TITUT 3
3
Ala apuri kenok eeko logorak wone
1It aakumi nen pemerintah inom, it aap inayuk warak menggaarak inom, inabu'me logonet, inoone konenggwi, ndi, eeriyak obeelom ambi kin age kero, ”Eeko logowok o,” yinuk, mbako logowak nduk yorage, eeke logot o. 2Aap ambi miyuk-meya eerogo pugwi, ndugwi pugwi, eeriyak ta lek o. Ata, iniki yanggonak logonet, yi aap ndi aap apit inabuwa mbako logowak nduk, yorage logot o. 3Nit kunduk, maan togop aret nineenggo'lek wi negen wonogwe, wone yo'niragaatak konengga'lek wonogwe, Ibilit nen tu nomonniren nage, aap ambi ayeloman yoge kenok, ”E o,” yinuk, eeke minggi kwak, nit niniki nengge kenok eeriyak ninikilom mbakwi nogo mban eekwi, eeko nogogurak. Yi mendek ndi mendek eerit nogo logonet, maluk mban eekwi, neebi-keebi yogwe, nanini-kanini yogwe, ti mendek mban eeko nogogurak kwe, 4ninagap ndakak Ala yi aakumi ndi aakumi inabuwa nen obeelom eeppiyoorak nogo, kin ari wage nagagirik, 5ninagap nda'ninabeegerak. Nit obeelom eeko nogogurak paga ninagap nda'ninabulik o. Ata, at alik iniki nen ninabuwa mba'nuk, obeelom eeppinanege logonet, niniki maluk koorogo punuk, obaane'me ngget ndarogo pinanege, Aberiniki nen niniki ngget ogobakkigi'ninake, eereegerak ti paga ninagap nda'ninabeegerak. 6At Ala nen ninagap ndakak Yetut Keritut eereegerak paga Aberiniki ndonggok togon wo'niragagerak. 7At Ala iniki kunik nen eeppinaneegerak paga ninomaluk lek agago punuk, nit aap abu obeelom aret eerogo pinanege nagagirik, aap ambi ogoba eyate kolage minggi kwak, nit nineenik mondok-mondok logorak niniki luunik nogo kolaawok nduk, Aberiniki ndonggok togon wo'niragagerak. 8An wone yokkigi ti, abet aret o.
It aakumi Ala wone abet mbakwi nogo iniki liippunuk, yi obeelom ndi obeelom eeko logowak nduk, an yokkigirak ti, kulinik-kalinik koone omaawi paga yorage logot o Wone ti, ”Obeelom aret o,” yinuk, waganggwi paga obeelom eekkoloorak aret me, yorage logot o. 9Wone irip me op eekkoloorak lek mendek inom, ndarak alom mbininggwi inom, Muta wone mbanak paga, ”Yogop-ndogop,” yogo logonet ndugwi pugwi inom, ti eerit nogo logonet irip me time ambi eekkoloorak lek kagak we aanom warogo yogwe me, mbo puurak aret o. 10-11Aap aakumi iniki nomoninaka nogo nen abe wone mbo punuk, maluk mban eerit nage paga, ”Nenggali arigin o,” mbake logonet, eerit nage keenu me, ne mbere paga aruk wappunuk, mbo puurak aret o.
Eeke logowak nduk, wone irip paga yoreegerak wone
12An nen aap Aritemat ilik, aap Tikikut a, nappi wage neenok, o mayu kumili'nggen wambi woroorak eyom paga o Nikopolit time logorak mbakirak me, time wonage me mbet-mbet neya wa'nu o. 13Wone amburu mbangga aap Tenat nogo inom, aap Apolot nogo inom, mbet-mbet nappiya wage logonet, inamendek lek kenok, wogoranu o. 14It ninapuri ti, eyo anggen yegeelik pogom logokwak, inamendek lek kenok waganggo logowak nduk, yabu liirogon eeriyak mamunggologo logowak o.
15It aap ninom minggirak abok aret nen keyage wakkako o. Ndi, it Ala wone abet mba'nuk, ninom niniki kunik kinom wonogwe time abok aret, ”Keyage wappinagagi o,” yinuk, yoret o.
Ala kimbirak wonage me, karum aret logogin o. Naput wa!
Currently Selected:
TITUT 3: WNO
Highlight
Copy
Compare
Share
Want to have your highlights saved across all your devices? Sign up or sign in
