2 Korintus 8
8
Allah eiyagai en is logon enede en uang odoksogo enebegesa a’ge paget mo’gulentesi wene
1 #
Rom. 15:26
Narilak norokhwi. At Allah ebabut op ano en eiyagai o Makedonia a’ge yema enebabut obabenebesimu tigisa a’ge henaluksogo mo’gulhentaik o. 2Is aphwami logon en e’gin-pe’gin a’bigat wiagabonobogukhweat de, is onogola enagai loksogo hogwi ai pam enebabut enak aga o. Is ena’ge modok erlak en enerlagaiksogo welat e, is ena’ge a’bigat, lebeksogo is aphwami logon wogontogwi ai o. 3Wogonto hegitsogo wogontogulat mesik emin ebam louksogo wogontogwi. An enebabut naluk. Nil entegistik en mo’gulhentasu legi o. Is aphwami pema en enede ’gagalak erlakma, onu’gwarek enede en ’gagalogo, 4disogo mo’gulnontogu legesa,
“Nis en ogo re, Allah eiyagai o Yudea a’ge logon lerentuogoluk mo’gulheige o,” oluk nis mo’gulnontogwi modok welegesa. 5Nis nonogola en e,
“Is disogo houwa o,” oluk epege a’ge oruakhwe, enebe naduk nonue ’gain Onuk Logo a’ge wogegisarik en, at Allah ede epesi ’gela’ge, enebe nis woknentigisayat o. 6Woknentigisema re, at Titus his henemin welat, his en Allah eiyagai logon henede en lerontouwogoluk egep a’ge ai paget mo’gulhentasu laga ’gela’ge arat odoktuagoluk ede ’gagalige. 7His e, di paget yu paget op modok togu legep. Ai re, henede Allah pam ningsogo he’berik pogulat, op wene holuk opsogo mo’gulontogulat, dem wene opsogo henaluk agalat, aphwami logon lerontouwogoluk a’goluksogoat togulat, nis henedesogo modok welat, togu legep ai ’gela’ge, his ena’ge ogo is Allah eiyagai logon eba opsogo onobouwagoluk mo’gulhentegis o.
8An en,
“His disogo tip o,” oluk, niak ningsogo mo’gulhentegis erlagat o. We, is Allah eiyagai o Makedonia yema a’ge en enede ’gagalogo is a’ge odoksogo Allah eiyagai logon eba a’goluksogo lerontogwi ai ’gela’ge, his en ogo re, is ai henedesogo lerontogwiam,
“Demat is enede oruak o,” oluk enagat emagoluk mo’gulhentegis ai o. 9Nonue ’gain Onuk Logo a’ge Yesus Kristus ebabut op en edeapnenebegei ano his henaluk modok epegi o. At e, ebe Allah en a’ge welat e, ilmu oruak a’ge welaga a’geat de, at erlagaik aga ai pam, his ebe a’ge henilmu a’bik emagoluk, at ebe nis aphwami a’ge agarik erlagaik aga ai o.
10Leronto ai paget, an nede epasu legi a’ge mo’gulhentaik o. Tahun naduk ano pam e, aphwami pema owan oruakhwe, his en naduk,
“Is ai lerontouwok o,” oluk wene ’baligeptik henebit welat leronto erlakma en, we, a’goluksogoat lerontouwogoluk logon enebegep ai ’gela’ge, yogodak ologun ’goboksogo logon lerentagup en mo’gulhentegis o. 11His en naduk a’goluksogo is pema eba henedeabenebigeptik,
“Disogo lerontouwok o,” oluk egep ai ’gela’ge, yogodak asogoat hene’gigem ema a’ge lo’bok a’goluksogoat ologun ’goboksogo odoktogup en mo’gulhentegis o. 12His hena’ge erlak e, puk. At e, hena’ge oruak a’ge henede enat is ai enebagup holuk e, at Allah en,
Obat pegesa o,” oluk ede opouwa o. 13His en nak e, e’ginsogo lerontogwiam, is enede sesogo ’gela’ge weat wouwagoluk mo’gulhentegis erlak o. We, henemin hegitsogoat let-let togu lemagoluk mo’gulhentegis o. 14His en a’ge yogodak a’bik oruakma re, is erlak oruak a’ge eba onobo yo. Is en a’ge pobuk a’bik emarik e, his hena’ge erlak a’ge holuk logon honoboat ani o. Asogo togup holuk, his en lerontogulat, is en lethontogulat, henemin hegitsogo togu lorogup ani o. 15#Kel. 16:18Asogo togulom ai paget, Allah en e, disogo egei,
“At mesik a’ge a’bik odoksogo pagathorlouwa a’ge
ai re, dedilogo pouwa erlak o.
