NAPPIYAREEGERAK 28
28
Pawulut o Malata wonagagerak wone
1Obeelom aret aa'nggi paga wundi nogo nogogurik, nggween kup mbanak logonak endage Malata yogo mbareegwa, ”E, yi Malata aret kagi,” mbareegurak. 2Wundi nogogurak me, mayu wage logonet tero ambik ninooreegerak me, it time mendek nen ninabuwa nggwok mbako nogogwaarik, kani kumbunuk, keyage warogo tero wora ninabeegwaarak. 3Ndi, at Pawulut kani aretop anebeninuk wage nagagirik, kumbege me, kani eyak nen waalo nggigik togon wungge logonet, eenggi eyak kunik wonage mbareegi, 4it aakumi time mendek nogo nen waalo eenggi eyak kunik wonage inigen kogo nogogwaarik, ambi yagak yogo logonet, ”Aap yi, niyoome nen obeelom wundi wagaarak kwe, waalo eyak wakerak yi paga aap inooke menggerak kin kogoorak me, eereegerak onggo wogoriyak eyom agaarak me, kambigin aret o,” yereegwaarak kwe, 5waalo nogo eenggi yombak togon agago kani kunik me mambereegerak kani nengge kagak, andi yagan waka'lek obeelom aret wonagagerak. 6It nogo nen, ”Eenggi piike logominggirik, ti eyom aret kambigin,” mba'nuk, inigen wonogogwaarak mendek, kangga'lek mbareegi, ”Aap yi kugi aagaluk aret kagi,” yinuk, yereegwaarak.
7Aap Pubiliyut inowe endagembogut eyabu me time nda lek koorok aret me, ka nogo mbareegu, keyage wappinanege nagagirik, iniki ale'nggen paga ninabugo lappunuk, ninom obeelom wonogwe niigak, nogo kenagan yereegurak. 8Nogome logonet, at Pubiliyut ogoba inikime kani pege nagagirik, aanubut eeke, andi ame wonage, eeke me, at Pawulut nogo ka nage nagagirik, anobak eenggi pippunuk tamban eeke mbareegi, obeelom aret agagerak. 9Ti eeppege nagagirik, it aakumi andi ando time mendek at owagam wogo mbareegwa, obeelom eeginabeegerak. 10Eeginake mbareegi, it aakumi nogo nen, ”Obeelom ee'ninakerak o,” yinuk, yi mendek ndi mendek wo'nira wagak eeko nogogwaarik, ti'nuk, peebi nit nawok nduk eeko mbareegu, yi mendek ndi mendek lek kero, wonok yiiro me mambereegwaarak.
Pawulut o Malata nen Oroma unggwi nagagerak wone
11Tut kenagan penembunuk, it aakumi o Alekandiriya mendek inaro ambi endage Kulu'mbere tooneegwaarak me, o tero nggut-nggut eeke kenok, tokkogo nogogwaarak nogome aret unggunuk, nogo nogogurik, 12o Tirakuta ari nogo nogogurik, time nogo kenagan yereegurak. 13Nogo kenagan yippunuk, yiiro paga unggunuk, nogo nogogurik, o tini nggwok Eregiyum ari noggurak. Nogo nogogurik, nogo ambi yippunuk, selatan time nggwe nen wiya nabuninuk eeke kagak, o Putiyoli nogo yi nogogurak. 14Nogo nogogurik, it Ala apuri time mendek ninom lambumbogo nogogurik, ”Ninom logowok o,” yinuk, yo'nirogo mbareegwa, ninom nogo 7 yereegurak. Togop eerit o Oroma aret unggwi nogogurak. 15It Ala apuri time mendek nogo nit wogwe inaruk konembogo nogogwaarik, kunggo menggam o Apiyut inom, o Kenagan Wurik Me Mbi Kunogo Nonggo Menggam nogome inom, o ndaanda negen time wo'ninabi wogo mbareegwa, at Pawulut enegen iige nagagirik, ”Nogoba Ala wa,” yinuk, iniki ale'nggen agagerak.
O Oroma logonet, eereegerak wone
16O Oroma time unggwogo mbareegu, aap eegin warak ambi arum logowak nduk mippereegerak nogo at Pawulut imbirak inalik logowak nduk, o ambi unde eeppereegwaarak.
