2 Korintus 7
7
1Holuk e, narilak norokhwi. Henebe nede o. At Allah en asogo wolomul ani, oluk obok mo’gulnentesi ai en, nenebe en, nenede en, wiak togu lege a’ge ai, opsogo hosogo ukpouwok o. Asogo ukpoluk, Allah ebe nonogorloksogo welat e, nenebe at ebaget poluk wolomogoluk, nenede ’garoksogo hurleap pogu lomok o.
Aphwami o Korintus a’ge enebabut heberlegesema re, Paulus ogola agai hesi wene
2Nis nenebaget e, his en nenebe woknonobu ’gela’ge henede hwedik wolomup o. Nis en e, his mesik wiagaphonobogulat, almerakhonobogulat, lalhonobogulat, tige erlak o. 3An en naduk mo’gulhentasulat e,
“His e, henebe nenede hwedik welegep o. Holuk e, nenemin waromma re, waromat o. Ye, nenemin nenelaluk wolomma re, wolomat o,” oluk asogo egi ai en e, yogodak, wene mo’gulhentegis ai, wene henebam paigoluk egi erlak o. 4An nede en e, his op togup ani, oluk e, nede ha’buksogo welat honomot wasu modok welegi o. Asogo welat, is aphwami logon en wiagapnonobuogoluk e’gin-pe’gin taknonobogukhweat de, an nede modok op agalat, loksogoat nagai hasulat, taga legi o.
5 #
2Kor. 2:13
Nis o Makedonia yema wegerik oruakma re, nenebam ha’buk u erlakmayat, wiagapnonobuogoluk di e’gin yu e’gin taknenebegesayat o. Aphwami logon en watnonobuogoluk togumu, nis nonogorlok agokhwe welege o. 6Oruakma re, at Allah ebabut e, aphwami en,
“No’gosogo tul o,” oluk enede wiak otlukmu enede obabenebiso ano pam, at Titus perakpou wagama waga ano pam nede obapnebegei. 7At Titus ebe waga ai pam nak nede op aga puk. We, his en togwiam at ede op aga a’ge ai, mo’gulnosu waga ai pam, nede obaptegeiyat o. His en e,
“At Paulus emin sarlok tolu e,” oluk nebam henede eberogulat,
“Nene’bigene en wiak tige o,” oluk honogola opogulat, is logon en an nobok ogwiam, henede pam enat an oruak o’gwe agalat, tigep a’ge ai ’beli’gogo mo’gulnosu agama re, nogola nagai a’bik hegiat o. 8Asogo nogola nagai hegi a’geat de, an en suesi’ga naduk pelal wokho hene’bek perakpou wegi ano en,
“Onogola wiagabenebegis ai, mo u a’ge ne’bigenen perakpegi o,” oluk nede eberise legi erlak o. We,
“Ne’bigenen mesik erligeat onogola wiagabenebegis o,” oluk nede epasu legirigat de, 9yogodak nogola nagai hasu legi o. His honogola wiak aga ai en nogola nagai hasu legi puk. We, his honogola wiak aga ai pam en, his wiak tigep a’ge ukpoluk henebabut heberligep ai en, nogola nagai hegi o. His honogola wiak egep ai re, at Allah ede agai epesi pamat wiak aga o. Holuk e, nis en wiagap henebige oluk u mia o. 10Aphwami ’gwiangma a’ge en enede ’gagalogwiam, enede wiak otluk e, enebe waragai a’geat de, at Allah ede agai epasu ano pam onogola wiak agalotluk, wiak togwi a’ge ukpoluk enebabut heberlagaiam e, Allah en obabenebiso ai o. Obabenebisoam e,
“An nogola wiak aga pam, ne’bigenen nebabut heberlegi o,” oluk pobuk wenemennei oborogwi erlak. 11At Allah ede agai epasu ano pam honogola wiak agalat e,
“Ne’bigenen wiak tegismu,” oluk henebabut heberlagarik e, op a’ge ningsogo togulat, wene henebam erlak hegitsogo togulat, honolot het agalat, honogorlok agalat,
“Paulus emin sarlok tolu e,” oluk nebam henede eberogulat, honogola aganhansogo togulat, at wiak tegeitik oruak ai e’gik ologun pam lebikpogulat, tigep ai hemit! Asogo togulat his wiak mesik tu erlakma en, wene henebam a’ge no’gorlogo modok hwik hegep o. 12An en suesi’ga pelal wokho hene’bek perakpou wegi a’geat de, at mesik wiak tegei ai en perakpou wegi puk. Ye, at wiak tegei ai pam is logon nal egesa a’ge ai paget perakpou wegi pugat o. Ai re, we, his honu’gwarek honogola en e,
“Nis Paulus lak nenedesogo is enebaget ningsogo tu ebele paget welege hegi o,” oluk Allah ilemat, honu’gwarek henebabut ’balogup oluk perakpou wegi o. 13Asogo perakpou wegimu tigep ai en nis nonogola op aga.
Ai paget nonogola op agayat. Ye, at Titus his ’berlek en ebe wegeptik op togukhwe, ogola op aga a’ge ’beli’gogo mo’gulnentasuam, nonogola nenagai modok hegeat o. 14An en nadugat Titus mo’guleselat e,
“Is pobuk op tua o,” oluk honomot wasu legi ’gela’ge tigepma re, an ne’gerli egi erlak o. Nis en di wene yu wene demat nak mo’gulhentige ’gela’ge, at Titus mo’guleselat his honomot wege ai re, demat o. 15At en his henebe ede welaga a’geat de, ebe hene’bek wagama re, honogorlok agalat, honuak lup ’bo pogulat, togularat de, at ebe wegepma, at en wene mo’gulhentasuam, iak hologo tigep a’ge ano, henebam ede ebethasulat e, his ’berlegat henebe modok edeaphenebasu o. 16Ye, an en e,
“Is di a’ge yu a’ge op togu lema o,” oluk, nede ha’buksogo welat nogola nagai hasu legi o.
Currently Selected:
2 Korintus 7: Wul
Highlight
Copy
Compare
Share
Want to have your highlights saved across all your devices? Sign up or sign in