Ye, at mesik en a’ge weiyat odoksogo
pagathorlouwa a’ge ai erlak ema erlagat o,”
oluk egeimu pelal wokho pegesa.
Paulus en Titus arilak enemin yo’go onoboluk peragenebesi wene
16Nis en his henebaget ningsogo tuogoluk togu lege ’gela’ge, at Titus asogoat taga lemagoluk Allah en ede ’gagalegeimu tago ai en, Allah hau worogu lomok o. 17Ai re, nis enat at ede ’gagalige a’geat de, nis en,
“Hat lak o,” oluk neniak ningsogo mo’guligema waga puk. We, at u’gwarek ede en ’gagalegeitik e, modok ningsogo ede henebam welat e,
“Is ene’bek laik,” oluk hene’bek waga ai o. 18Nenare mesik op wene mo’gulentil denagokhwe re, is Allah eiyagai o di owi yu owi en e,
“At ebabut op o,” oluk erliktogwi a’ge, at Titus e’birek onobou wegi ai o. 19Ye, ai nak e, puk. Is Allah eiyagai en is ai lerontouwogoluk enebegesa a’ge ai, at ai emin en odoksogo poluk wogentai louwagoluk edikpegesayat o. Asogo wogentai lagaimu, nonue ’gain Onuk Logo a’ge erliktogulat,
“Is Paulus lak enebabut e, is logon leronto a’ge elit oruak o,” oluk enagat ema ai o. 20A’bigat onobogwi a’ge ai, nis en odoksogo wil lagaimu, is aphwami logon en nonobok wiak ’baluano oluk e, nenede opolugat togu lege o. 21#Ams. 3:4Asogo togulat e, nonue ’gain Onuk Logo a’ge il pam nak e, nenebabut hegitsogo togu lomogoluk togu lege erlak. At e, nonue ’gain Onuk Logo a’ge emin, aphwami emin, enilem nenebabut hegitsogo togu lomogoluk opogu lege o.
22Is eria eneminsogo, nenare mesik perakpou wegiat o. At ai re, di paget yu paget nin hwedik nan hwedik aphwami logon a’goluksogo lerentasukhwe ebabut enak a’ge ’baligerik e, hene’bek perakpou wegi ai o. At en e,
“Is op tua o,” oluk ede henebam pesirikmu no oluk e, yogodak his lethentaiogoluk ede modok aganhansogoat waga ai o. 23Ye, at Titus ai re, an nare his lethontouwogoluk ne’birek yabuk togu lege a’ge o. Ye, nenarilak logon at emin wegesa eba re, op nak togukhwe is aphwami logon en enebabut ’belakpoluk Kristus erliktogwi a’ge, Allah eiyagai en yo’go onoboluk peragonobou wegesema wegesa ai o. 24Allah eiyagai logon en e,
“Is o Korintus a’ge en is Titus lak enebe demat enede hwedik oruak o,” oluk ogulat, ye,
“Is Paulus lak en is o Korintus a’ge op tua o, oluk onomot wogwi ano re, demat o,” oluk ogulat, uagoluk, is ai henedesogo wogenebip o.
Currently Selected:
2 Korintus 8: Wul
Highlight
Copy
Compare
Share
Want to have your highlights saved across all your devices? Sign up or sign in
