TITUT 2
2
Wone kole wone kenok mban mamunirage logorak wone
1Kat perak, wone mamunirage menggendak nogo wone kole wone kenok mban mamunirage logot o. 2It aap inanggok ti, iniki tum waka inom, inayuk wuka inom, iniki warak inom, it iniki abet mbakwi nu'lek menggaarak inom, aap togop mendek logowak nduk, yorage logot. Aakumi abok abet aret iniki kunik aganakwi, ndi, aaninggin inoba age kenok, inogogumbuk logonet, waganggwi, eeko logowak nduk, yorage logot o.
3It kumi inanggok ti, it eeko menggaarak liippunuk, Ala ayuk wuko logonet, eeko logowak nduk, aap inanggok yoroorak yokkigirak nogo ndak-ndak aret yorage logot o. Inambe irip paga wonok nugwi, amburu kumili aganake mendek ndonggorogon nunggwi, ti eeko logorak lek o. Ata, wone abe wone kenok mban kumi ndugum mamunirogo logowak nduk, yorage logot o. 4-5Ala wone miyuk-meya eerogo pukwak, it kumi ndugum nogo nen inogonggelomini inom, inaagalogwe inom, iniki kunik aganakwi, iniki warak ogwe, inoreewi inabuwa nen inigen tebenak nugwi, iname liirogon wonogwe, kumi obeelom inogonggelomini inabu'me logonet, inoone konenggwi, eeko logowak nduk, it kumi inanggok nogo nen kumi ndugum mamunirogo logowak o.
6Ndi, it wologwe tawe ti, togoti aret iniki warak logowak nduk, inaruk wake logot o. 7Kat paga aakumi in wakkagak eeko logowak nduk, kat yi eekak ndi eekak eeke logonet, obeelom mban eerit nage logot o. Eerit nage logonet, wone mamunirage menggendak nogo, kat koone inom nabenogo ugun-ugun yorage, kayuk lek we i'ndok-i'ndok yorage, eeke logogun o. Ata, kayuk warak logonet, yorage kenok, 8it aap koone, ”Nineebi,” kombakwi nogo nen wone maluk yorage liippaganuk, nit tebembinaniyak mbakwi kwe, lek me, it inenggali aruwak nduk, wone koleewak wone kenggali wappagarak lek nogo mendek mban yorage logot o.
9It aakumi inayeloman nogo nen inogobamini lombok inoone konembunuk, wone onggo yoraga'lek inikilom logowak nduk, yorage logot o. 10It aakumi inayeloman nogo ti, inogobamini inamendek yogot kumaariyak lek o. It nogo ti, yi eekak ndi eekak eeko logonet obeelom eerit nugwi paga aakumi ugun nogo nen ninagap ndaka Ala wone woorak mbaruwak nduk, ”Kinogobamini inamendek wagangga'lek liirogon arum logonip o,” yinuk, yorage logot o.
11Ala iniki kunik nen wo'niragagerak wone nogo it aakumi abok inagap ndaruwak nduk, kin agagerak. 12-13Ninogoba nggwok Ala ninagap ndaka Keritut Yetut wiigwi iigak, kin ari woroorak nogo, nit niniki luunik logonet, ninale'nggen paga tokkogwe niigak, Ala iniki kunik nen yo'nirage logonet, ”Kit o nggween paga yime logonet, Ala kinagabiti mbaka'lek maluk eekwi inom, nggween paga eeriyak kiniki nengge inom, mbo punuk, kiniki warak a'nuk, maluk eeka'lek obeelom mban logonet, Ala wone liippunuk, logonip o,” yinuk, yo'nirage menggerak. 14Nit yi maluk ndi maluk eeko monggoorak nogo eeko logokwak ninonggo mbanogo piinogo pinanege, ndi, at apuri at ake leenak logonet, obeelom eeriyak niniki aganggen paga eerit nugu logowak nduk, ninomaluk koorogo pinanege, eeruwak nduk, nit ninake niya wagagerak. 15Wone yi yorage, ”Yogop eeriyak ndogop eeriyak,” lengganinake, koone omaawi paga inaruk wake, eeke logot o. Ndi, aakumi abok nen kat meek eerogo pagarak lek o.
Currently Selected:
TITUT 2: WNO
Highlight
Copy
Compare
Share
Want to have your highlights saved across all your devices? Sign up or sign in