17Nogo kenagan yippunuk, at Pawulut nen it Yakuri inoweewi time mendek nogo inayonggo pereegerak kuwak ogo mbareegwa, yorage logonet, ”Nowe-nawot o. An nowe-nawot inoone inom, ninombomini eeko menggaarak inom tagangge logolik aret kwe, O Yerutalem time nen neebe pigogo keele maa'nako nogogwaarik, it Oroma mendek nen nawone mbanuwak nduk, nappani wogogwaarak. 18An eekirak alom kwaako nogogwaarik, maluk eekwi iinok, inooko menggaarak nogo mendek noba lenggenak ambi lek kenok, piinogo paniyak nduk eereegwaarak kwe, 19it Yakuri nogo nen, Piinogo teppuurak mage o, yinuk, nabenak mban yogo mbareegwa, Kayitat nen mban nawone amburu mbanuwak o, yoragagirak. Ti yoragagirak nogo ti, It nowe-nawot nen maluk eeppanegaarak o, yinuk, yokkirikit nduk, yoroolik o. We, nawone amburu mbanenok nduk, yoragagirak o. 20Wone ti aret yokkiraakit nduk, wage nagarik, Woraawak o, yinuk, kinayonggo pigirak. It Yakuri iniki luunik menggaarak nogo paga mbuti keele maa'nabeegwaarak wone yokkiraakit nduk kinayonggo pigirak o,” yinuk, yoragagerak.
21Yorage mbareegi, it nogo nen, ”Kat eereegindak wone ambi Yureya nen liiru mbanogo nappi wagaarak ambi koolik o. Ndi, it Ala apuri time nen wogo nagaarik, wone ambi yo'nirogwe, Pawulut maluk eekerak o, yinuk, yo'nira wogwe, eerulik mban kwe, 22kit wone yogo monggotak ti, aakumi yi awi ndi awi nen abok aret ineebi kinombako menggaarak nineenu me, kat kiniki nonggop mba'nuk ari menggendak? Ari keyaawok nduk wogo o,” yinuk, yoreegwaarak.
23Yogo nogogwaarik, ne ambiyom yo'niraawak nduk koonogo pereegwaarak nogo eyom ari wage mbareegi, at Pawulut wonage me aakumi ambik kuwak ari wogo mbareegwa, at Pawulut nen o kuubondendok nen Ala abu'me piyoorak wone nogo amburu liirogon mbanogo yorage, ndi, Yetut eereegerak wone nogo liirogon ineenu aruwak nduk, Ala wone lengganak Muta ari nagagerak inom, it Ala wone yorogo nogogwaarak nabi-nabi nen yogo nogogwaarak inom, mbininogo yorage, eeke tit kagak, o kiyoma agagerak. 24Yoragagerak nogo it ando nen, ”Abet yigi o,” mbakwi iigak kwe, it ando nen perak, abet mbaka'lek wonogogwaarik, 25piinggak-nonggokak yogo nogogwaarik, mbaganuwok nduk eekwi iigak, at Pawulut nen, ”At Aberiniki nen yoge kagak, Yetaya nen kit kinombomini yorage logonet,
26-27It aakumi yi inigen kogwe, inaruk konenggwi,
iniki liippatinuk yunggup-melak eekwi,
eekwi iinok, an nen obeelom eeginake neyo,
Ninogogumbuk age, ninaruk logu ogwe,
ninigen kubu nogwe, eeruwok o, yinuk,
miikkolagaarak me,
kinaruk konenggak mban eerumonggotak kwe,
liippatumunggup lek o.
Kinigen kagak mban eerumonggotak kwe,
yelok kaamunggup lek o,
yinuk, ora nak o.
yinuk, yereegerak nogo ti abet aret yereegerak kagi o,” yorage nagagirik, 28”At Ala ninagap ndariyak wone yi nogo ti, it endekem mendek konenuwak nduk yora nagun aret me, it perak, konenugun aret mbako logonip o,” yinuk, yoragagerak.
30Oonegen lagangge-wangge 2 tahun eeke kagak, onggo punuk nogome wonage me, at owagam wogwe iinok, abok aret keyage wappiige nagaatik, 31Ala abu'me piyoorak wone yorage, ninogoba Yetut Keritut wone mamunirage, eeke logonet, ”Nonggop yo'nugwi iigak, yumun?” mbaka'lek mondok pagak togon mban yorage nagagerak.
Currently Selected:
NAPPIYAREEGERAK 28: WNO
Highlight
Copy
Compare
Share
Want to have your highlights saved across all your devices? Sign up or sign in
