TITUT 1
1
PAWULUT NEN APUT TITUT AKE LIIRU
MBANEEGERAK WONE
1-4Naput Titut wae. Nit abok wone abet mbakwi nogo paga naput abe mendek kat aret me, it aakumi Ala nen miirinabeegerak iniki abet mbakwi wone nogo wigangge, ndi, nit wone waganggo monggoorak, ”Yi abet aret kagi,” yinuk, mbakwi, eeruwak nduk, an Pawulut Ala ayeloman Yetut Keritut nen nappiigak mendek agago mippaneegerak nogo nen aret yokkiri o. Ala pilit arilik abet mban ari menggerak nogo nen, ”Mondok-mondok ineenik logogun o,” yinuk, o yi wakkaga'lek kagak, koonogo pereegerak nogo, ee'nabuwak nduk, niniki luunik logonet, yokkiri o. Niniki luunik wone ti, maan togon koonogo pereegerak kwe, ”Ndiyom paga kin arigin o,” mbareegerak nogo an yogondak abe wone yorage logowak nduk, ninagap ndaka Ala nen unde eeppaneegerak nogo aret yorage neegak, wone nineenik ee'ninaburak wone ti inom yorage paga kenom aga o.
Ninogoba Ala ninagap ndaka Keritut Yetut imbirak iniki kunik nen wokkugwi, kiniki ugun obeelom logonok nduk, eeppagagwi, eeko logogun o.
Titut o Kerete logonet, eeke logorak yoreegerak wone
5An eeka'lek kagak wagagirak nogo eeke, ndi, o tini lombok ambime-ambime Ala apuri unde logowak nduk, ”Aap ti mendek mippiyoorak,” yokkereegirak nogo mippiige, eeke logonok nduk, kat o Kerete time keegak, an wagagirak nogo o. 6Ala apuri unde mippiyoorak nogo ti, aakumi inoone inoba pugulik kenok, inakuwi ambit wogo kenok, inapuri ndaganakaarak nogo aakumi nen, ”Aap yi inapurilogwe nen ugun-ugun eerit nugu logonet, inagalomini-inogobamini inoone taganogo piigwi kwe, inaruk wakwi lek kiraap!” yogolik inapuri Ala wone abet mba'nuk eeko menggaarak iinok mban inogobamini mippiyoorak op o. 7It aap aakumi inarum logorak nogo ti, Ala wone unde me, maluk eeke kenok aakumi inoone inoba piyookwak, obeelom mban eerit nugu logowak o. It koonggwi mban eeriyak mbakwi, inanini mbet-mbet wungge, amburu kumili aganake mendek ndonggorogon nunggwi, ndugwi pugwi, aakumi inawu kolaawok nduk, wiwi aganakwi, aap ti mendek eeko menggaarak kenok, mippiyoorak lek o. 8Ata, aap inanoniya laka kenok, obeelom eeriyak inikilom mbaka kenok, iniki warak kenok, aap maluk eeka'lek abu abe kenok, Ala wone liippunuk eeka kenok, eeriyak mban eeke kagak kwe, iniki yungguppunuk, puk aga kenok, aap ti mendek mban mippiyoorak op o. 9Wone kole wone ti, it konenggo menggaarak abet mbaruwak nduk, lengganogo yorogwe, abe wone woorak ineebi mbakwi nogo wawak nduk, wone kenaarogo yorogwe, eeko logowak nduk, abe wone nogo paga niniki panggombunuk, waganeegurak wone nogo it ndak-ndak iniki panggombunuk, nggirik-nggerok porogo wonogwe iinok mban mippiyoorak aret o.
10Wone, ”E o,” yinuk, konengga'lek logonet, inoone amburu puk-puk agan nugwi, aakumi inambokan laganggwi, eeko menggaarak ti, it ineebe apit aret kwe, it inagabolo mbanak abet mbareegwaarak nogo perak, abe iyagalo eeko menggaarak it aret o. 11It aap ti, inenggali ariyak kagak, yi mendek ndi mendek kolaawok nduk, wone mamuniyak lek mendek kagak mamunirogo logonet, aap ambi owe-awot apit inom iniki abut lagak-mbagak aganabit nogo menggaarak me, inoone mondok lek eerogo piyet o. 12Aap ti mendek inoone yorogo menggaarak ambi nen ari logonet,
”It aap o Kerete mendek mondok pilit pugunggo logonet,
nggwiya nen yiwi-yawi ari logonet nibingge menggerak
pogom eeko menggaarak.
Ineenggi lobanakot inaalom mban koleewak menggaarak o,”
yinuk, 13-14yereegerak nogo ti, abet aret yereegerak o. Togop me, it aap ti, wone abet mbareegwaarak nogo mondok nu'lek logonet, porogo logowak nduk, aakumi Yakuri inawoneelom mbininggo menggaarak wone inom, it aap Ala ari menggerak wone mbo punuk, iniki ugun koombunuk, ”Yogop ee'nu, ndogop ee'nu,” agan nugu menggaarak wone nogo inom, ”Liippuurak mage o,” yinuk, koone omaawi paga inaruk mondok waru o. 15It aakumi iniki obeelom menggaarak kenok, it inigen me yi mendek ndi mendek obeelom mban aret kogo menggaarak. Ndi, it aakumi abet mbaka'lek maluk mban eeko menggaarak kenok ti, eeriyak inikime abe'nage, koonggwi, ti maluk mban aret me, it inigen me yi mendek ndi mendek maluk mban aret kogo menggaarak. 16It aap ti, pilit wone yogo logonet, ”Ala nineenu o,” yogo menggaarak kwe, it eerit nugwi paga nen, ”Ala nineebi o,” mbako logonet, yogwe yelok iigo monggoorak. Ala wone konengga'lek taganogo pit nogo logonet, obeelom ambi eekwi lek, maluk mban eekwi me, inogole warak aret mbako logowok o.
Currently Selected:
TITUT 1: WNO
Highlight
Copy
Compare
Share
Want to have your highlights saved across all your devices? Sign up or sign in
