
2His o eba arat ’gwi laguptik holuk e, aphwami ena’gul onuk lo’bok o eba welagai a’ge en, mu a’ge paget,
Nenaik ebe aiyat o, oluk erliktogwi ’gwe ebale dom yat a’ge pam emin, duk pam emin, e’gela un a’ge edip o’gwe emin, ’berlegat eba, damuk-demaksogo modok wiagap poluk lu o. 3#Ula. 7:5Asogo togulat, is en mu a’ge paget,
Nenaik ebe aiyat, oluk, o eba pobuk ai erliktogulom a’ge modok erlak emagoluk, uam worogumu ebale eba emin, helep a’ge daintak poluk ebe asua oluk ogwi a’ge ai emin, moluk-melaksogo hwikhogulat, ene’bia Asyera ebe ogut heli’gogo pogwi a’ge ano odouk narlogulat, onodogwi enasua werik a’ge ano moluk-melaksogo hwikhogulat, til lu o.
4His en Nenaik ’gain Onuk Logo a’ge Allah erliktuogoluk holuk e, is aphwami eba en, mu a’ge paget de,
Nenaik ebe aiyat, oluk ai a’ge erliktogulat togwi ’gela’ge erliktogu lorogup o. 5O nis aphwami Israel a’ge hena’gul onuk lo’bok wolorogup o’gwe eba en, Nenaik ’gain Onuk Logo a’ge Allah onuk erliktogu lomogoluk, at ilem odoktil laga lomma eba, at en ebale mesik pulogo pouwa a’ge oruak o. 6Ebale asogo pulogo pasu holuk, his en wam di a’ge yu a’ge Allah paget narlogu lorogup a’ge emin, at ebaget poluk at mesik warogu lorogup a’ge emin, di a’ge yu a’ge his en a’ge hene’gik wenakho lok akhit 9 pam his honu’gwarek pagathorloluk akhen mesigarat 10 a’ge at ebaget pogu lorogup a’ge ai emin, his en,
An en Allah paget hwerli ai hwerli wogese leik, oluk polik pogu lorogup a’ge ai emin, henede enat at ebaget paik, oluk pogu lorogup a’ge ai emin, honuam sapi emin, kambing emin, domba emin, emalik naduk-naduk deriso a’ge mesik emin, o eba modok woluk laga lomup o. 7Ye, at Nenaik ’gain Onuk Logo a’ge Allah en, his henebe obaphenebiselat, honso’boru di a’ge yu a’ge obaptagalat, tagoam his en di a’ge yu a’ge togukhwe elit nak aga lema ai en, his henebe heneiyagai enemin mesigat la’bulogo o eba Nenaik ’gain Onuk Logo a’ge il pam odoktak poluk, honogola henagaisogo welat, wam so’boru di a’ge yu a’ge no’gu lomup o.
8-9Yogodak e, o Nenaik ’gain Onuk Logo a’ge Allah en wokhentasuam his eiye otluk op wolorogupmu eba owan lo erlak welegep ai en e, yema Allah paget tuogoluk holuk e, henede opoluk togu legep ai ’gela’ge, o eba arat loluk, asogo togulom modok mia o. 10His ik Yordan ’balogo liplai lagaiam, Nenaik ’gain Onuk Logo a’ge Allah en his o eba sebelo ’goluk op welemagoluk lethontouwa o. Lethontoluk, heneselei a’ge en wathonobuano oluk tenhentarok oruakhwe, we, opsogo la’bolik wolorogup o. 11Ye, at Nenaik ’gain Onuk Logo a’ge Allah en his en at onuk erliktogulomma ebale mesik polik pouwa ai o. Asogo polik pasu holuk, an en e, di a’ge yu a’ge at wogoum o, oluk mo’gulhentegis a’ge ai ’berlegat eba at wogesi laga lomup o. Ai ebe re, honuam wusogo at narlogu lorogup a’ge paget egi ai emin, mesik at ebaget poluk warogu lorogup a’ge paget egi ai emin, di a’ge yu a’ge his en a’ge hene’gik wenakho lok akhit 9 pam his pagathorloluk mesigat nak 10 a’ge at ebaget pogulom a’ge paget egi ai emin, his en e,
An en Allah paget hwerli ai hwerli wogese leik, oluk polik pogu lorogup a’ge paget egi ai emin, ’berlegat woluk eba laga lomup o. 12O his wolorogupmu eba, is aphwami Lewi a’ge ’gwiang logon eiye ema erlak ai en e, is enebe his honowi kota lo’bok welema a’ge emin, his henebe emin, henemalik hwelani emin, logomalik emin, heneragam a’ge ap emin, hwami emin, henemin la’bulogo en Nenaik ’gain Onuk Logo a’ge il pam honogola henagai hogu lomup o. 13His henede opoluk ebale momu polik pogulat, di a’ge yu a’ge Allah paget pogu lorogup no yo. 14We, Nenaik ’gain Onuk Logo a’ge ebale ai his hena’gul onuk mesik honowi wolorogupmu eba pulogo pouwama ebayat pogu lomup o. An en e,
Disogo togu lomup o, oluk mo’gulhentegis a’ge hegitsogoat, ebale ebayat his en wam, di a’ge yu a’ge Allah paget narlogulat, mu a’ge logon togulat, togu lomup o.
