PILEMON 1
1
PAWULUT NEN ORE PILEMON AKE LIIRU
MBANEEGERAK WONE
1An Pawulut Keritut Yetut wone yoranet nage minggirak nogo paga keele maarak logonet, ninawot Timotiyut nimbirak nogo nen, kat ninore Pilemon ninom niniki kunik eeko monggoorak nogo inom, 2nit niniriluk kwe Apipiya inom, aap Ala wone ninom piyanggo monggoorak ninore Arikiput nogo inom, Ala apuri kat kame kuwak eeko menggaarak kinom abok aret wone ambi yokkiraawi o.
3Ninogoba Ala ninowe Yetut Keritut imbirak iniki kunik nen wokkirogwe, kiniki ugun obeelom logobagip nduk, eeppinagagwi, eeko logogun o.
At Pilemon nen aakumi inabuwa mbake, iniki abet mbake, eeke kenok, wa yoreegerak wone
4-5Nore Pilemon wae. Kat kiniki ninowe Yetut oba panggombunuk abet mbake menggendak inom, it abet mbakwi Ala apuri abok aret kiniki kunik aganake menggendak inom, kabok an konengge me, tamban eeke logonet, kat koba niniki aberak wonage me, kulinik-kalinik, ”Nogoba Ala wa,” yoge minggirak. 6Kit abet mbakwi paga Ala apuri kinom monggotak kiniki ambit eeppunuk logonet, ”Ndogop ee'nakerak o,” yinuk, pagan-pagan yogwe paga Keritut kinom kunik logonet obeelom mendek eeppinagarak mbake menggerak nogo, ambinom kineenu arubagip nduk, kinake tamban eeke minggirak. 7It abet mbakwi Ala apuri kiniki kunik aganake logonet, yanggoninabit nage paga niniki kwippaneegindak me, niniki ale'nggen nggwok mbake logonet, ”Wa,” yokkigi o, noreeluk.
Pilemon nen Onetimut waawak nduk yoreegerak wone
8Togop me, an koweeluk Keritut nimbirak kunik logonet, kat ambi eeke logonok nduk, noone omaawi togon yokkiriyak op kwe, 9kat an niniki kunik lombok wonage me, noone we yanggorogon yokkiriyak ee'nake o. An Pawulut nogo aap abu nanggok agagirak o. Ndi, Keritut Yetut oone wonok yonggo nege nagagirak paga keele maa'nabeegwaarak yogondak yime logonet, 10an naput Onetimut awone nogo yokkiri o. An keele maarogo mambiigo menggam yime logonet, an naput negen agagirak me, 11aa'nduk, at kimbirak eerit noorak meek wonogogutak kwe, yogondak perak, kat kunduk, an kunduk, ninom eeriyak op lombok agaarak kagarak me nduk, yokkigi o.
12Yogondak keya woraawak nduk, kowagam nappi wagi ti o. Ndi, at eebe wage logonet, an niniki inom nikkenok wage agaarik o. 13An obeelom wone yorage nagagirak nogo paga keele maarogo mambiigo menggam mambaneegwaarak yime wonage me, at kat kobaane'me an narum yime nimbirak logorak op aret mbakirak kwe. 14Kat unde nen, ”E o,” yo'nega'lek me, obeelom eeppaniyak mbakendak kero, kiniki mba'nuk en, ”An eeppanuwam,” noone omaawi paga yokkirigin lek o.
15-16Yogondak at keya wage nogo ti, aap inayeloman pogom keya wage ti lek o. At aa'nduk mbaganeegerak nogo ti, we ne ambit iluk mbo paganuk mbaganeegerak kero. Ndi, yogondak perak, kat kore iniki kunik lombok logowak nduk wage me, mondok-mondok waamen o. At nimbirak ti, niniki mondok kunik kwe, kat kayeloman aret me, ndi, at kunduk Keritut ninom niniki kunik logonet, keya woraagin me, mbo puurak mage o, noreeluk.
17Togop me, kat nimbirak ndak-ndak abet mbareegurak me, ”Nore Pawulut aret o,” yinuk, an wo'naburak mbake nogo kokwak, at aret waamen o. 18Aa'nduk kimbirak logonet, maluk ambi eeppagage, kamendek ambi wagangge, eereegerak kenok, at yoriyak lek o. An nobaa-lombok me, an aret yo'nirumunggun o. 19”At Pawulut nen yoga'lek kagak liiru mbanggerak o,” mbake keyo, ”An Pawulut nen aret onggo wokkirigin o,” wone ambit iluk ti, an neenggi lombok paga aret liiru mbanggigi o. An wone yokkireegirak paga kiniki abet mbareegindak nogo ti, nanomat mbanak pogom koba wonage me, ambi yi inom koba pagakit lak kwe, mbo pigi o. 20Ai, noreeluk. Yokkigirak abet aret eeke keenok, ”Yi Ala nen iniki koonggerak paga eeke,” komba'nuk, niniki ale'nggen ee'nabuwak nduk, at eebe waamen o. Nimbirak Keritut apuri mban aret me, niniki yanggonogo panenok nduk, yokkigi o.
21An liiru mbanggege yi nogo mban kat eeke logonok mba'nuk, yokkege ti lek o. Ata, ando kat kiniki nen koombunuk ambinom nggwok togon eeke logomunggun abet aret kombake logonet mbanggigi o. 22Wone yokkigirak ti, eeke logonet, kit an nake tamban eekwi Ala aruk konembunuk, an kiya woraakit nduk, koonnabigin abet aret mbake me, woraanuk nogo yuurak o ambi ogobakkigirogo panege logot o.
Age yobok paga keyage wappereegerak wone
23Aap Epaparat Keritut Yetut wone yorage nagagerak nogo paga keele maarogo mambiigo menggam mambereegwaarak yime nimbirak logonet, keyage wakkako o. 24Ndi, nawurilogwe ninom eekwi nogo, inendage Marukut kunduk, Aritarikut kunduk, Ndemat kunduk, Lukat kunduk, nit abok aret nen keyage wakkako o.
25At ninowe Yetut Keritut kimbirak wonage me, karum aret logogin o. An Pawulut Timotiyut nimbirak nen abu aret yokkogo o. Wa!
Currently Selected:
PILEMON 1: WNO
Highlight
Copy
Compare
Share
Want to have your highlights saved across all your devices? Sign up or sign in
