1 Petrus 5
5
“Allah eiyagai disogo tenentarok wolomup,”
oluk mo’gulentesi wene
1His Allah eiyagai tenentarok welegep ai ’gela’ge, an ogo asogo tenentarok welegi a’ge en henesa’go mesik werik. At Kristus ebam di obotut yu obotut hil-hil waraga ai, an nil hegi o. Ye, pobuk Allah en ebe selakmasogo perakpouma ai ebe wagoam, aphwami en erliktua ai, an nemin erliknobuayat o. An niak sakhosogoat henesa’go werik. 2#Yoh. 21:15-17Allah en e,
“An neiyagai wam domba wam ’gela’ge disogo tenentarok wolomup,” oluk yo’go henebesi ’gela’geat tenentarok wolomup o. Tenentarok welat, honu’gwarek henebit oruakhwe, aphwami logon en, eniak ningsogo mo’gulhontogukhwe tenentarok welat, ye, honogola en,
“O’go mesik woknontouwak,” oluk opogulat tenentarok welat, togu lorogup no yo. At e, we, honogola henagaisogo tenentarok wolomup o. 3Allah eiyagai tenentarok welemagoluk so’busogo wokhentesi ai tenentarok welat, henebe ’gain ’gela’ge welat, mep legeik-lagaiksogo tagonobogu lorogup o. We, his op togukhwe enil hontoluk henebabut wokho togu lemagoluk, opsogo togu lomup o. 4Asogo togwi oruakma re, nonue ’gain domba eiye a’ge ano wemarik e,
“Op modok togu legepma o,” oluk o’go erliktogwi modok welema a’ge wokhontouwa o.
5 #
Ams. 3:34
Ye, ai ’gela’ge re, his ap souwe a’ge nosi o. Is logon en Allah iak pam disogo egesa,
“Aphwami onu’gwarek erlikhorlogwiam,
at Allah en ebirabenebiso.
A’geat de, onu’gwarek enede sebelogo welema holuk, at ebabut op en edeabenebiso,”
oluk pelal wokho pegesema oruak ai en, his en enarlue a’ge eneragam ’gwi laguptik eniak hologo togu lomup o. Asogo togulat e, his ’berlegat e, honu’gwarek en erlikhorlo erlakma en, eneragam welat, his logon en is logon eneragam a’ge welat, is en his heneragam a’ge welat, togulat e, let-lerat togu lomup o. 6#Mat. 23:12; Luk. 14:11; 18:14Asogoat, Allah en pobuk hononuk oruagapsogo edikhonobouwagoluk, yogodak ya honu’gwarek en erlikhorlo erlakma en, at e’gik anni oruak a’ge eragam ’goluk henede sebelogo togu lomup o. 7Allah henebe ede ai en, his di a’ge yu a’ge paget honogola wenemennei yat horok eberogu legep ai ukpoluk e, henede at ebam he’berik poluk wolomup o.
8At Iblis, heneselei a’ge ano en, singa orlomene anni wiak a’ge di a’ge yu a’ge haumsogo naigoluk iak nga agan heratil noso ai ’gela’ge,
“Sa ’gela’ge wiagap paik,” oluk herahenebil denago ai, henebabut heberlogo henil opsogo wolomup o. 9Asogo welat, honogola en e,
“Narilak norokhwi o di owi yu owi eba di obotut yu obotut hogwi ’gela’geat hogu lege o,” oluk, at Iblis wagoam, iak hwelak erlakma en ukpoluk henede Allah pam he’berik poluk ningsogo edik wolomup o. 10Oruakma, at Allah ebe erliktogwi modok wolorogup ai ’gela’ge, his Kristus emin hwedik oruakma heneminat erlikhonobogu lemagoluk yo’go henebesimu, yogodak ya wei nak henebam di obotut yu obotut hogu loroguptik, pobuk, at ebabut op modok ano en, ’garoktak henebasulat, henede hurleap pasulat, henanniaphenebasulat, ha’buktak henebasulat, tua o. 11Di a’ge yu a’ge ’berlegat at emategat eiye welat tenak modok welemak, oluk,
“Amin,” egi ai o.
Wene ologun wusogo hau warenebegei wene
12 #
Per. 15:22,40 An en wene horok a’ge ai henesa’go wusogo hene’bek perakpou weigoluk e, pelal wouwagoluk an not Allah eiyagai a’ge Silas ebabut he’berik hegirik e, yo’go pasuam surat wesimu hene’bek perakpou wegi ai o. Allah ebabut op en taknenebasu a’ge ebe yuat oluk, an naluk welat demat mo’gulhentegis o. Holuk e, henede ai pamat he’berik welat, ningsogo edik wolomup o, oluk wene pelal wokho hene’bek perakpou wegi ai o.
13 #
Per. 12:12,25; 13:13; 15:37-39; Kol. 4:10; Flm. 1:24 Henarilak honorokhwi Allah eiyagai at en poligenebesimu o Babilon yema welagai a’ge en hau wathonobogulat, nomlogo Markus en hau wathenebiselat, tigisa o. 14Ye, his-his nede-hedesogo hau henemde motok wat-wat lu o. Allah en his Kristus emin hwedik a’ge nak henebe ’berlegat henede ha’buksogo tenhentarok welemak o.
Currently Selected:
1 Petrus 5: Wul
Highlight
Copy
Compare
Share
Want to have your highlights saved across all your devices? Sign up or sign in