15Asogo togulom a’geat de, honuam weat werak poluk nouwogoluk, o ’geba ’gela’ge his henebe wolorogup o’gwe lo’bok eba en wusogo no’gulomma re, obat o. Asogo no’gulat Nenaik ’gain Onuk Logo a’ge Allah en wokhontouwa hegitsogoat loksogoat wusogo noma re, op o. Wam onuk kijang a’ge emin, rusa a’ge emin, yogunat no’gu legep ai ’gela’ge, aphwami logon arat onsobul horak a’ge emin, is logon horak erlak a’ge emin, ’berlegat wam worua a’ge ai yogunat no’gulom o. 16#Kej. 9:4; Ima. 7:26,27; 17:10-14; 19:26; Ula. 15:23Asogo elirat no a’geat de, emep nak e, no modok erlak o. We, ik ’gela’ge herlilogo ’gwiangma hwikhogu lomup o. 17His honowi wolorogupmu eba en e, gandum emin, anggur e’gen a’bosu na’gogup a’ge emin, minyak e zaitun e’gen a’bosu na’gogup a’ge emin, wenakho lok akhit 9 pam honu’gwarek pagathorlogulat, mesigat nak 10 a’ge Allah paget po a’ge holuk pogulat, ye, honuam sapi, kambing, domba, emalik naduk-naduk dorua a’ge ai mesik pogulat, ye, his en e,
An en Allah paget hwerli ai hwerli wogese leik, oluk polik pagup a’ge ano hegitsogoat pogulat, ye, henede enat di a’ge yu a’ge at ebaget pagup a’ge ano pogulat, poluk en, his en Allah paget pagup a’ge ano honowi lo’gwe no’gu lorogup modok erlak o. 18We, his henebe emin, heneiyagai hwelani emin, logomalik emin, heneragam a’ge ap emin, hwami emin, aphwami ena’gul onuk Lewi a’ge honowi kota lo’bok welema a’ge emin, henemin la’bulogo re, wam, di a’ge yu a’ge Allah paget pogu lorogup a’ge ai, Nenaik ’gain Onuk Logo a’ge Allah il pam, ebale at en pulogo pouema eba en nak e, no’gulom o. His en asogo togup a’ge ai ’berlegat paget e, honogola henagai hogu lomup o. 19His o eba laguptik welat e, aphwami Lewi a’ge ai enebe eberonobu erlakma en ugonobouwano oluk, henil en wogonobogu lomup o.
