1 Petrus 4
4
“Henebabut ’get oroguptik e, disogo togu lomup o,” oluk mo’gulentesi wene
1Aphwami di obotut yu obotut holuk, enebe waragalat, pobuk wiak togulom erlak ai en, at Kristus di obotut yu obotut hil-hil ebe waraga ai ’gela’ge, his ogo re, aphwami sing ’buktak poluk enepe heberlogo welagai ai ’gela’ge, at Kristus ebabut wokho, di obotut yu obotut hogulat henannisogo wolomup o. 2Ai en, his en e, aphwami di a’ge yu a’ge enagai en enede en nasu ai a’ge ukpoluk, hwerli yogodak ya hwerli en e, henelaluk welat Allah ogola agai epasu a’ge ai nak togu lomup o. 3His naduk e, henebabut is aphwami Allah iak eneperlak a’ge en enede opoluk togwi ai ’gela’ge, arat togulat e, wiak hene’gerli erlagat togulat, henede en nasuam ’babi tenontogulat, ’babi tenhonobouwagoluk togulat, anggur e’gen a’bosu wiak a’ge noluk honuk-honuk togulat, seni sogo a’ge noluk yogunat togulat, anggur e’gen a’bosu wiak a’ge ai henebam lasu erlakhwe ningsogo no’gulat, dogwi asua ede wiak ema no oluk, erliktu puk a’ge erliktogulat, naduk togu legep ani o. 4A’geat de, yogodak his henebabut is wiak enagaisogo modok til lagai ai ’gela’ge enemin tu erlakma en mo ogu legep ai en, his honobok wiak ’balogwi ai o. 5A’geat de, at Allah en, aphwami enelaluk a’ge emin, waregesa a’ge emin, enemdema wokho wene enebam pasulat, no’gorliselat, tiogoluk ede epesirik oruak o. Asogo wene enebam pasuam, is en, wene enebam a’ge no’gorluogoluk,
“Nis disogo togu lege, asogo togu lege,” oluk mo’gulogwiam mia ema a’ge oruagat o. 6Ai enat, is aphwami waregesa a’ge ai, Allah en nis aphwami ’berlegat wene nenebam pasulat, no’gorliselat, tiso ai ’gela’ge enebam pesimu, enebe waregesa a’geat de, at Allah ede epesi ano pam enarogun elaluk welago ai ’gela’ge enelaluk welemagoluk, at Kristus en op wene mo’gulentai laga ai o.
“His-his henebabut ’get a’ge mo’gulil laga lomup o,” oluk mo’gulentesi wene
7Di a’ge yu a’ge ’berlegat ologun pam ema a’ge horogat lau wago o, oluk, se’ban ogu lomogoluk, henede hweriogo welat, henebabut heberlogo wolomup o. 8#Ams. 10:12Wene logo ’gela’ge re, his-his nede-hedesogo togulat, mesik en mesik wiagap pouwa a’ge erlagapsogo modok ukpouwa ai en, his-his henarilak honorokhwi enemin nede-hedesogo modok togu lomup o. 9Henarilak honorokhwi enemin, his logon en is logon onowi pam lagalat, is en his honowi pam wagalat, togulat, enebe wogonoboluk e, honogola en,
“Nebit e,” oluk opo erlakma en wogonobogu lomup o. 10At Allah ebabut op en, nenebe lo’bok nenebabut hundomok woknentesi hegitsogoat, henebe lo’bok en ai a’ge op eiye welat, his-his let-let togu lomup o. 11Asogo togulat, Yesus Kristus emin hwedik welat togwiam, is aphwami logon en Allah erliktogu lemagoluk, his logon en wene mo’gulontogulat, Allah iagat mo’gulontogulat, his logon en is logon lerontogulat, Allah anni woknentasu ai pamat lerontogulat, togu lomup o. Asogo togulat, Yesus anni a’bik otok modok welago a’ge ano erliktogwi modok wolomogoluk,
“Amin,” egi ai.
“Henebe Kristus eiyagai ai en, henebam di obotut yu obotut ago ai,” oluk mo’gulentesi wene
12Narilak norokhwi. Henebe nede o. Odouk orlouk hogwi ai ’gela’ge, Allah en e, henebabut ’baliogoluk di obotut yu obotut henebam pasuam, honogola en e,
“Yu re, muat hogu lege erlak a’ge nenebam ago,” oluk epagup o. 13At Allah en Kristus ebe selakmasogo perakpou wagoam, erliktul ai erlige, wagoam honogola henagai a’bik houwogoluk, honogola en e,
“At Kristus ebam di obotut yu obotut hil-hil waraga ai ’gela’ge, nis at emin hwedik welat asogoat hogu lege,” oluk honogola henagai hogu lomup o. 14Aphwami logon en at Kristus paget wene yakhontogwi holuk e, honogola en e,
“Allah Arogun erliktogwi a’ge ano nenebam louk egeimu welege,” oluk honogola henagai hogu lomup o. 15A’geat de, is logon en aphwami waronobogulat, yogot wogulat, wiak togulat, is akhen onowene a’ge daserleben ogulat, togwiam, di obotut yu obotut enebam ago ai ’gela’ge, his asogo togwiam henebam emano. 16A’geat de, aphwami logon e,
“Hat hebe Kristus ot, hebe Kristen a’ge,” oluk di obotut yu obotut takhonobogwi holuk, hene’gerli hagup o.
“We, an Kristus ot holugat at onuk a’ge an nonuk tualogo mo’gulnogwi ai re, obat o,” oluk Allah erliktogu lomup o.
17Allah en nenemdema wokho wene nenebam pasulat, no’gorliselat, tua ai arat horok lau waga o. Asogo tagalat e, nis Allah eiyagai a’ge naduk nenemdema wokho wene nenebam pasulat, no’gorliselat, tua holuk, pobuk is aphwami logon Allah iak op wene wo erlak a’ge no’gosogo tagonobouwa epegep. 18#Ams. 11:31Aphwami en Allah iak pam disogo egesa,
“Aphwami hegitsogo togwi a’ge, Allah en delonobu erlak ’gela’ge oruakma, delonobua ai holuk,
is onogola en Allah ebe mi-miarak poluk wiak togwi a’ge ai no’gosogo tagonobouwa epegep,”
oluk pelal wokho pegesa. 19His Allah ede epesi pamat henebam di obotut yu obotut asogo hogu legep holuk e, honogola en e,
“At nenebe walnentesi a’ge aiat ebam he’berik wolom e, op o,” oluk henede at ebam he’berik welat henebabut opsogo togu lomup o.
Currently Selected:
1 Petrus 4: Wul
Highlight
Copy
Compare
Share
Want to have your highlights saved across all your devices? Sign up or sign in
