2 Korintus 9
9
Allah eiyagai en enarilak onorokhwi logon leronto wene
1An en e, his en is Allah eiyagai o Yudea a’ge lerontouwogoluk odoktugu legep a’ge ai paget, wene pelal wokho hene’bek perakpou wom puk a’ge perakpou wegi ai o. 2His en e, is ai lerontouwogoluk a’goluksogo togu legep ai, henebabut an naluk o. An en his erlikhenebiselat, is aphwami o Makedonia yema disogo mo’gulentasu legi o,
“Tahun naduk ano pam en, is aphwami o Akhaya eba a’ge en is ai disogo lerontouwogoluk is ena’ge odoksogo pegesarik oruak o,” oluk honomot wasu legi. His a’goluksogo togu legep ai pam en, is aphwami yema a’ge logon enebe esan en is ai onobouwogoluk enede o’borlogouk osoat o. 3His henebabut togu legep ai paget, nis en erlikhonobogu lege a’ge ai,
“We ’burlat erligonobogu legema ai o,” oluk uano oluk e, his en an egi hegitsogo onoboluk wolorogup en, nenarilak hene’bek peragonobou wege ai o. 4Asogo peragonobou wegi ai re, his owan odoksogo onobo erlak oruakma, an aphwami Makedonia a’ge nemin hene’bek wom mia o. Nadugat an en eselat,
“Is demat disogo op tua a’ge oruak ani o,” oluk egirikmu re, an ne’gerli agalat, his hene’gerli agalat, tuano oluk, is naduk peragonobou wegi ai o. His en wene ai paget pobi tigeptikmu re, his hene’gerli orogupno oluk mo’gulhonto erlak a’geat de, egi ai o. 5Asogo owan odoksogo po erlak wolorogup holuk mia ai en, an owan wom erlak welat nenarilak ai naduk peragonobou weigoluk egi ai o. Is hene’bek wemarik e, his en ai onobouwogoluk obok egep a’ge ano, is en ologun ’balogo odoktumagoluk enede ’gagalogo mo’gulentasu legi o. An asogo taga legi ai re, his hena’ge henede hwedik oruakhwe is en ningsogo henede ’gagalumu onobo mia o. We, his henede enat onoboluk oruakma re, op o, oluk taga legi ai o.
6Wene ai paget ik a’ge yu henede eberip o. Is aphwami logon en owi weisogo nak yorogwi a’ge ai re, pobuk e’gen weisogo nagat ’balua o. Ye, is logon owi loksogo yorogwi a’ge ai re, pobuk ebe loksogoat ’balua o. 7Aphwami onogola enagaisogo welat is logon onobogwi a’ge ai, Allah en enebe ede welago ai o. Asogo a’geat de, his henebe lo’bok hena’ge henede hwedik oruakhweat de, is logon en henede ningsogo ’gagalogwiam en de, onobo re, mia o. We, his henede op welat, honu’gwarek en henede enat ’gagalogo onobo yo. 8-9#Mzm. 112:9Aphwami enebabut op togwi a’ge paget, Allah iak pam pelal disogo wogo oruak,
“Is en op a’ge aphwami da wogontogulat,
ya wogontogulat, so’burontogulat,
is logon enerlagaik a’ge so’burontogwi o.
Enebabut op en wogontogwi ai,
Allah ede eberak modok welema o,”
oluk pelal wokho pegesa ’gela’ge, at Allah ebabut op en, di a’ge yu a’ge ebam louksogo wokhentasuam, his nin hwedik nan hwedik honu’gwarek henebaget elirat welat, ebam louksogo is logon opsogo lerontogu lorogup en, Allah en elirat wokhonto a’ge oruak o. 10#Yes. 55:10At Allah en is owi yorogwi a’ge owi wogentasulat, so’boru ebe nouwagoluk wogentasulat, tago ai o. Asogo at enat, aphwami en agarli yoruagoluk ’balontogwi ’gela’ge, henebabut is logon lerontogulom ai a’ge wokhentasulat, ye, owi yorogwiam e’gen loksogo egesu ’gela’ge, is logon henede en lerontogwiam logap pasulat, tua o. 11Asogo wokhontoma re, his en, di a’ge yu a’ge a’bigat pit-patsogo welat, hene’gik logat is logon lerontogu lorogup ani o. Asogo lerentagup a’ge ai, nis en so’busogo wogontogwiam e, Allah hau woruayat o.
12His aphwami henede en lerentagup ai pam e, Allah eiyagai ene’gikmu erlak a’ge nak elirat tagonobogu lema puk. We, dedilom ’gela’ge re, aphwami esan en Allah hau loksogo worogu lemayat o. 13Asogo lerontogu lorogup ai pam, is Allah eiyagai o Yudea a’ge en e,
“Is aphwami o Korintus a’ge Kristus tegei a’ge op wene ano wegesarik,
Nenebabut hegitsogo togu lomul o, oluk egesa hegitsogoat togwi o. Asogo togulat e, is ena’ge logon onomokhwi om erlakma en nis letnontogulat, is logon ’berlegat lerontogulat, tigisa o,” oluk henebabut enak a’ge ’belakpoluk Allah erliktuayat o. 14Asogo erliktogulat, is en e,
“Allah ebabut op ano en, is en aphwami loksogo lerontogu lemagoluk enebabut ai a’ge wogentesimu togwi o,” oluk henebe enede welat loksogo Allah yo’go pogu lema ai o.
15At Allah en op modok a’ge nis en ’beli’gogo u puk a’ge woknentesi ai paget erliktogu lomok o.
Currently Selected:
2 Korintus 9: Wul
Highlight
Copy
Compare
Share
Want to have your highlights saved across all your devices? Sign up or sign in