20Nenaik ’gain Onuk Logo a’ge Allah en e,
O his wolorogupmu eba hegilogo hwerli ’balhegeik logap paik o, oluk wene werakhenebesi ’gela’geat logap pasuam welat e, his henede enat,
Wam ai a’ge nenagai, oluk epagup a’ge ano re, elirat no’gu lorogubat o. 21Di a’ge yu a’ge Nenaik ’gain Onuk Logo a’ge Allah paget pogulomma ebano ebale at en pulogo pouwema ai his honowi horoksogo erlak o. We, walegat holuk, honuam sapi, domba, kambing at en wokhontouwa a’ge ai honowi pam ebayat werak poluk ’balogo an en mo’gulhentegis ’gela’geat, his henede en,
An yu a’ge nagai, oluk epagup a’ge ano hegitsogoat no’gulomat o. 22Wam onuk kijang a’ge emin, rusa a’ge emin, yogunat no’gu legep ai ’gela’ge, aphwami logon arat onsobul horak a’ge emin, is logon horak erlak a’ge emin, ’berlegat wam worogup a’ge ai yogunat no’gulom o. 23#Ima. 17:10-14Asogo no’gulom a’geat de, di a’ge yu a’ge mep elaluk welago ai en, wam ’gwerik ogola mep oruakma, no modok mia o. Mep egelik a’ge holuk e, mep ai en elaluk welaga a’ge oluk no’gulom modok mia o. 24Wam emep ai no’gulom modok erlagat o. We, ik ’gela’ge ’gwiangma herlilogo hwikhogu lomup o. 25An en,
Disogo togu lomup, oluk mo’gulhentegis ai, his en hwelak poluk togu lorogup holuk e, Nenaik ’gain Onuk Logo a’ge ogola agai hasuam e, his henebe emin, his en dogo’gwe a’ge emin, henemin obat wolorogup o. 26Wam di a’ge yu a’ge ’berlegat Allah paget pul o, oluk obok arat mo’gulorogup a’ge ai, ebale Allah en polik pouema eba woluk lagalom o. 27Wam di a’ge yu a’ge Allah paget poluk, odouk narlogup a’ge emin, aphwami nouwa a’ge emin, woluk laguptik e, wam di a’ge yu a’ge Allah paget wusogo narlik obogulomma ebano oboluk, emep e, ebale ai pamat herlelu o. 28An en,
His disogo togu lomup, asogo togu lomup, oluk wene ’berlegat mo’gulhentegis a’ge ai, henesa’go hwelak poluk togulat, op modogat togu lomup o. Asogo togu lorogup holuk, Nenaik ’gain Onuk Logo a’ge Allah en his henebe at ebam lo’buk osoam e, his henebe emin, his en dogo’gwe a’ge emin, op modok wolorogup o,” oluk mo’gulentesi.
“Dogwi asua erliktogulom modok erlak o,” oluk onogola ’gagalogo pobuk mo’gulentesi wene
29Asogo mo’gulentesirik e, mesik disogo mo’gulentesi,
“Nenaik ’gain Onuk Logo a’ge Allah en aphwami ena’gul onuk mu a’ge logon o eba welagai a’ge ai erlagap enebasuam e, his elirat sebeloguptik wolorogup o. 30Allah en aphwami ai erlagap onobolukmu en, aphwami ai en mu a’ge paget,
Nenaik ebe aiyat, oluk erliktogwi ai ’gela’ge, his en mesik erliktogumu re, henebe ’baik herle pogwiam ’gotnok oso ai ’gela’ge ’gotnok ema no oluk, ai a’ge erliktogu lorogup o. His en asogo erliktuogoluk,
Is en e, no’gosogo erliktogu legesa, oluk, hin wogu lorogup no yo. 31Is aphwami ai en e, mu a’ge pagerat,
Nenaik ebe aiyat o, oluk erliktogulat, modok wiak Allah ebit modok epasu a’ge togulat, enaik ai a’ge paget di a’ge yu a’ge wusogo narlik obogumu eba onu’gwarek eneiyagai a’ge wusogo narlogwi. Ai en e, his en nenaik ’gain Allah Onuk Logo a’ge erliktuogoluk holuk e, is enebabut wik-wok ai ’gela’ge mesik togu lorogup no yo.
32 #
Ula. 4:2; Wah. 22:18,19 Wene an en,
Disogo togu lomup o, oluk ’berlegat mo’gulhentegis a’ge ai, his en wene mu a’ge mesik ebam lo’bok togulat, mesik sebelogo ’belabogulat, togup modok mia o,” oluk mo’gulentesi.
Currently Selected:
Ulangan 12: Wul
Highlight
Copy
Compare
Share
Want to have your highlights saved across all your devices? Sign up or sign in
