2 Petrus 1
1
Hau warenebegei wene
1Narilak norokhwi. An Simon Petrus Yesus Kristus en, at eragam a’ge welemagoluk yo’go noboluk peraknobou wagama wegi o. Ai re, at ebe Allah at welat, ebabut hegitsogo nak tiso ano en, his nenemin hegitsogoat nenede at ebam he’berik pogwiam delnenebiso a’ge, wene yu pelal wokho hene’bek perakpou wegi ai o. 2His en Allah emin, nonue ’gain Onuk Logo a’ge Yesus emin, e’birek enebe se’geksogo henalugat welegep ai en, is enebabut op ano en op a’ge wokhontogulat, henede ha’bugaphonobogulat, loksogo togwi modogat welemak o.
“Nis nenaik Allah en poliknenebesirik yo’go nenebesi,” oluk mo’gulentesi wene
3At Allah otok modogat welat, di a’ge yu a’ge elalinat tisokhwe erliktogwi modok welagai a’ge ano en yo’go nenebesi ai o. Holuk, nis en at ebe se’geksogo nenaluk agarik, nis nenebe nenelaluk welat, at ebaget hegitsogo togu lemagoluk, at u’gwarek anni pam di a’ge yu a’ge woknentesimu eiye egerik welege o. 4Is aphwami ’gwiangma yema di a’ge yu a’ge enagai en, enede en nasuam enebabut wiak togulat wiagaphorlogwi a’ge ai ukpoluk hweiye liplau woroguptik e, Allah ebabut wouwagoluk, op a’ge woknentasu ai o. At en elalinat tisoam erliktogwi modok welagai a’ge ano en e,
“Di a’ge yu a’ge o’go pam wo mia o. Op modok lok a’ge, wokhentaik a’ge oruak o,” oluk obok mo’gulnentesi ai, ebe woknentasu aiat o. 5Ai en e, his ai a’ge eiye orogup en, a’goluksogo togu lomup o. Henede Kristus ebam he’berik welegep a’ge ai ebam louksogo re, enebabut hegitsogo togwi ai a’ge eiye oroguptik togu lomup o. Hegitsogo togulat, ai a’ge ebam louksogo re, Allah ebe enaluk agai ai a’ge eiye omup o. 6Allah ebe henaluk welat, ai a’ge ebam louksogo re, enede sebelak welagai a’ge ai, eiye omup o. Henede sebelak welat e, ai a’ge ebam louksogo re, di paget yu paget togulat, enepe mosogo welagai ai a’ge, eiye omubat o. Henepe mosogo welat e, ai a’ge pam louksogo re, Allah eragam welat, at ogola agai epasu a’ge hegitsogo togwi a’ge ai, eiye omup o. 7Allah ogola agai epasu a’ge hegitsogo togulat, ai a’ge ebam louksogo re, enarilak onorokhwi enedesogo welagai ai a’ge, eiye omup o. Henarilak honorokhwi henedesogo welat, ai a’ge ebam louksogo re, aphwami enebe ’berlegat enede hwedik welagai ai a’ge, eiye omup o. 8His e, henebabut ai a’ge ’berlegat eiye oroguptik, pobuk naduk loksogo eiye oroguptik wolorogup ai en, we ’burlat almasogo wolom erlakma en, nonue ’gain Onuk Logo a’ge Yesus Kristus se’geksogo henaluk emayat o. 9Asogo a’geat de, is his a’ge pema en enebabut ai a’ge eiye om erlakma en welema holuk e, aphwami enil wiak en di a’ge yu a’ge walekma yethogwi erlak ano ’gela’ge oruak o. Asogo welat, is en e,
“Wiak togu lege a’ge, Allah en emetnenebegei o,” oluk u a’geat de, at ebam memerak poluk oruak ai o.
10Ai en e, narilak norokhwi. Henebe Allah en polikhenebesirik yo’go henebesi ai re, demat emagoluk, his en a’goluksogo henannisogoat togu lomup o. Asogo togu lorogup holuk, henede Allah pam he’berik welegep a’ge ukpoluk liborogup erlak o. 11Nonue ’gain Onuk Logo a’ge Yesus Kristus delnenebiso a’ge ano, ’gain modogat wolomma eba honobo ’gwiselat, at en e,
“His henebe eiye o,” oluk, hau wusogo opsogo wokhonoboluk ’gua o.
12Ai en e, wene dem wene henaluk egeptik henede hurlesogo tenak welegep a’geat de, an en wene egi ai paget nin hwedik nan hwedik henede eberak henebasu modok weleik o. 13-14At nonue ’gain Onuk Logo a’ge Yesus Kristus en mo’gulnesi hegitsogoat, an nebe nagap mugom a’ge ’gela’ge we lodu paget welegi yu re, ukpoluk perleneat lo hegirat welegi o, oluk an naluk welegi ai en e, yogodak nebe nelaluk welegi ya pam e, wene ai paget honogola ebesogo mo’gulhentasu modok wolom epasu legi o. 15Pobuk nebe wareik holuk, wene ai his henede eberak modok wolorogup en, opsogo mo’gulhentasu leik o.
“Yesus ebe erliktogwi a’ge disogo nenil hege,”
oluk mo’gulentesi wene
16Nonue ’gain Onuk Logo a’ge Yesus Kristus anni a’bik ano ebe waga a’ge paget henaluksogo mo’gulhontogu lege ai re, nonung aphwami onogola ’gagalogo ’belo’gogwi a’ge ai pam elitsogo mo’gulhontogu lege erlak o. We, at ebe ’gain Onuk Logo a’ge wagama, nonu’gwarek nenil domok hege a’ge en mo’gulhontogu lege o. 17#Mat. 17:1-5; Mrk. 9:2-7; Luk. 9:28-35Nis o eba oruakma, nenaik Allah en, at Yesus ebe erliktagalat, hau weriselat, tisoma nis nenesa’go hwelige o. At Allah ebe logo a’ge erliktogwi modok welagai a’ge ano en e,
“An nomlogo nede hwedik a’ge nogola nagai epasu legi re, ebe aiat o,”
oluk, 18iak ’bogorl pam en ’belakpou wagoma, nis Yesus emin dom Allah u’gwarek odom a’gul ai pam welat nenesa’go domok hwelige o. 19Asogo hwelige ai enat, nonogola en e,
“Is ap Allah iak mo’gulontogu legesa a’ge en egesa a’ge ai demat o,” oluk naduk weiyat ’gela’ge opogu lege a’ge re, pobuk nenesa’go hwelige ai pam en e, modok dokhumsogo pobi tige ai o. Holuk e, o hik ’bintak oruakma, aphwami en esaga heberlogo pogwiam, atiarak modok welagai ai ’gela’ge, wene ai henedemu ebesogo modok wogu lomup o. Asogo wogwi oruakma, pobuk o hiktak a’ge dakha osokhwe, wap orlu ago ai ’gela’ge, at Kristus henedemu dakharak honobouma o. 20-21Wene Allah iak ai re, is aphwami en enede ’gagalogo mesik egesa erlak o. We, enebe aphwami a’geat de, Allah Arogun en enede ’gagalogo mo’gulentasukhwe, Allah en egei a’ge wene ai mo’gulontogu legesa ai en, wene Allah iak pelal wokho pegesa a’ge oruak ai, Allah Arogun en nenede ’gagalak erlakma, nonu’gwarek nenematek en se’geksogo pobitu mia o.
Currently Selected:
2 Petrus 1: Wul
Highlight
Copy
Compare
Share
Want to have your highlights saved across all your devices? Sign up or sign in
