OROMA 1
1
AAKUMI OROMA MENDEK INAKE LIIRU
MBANEEGERAK WONE
1At Ala nen an Pawulut nogo, Keritut Yetut ayeloman nappiigak mendek a'nuk, at oone obeelom wone yoranet nege logowak nduk, leenogo mippaneegerak me, wone ambi yokkira o.
2Obeelom wone ti, eebe o maan Ala nen, ”Peebi obeelom wone konenggo logogun o,” yinuk, it Ala wone yorogo nogogwaarak nabi-nabi nogo, yorage kagak, it nogo nen aakumi yorogwe, ti'nuk, Ala wone yereegerak liiru mbanggo logonet, wone obeelom wone nogo inom mbanggwi, eeko nogogwaarak. 3Wone obeelom wone ti, Ala aput Yetut Keritut eereegerak wone nogo aret. At eebe ti, Ndawut ombooluk abe aakumi aret nda'nagagerak kwe, 4Ala nen kambunuk nogo menggam nen eenik agago mippereegerak paga, at maluk eeka'lek iniki mondok obeelom, Ala aput ayuk warak aret menggerak nogo kin agagerak. 5Ninowe Yetut Keritut eereegerak paga, Ala nabuwa nen eeppanege logonet, yi aakumi ndi aakumi obeelom wone iniki abet mba'nuk liirogon waganggo logowak nduk yorage, Yetut Keritut endage tiyappit nage, eeke logowak nduk, an neyabu nappiigak mendek agago unde eeppaneegerak. 6Eeppaneegerak me, kit Oroma mendek togon at Yetut Keritut apuri arubagip nduk, miirogo pinagareegerak o.
7Ndi, kit Oroma mendek abok aret kit abet mba'nuk at apuri arubagip nduk, at Ala nen kineebe at iniki kunik logonet, miirogo pinagareegerak kenok, yokkirage agarik o.
Ninogoba Ala ninowe Yetut Keritut imbirak iniki kunik nen wokkirogwe, kiniki ugun obeelom logobagip nduk, eeppinagagwi, eeko logogun o.
At Pawulut nen, ”Ala wa,” yinuk tamban eereegerak wone
8Wone aa'nduk lombok yigin nogo ti, kit abok kiniki abet mbakotak nogo, kinabok yi awi ndi awi wiganinuk nage kenok, Yetut Keritut eereegerak paga, ”Nogoba Ala wa,” yoge agarik o. 9An tamban eeke minggirak me, eeke logonet, kinoba mari ageelik kulinik-kalinik eeke minggirak ti, at Ala eenu aret o. Neebe apit nggaruk togon Ala wogo'nuk mugurok nage logonet, obeelom wone at aput eereegerak wone nogo yoranet nage minggirak. 10An pekkiya woroorak mbake minggirak me, yogondak pekkiya woroorak nduk Ala iniki mba'nuk tu koonogo panuwak nduk, tamban mban eeke agarik. 11Kiniki kole aruwak nduk, Ala nen an eeppanegerak ambi kit yokkiraakit nduk pekkiya woroorak uugwe lombok mbakirak. 12Pekkiya woroorak mbakirak nogo ti, wage logominggirik, kit ninom time logonet, it inom, an inom, niniki abet mbakoorak nogo, niniki eyak wat-wat eekkolaagun o.
13An maan nen it endekem konenggulik ando yi awi ndi awi time yoranet nagagirak waganeegwa kwak, kit togop aret wabagip nduk, yokkira woroorak koongge nagagirak kwe, ambi yiluk yegerak kenok, ”Puk agaarak kagi,” mbarubagip nduk, yokkiragi o, noreewi. 14It Yunani mendek inom, it aap ando endekem konenggulik mendek inom, ndi, it yi eekwi ndi eekwi ineenu inom, ineenggo'lek inom, abok aret obeelom wone yoranet nege logorak aaninggin noba wonage me, yoranet nege logogin aret o 15Togop me, an niniki nen obeelom wone wonok, kit o Oroma mendek yokkira woroorak uugwe mbake agarik o.
Wone obeelom wone ti, Ala omaawi aret o
16Obeelom wone ti Ala omaawi aret me, aa'nduk it Yakuri mendek inom, ti'nuk, peebi Yunani mendek inom, aakumi abok aret abet mbakwi iinok, inagap ndake menggerak me, wone obeelom wone ti, an nagabiti lek logonet yokkirage agarik o. 17”Aap ambi abet mbake kenok, Ala nen obeelom agago pemenggerak me, eenik aret logogin o,” yinuk, yereegerak liiru mbanak nogo ti, Ala nen nonggop togon aakumi iniki koonogo obeelom eeginake menggerak nogo wone obeelom wone ti paga aret nineenu age menggerak. Ala nen aakumi obeelom eeginake nogo ti, abet mbakwi paga mban aret o.
Aakumi inogogumbuk logonet, maluk eekwi iinok, Ala nen maluk aganaburak wone
18It aakumi iniki maluk nen maluk mban eerit nogo logonet, Ala ndogop menggerak wone aakumi waganggwi iyo nduk, non mbambiigo menggaarak me, Ala agi mbogut paga nen anini wuppi wagaatak kin age paga nineenu age menggerak. 19At Ala nen yelok neyaawak nduk eebe kin age menggerak kwe, liippega'lek iinok, Ala anini inoba piige menggerak. 20Maan Ala nen o yi wakkagagerak kuli paga nen, yi mendek ndi mendek wakkagagerak nogo paga, Ala eebe omaawi ambik mondok itok menggerak kin koorak aret wonagagerak kwe, kaga'lek wonogogwaarak me, it aakumi nen inaane'le mbanggolaawok nduk, wone onggo yuurak lek aret. 21It Ala ineenu aret logonet kwe, ”Ti at Ala aret o,” yinuk, wogoppugwi, ”Ala nogoba wa,” yinuk, keyage wakwi, eekalek logonet, iniki lek negen we ugun aret koonit nugwi me, it iniki o apit negen kobak aago wonogwe. 22It nogo nen, ”Nit abok nineenu aret o,” yinuk, wogoppatit nugwi kwe, ineenggo'lek wi negen logonet agan nugwi o. 23At Ala eenik itok mondok menggerak wogoppogo menggaarak nogo mbo punuk, obaane'me aakumi inom, towepagi inom, woret-waalo inom initinggen ndak-ndak ogobakkigirogo punuk, wogoppogo menggaarak.
24Togop eeko nogogwaarak paga, it iniki nen uugwe mba'nuk, abu maluk eerit nugu logonet, it-it ineebe aret maluk eekkologo logowak nduk, Ala nen teppiyareegerak. 25Ala eebe abet aret wonage wone nogo, mbo punuk, pilit aret, ”Ala ndogop wonage o,” yinuk, waganggo nagaatik, ogobakkigika abet aret mondok-mondok wogoppogo logorak nogo ti, mbo punuk, yi mendek ndi mendek ogobakkigirik nogo mendek mban alut eerogo wogoppogo nogogwaarak.
26-27Togop eeko nogogwaarak me, iniki nen nengge nogo mugurok nogwe paga inenggali kaawak nduk, Ala nen teppiyareegerak. Teppiyareegerak logonet, it aap nen kumi aret piginako menggaarak kwe, it aap-aap aret aganggen eeginake kenok, inenggali lek aret wut-wut yogwe, ndi, it kumi nen aap iigak, kumi mban-mban wut-wut yogwe, eeko menggaarak ti, eeriyak kagak, alik mendek eeko menggaarak me, Ala nen onggo maluk aret eeginake menggerak.
28Ndi, it nen, ”Ala ti abet aret wonage,” yuurak ineebi mbako nogogwaarak paga, iniki lek negen a'nuk, eeriyak lek mendek kagak, eeko logowak nduk, Ala nen pulunogo mbo piyareegerak. 29Ti eeko logonet, yi maluk ndi maluk alitik-alitak lombok ambik aret eeko nogogwaarak. Eeko logonet, maluk mban eerit nugwi, uugwe-uugwe mbakwi, inogogumbuk logonet agan nugwi, neebi-keebi yogwe, aap wakwi, yawi pugwi, inambokan laganggwi, inanini agaket yogwe, togot-togot wone yogwe, 30nabok-kabok yogwe, Ala inom ogoorak wonogwe, worokot-laakot agan nugu logonet, ”Aap nggwok eekkola,” yinuk, wogoppatit nugwi, maluk eeriyak iniki mondok nggaganak wonogwe, inagalomini-inogobamini inoone taganggwi, 31iniki lek logonet, wone yoragaatak liirogon eeka'lek mbo pugwi, inabuwa mbakulik inogogumbuk wonogwe, 32ti, eerit nugu menggaarak nogo ti, Ala nen, ”Yogop eerugup, ndogop eerugup,” yereegerak nogo mendek eekwi iinok, ”Mondok inoorigin o,” yereegerak nogo ineenu logonet kwe, eerit nugu logonet, ”Nit mban eeriyak lek o. Ata, it ando ninom aret eeruwok o,” yinuk, eerit nugwi me, Ala mondok inoorigin o.
Currently Selected:
OROMA 1: WNO
Highlight
Copy
Compare
Share
Want to have your highlights saved across all your devices? Sign up or sign in
