WAYU 9
9
1Naruk konengge nagarik, melaikat ineebe 4 inaluu'ngget oone eeko mbaka, ti'nuk, ambi eeke kagak, aap ambi laaluguragan negen mbogut paga nen nggween paga wambi wagagerak nogo nen mbuun ambena ogu kiiniki paga lombok tu paaruwak nduk, kunci wogoge kagarak o. 2Wogogerak tu paake mbaki, yugum yugu ka'luk yonggo-ndonggo eeke minggi kwak, mbuun ambena nen ka'luk alik negen lagi wage logonet, oonegen inom, o oolo yi inom, apit eerogo pege kagarak. 3Kage nagarik, ka'luk enggela'me nen wurin ambik lagi wogo mbaka, nggitamuru nggween maale negen eyak inooketak andi kogo mengga kwak, wurin nogo nen aakumi ineyak mbaninabit nogwe paga andi yagan wako logowak nduk, inomaawi eeppiige kagarak. 4Inomaawi eeppiige nagaarik, ”Iri'ngga-kale'ngga inom, igale inom, yi mendek ndi mendek ki wonage nogo abok aret kineyak lelenogo nenet nogo logorak mage o. Ata, it aakumi Ala nen leenogo piinok, amburu inenggaawak paga labunik lek iinok mban kineyak mbaninabit nogo logonip o. 5Ineebe mondok-mondok kambuwak nduk, nibininaburak ti mage o. Ata, we andi yagan wakwi iigak, tut 5 penenuwak nduk, kineyak mbaninabit nogo logonip o,” yinuk yorage mbaki, nggitamuru nogo nen ineyak mbaninakaatak andi yagan wako mengga kwak, ndak-ndak aret ineyak mbaninabit nogwe iigak, andi nen yagan yobak-nggolak warit nogwe iigirak. 6Ti eyom paga it aakumi andi nen yagan wako logonet, ”Nggarurogon kambuwok lak ao,” yinuk, inowe-inawot nen mondok-mondok inooruwak nduk, yoramenggaarak kwe, Ala nen kambuwak nduk, aganabigin lek me, kangga'lek we ineenik ngge-ngge yagan wakwi mban logogun o.
7-9Wurin nogo ti, inetenggen aap kokwak kwe, ineeruwak ti, kumi ineeruwak laanak nogo pogom. Ndi, ineyak ti, nggeewo singa eyak nogo pogom iigirak. Ndi, wam kunda amborowak paga kwi'na'nuk wim namburuwok nduk, li'luk eerogo piigo mengga kwak, it wurin ineebe nogo ti, togop aret li'luk eerogo piige logonet, nggare-nggare mbuti emas paga ogobakkigirik inom, tin mbuti omanggen paga yarak inom, yirippiinok, wim namburuwok nduk, wam kunda nggweendo paga mbarembunuk, niikkenok wim endok kuni unggwogo logonet, wam kunda apit me iniyogobit oonembogu nogwe konenggo mengga kwak, wurin nogo wuga agan nogo logonet, ina'naabit oone ti, togop aret agan nogwe iigirak o. 10Ineyak ti, nggitamuru ineyak nogo pogom me, ineyak aakumi mbaninakwi iinok, andi nen yagan wakwi iigak, tut 5 penengge kagarak. 11Ndi, at melaikat o mbuun me unde menggerak nogo ti, it wurin inowe endagembogut inarum menggerak at aret o. At endage ti, aakumi Iberani inoone paga, ”Abaron,” yogwe, ndi, Yunani inoone paga, ”Apoliyon,” yogwe, eeko menggaarak. Ndi, nit ninoone paga ti, ”Pup Eerogo Piiga o,” yinuk, yogo monggoorak.
12”Kinabuwa o, yinuk, ne kenagan paga ari konenggendak nogo ti, ambi wurin nen muk eeke kagandak kwe, mbere ti awo eeka'lek me, kenegen logot o,” yinuk, yo'nege kagarak.
13Yo'nege mbaki, nenegen wonage me, melaikat ambi 6 nogo aluu'ngget oone eeke mbaki, Ala abu'me kemenyan amburu kani kunggo menggam mbuti emas paga ogobakkigirik irip-irip wam ndomba eyak negen 4 to ari wonage nogo, 14ambi nen luu'ngget unde melaikat 6 nogo yoge logonet, ”Melaikat ineebe 4 niyo nggwok Eparat aa'nggi paga keele maarak wonogwe nogo, mbet piinogo nappiyet o,” yinuk, yoge mbaki, 15it melaikat ineebe 4 nogo, tahun ti paga inom, tut ti paga inom, ne ti paga inom, oonegen ti paga inom, mondok ndak-ndak ari nage kenok, aakumi ando mogonogo teppiigo logonet, ando 1/3 nogo inoorit nogo logowak nduk, pippuk eerogo piyareegerak nogo aret inoorit nogo logowak nduk, piinogo teppiige kagarak. 16Kage nagarik, ”It aakumi yigin unde wam kunda inamborowak paga kwi'nogo nagaarik, wim namburi nagaarak nogo ti, ineebe 200 juta (200,000,000) aret o,” yinuk, ari naruk konenggirak. 17Ndi, kunda inom, aap ineebe kunda inamborowak paga kwi'ndak wonogwe inom, iigirak nogo yi o. Inarin nogo ti, kani kunik kere ari, mbogut mili kibu-kibu pege, ndi, yaliingga yi'nip kere ari, eeke nogo pogom, inarin etenggen togop aret kagarak. Ndi, kunda inanobak nogo ti, nggeewo singa anobak nogo pogom aret me, kugi lengga ndo warogo pit nawak nduk, inambeme nen yugum aan etenggen yaliingga yi'nip nogo pogom inom, kani omoonuk inom, ka'luk inom, wundi wage kagarak. 18Inambeme nen wundi wagaarak nogo paga nen, kugi lengga ndo warogo pit nagaarak me, aakumi ando mogonogo teppiige logonet, ando 1/3 nogo kugi andi nen mondok kambit nogwe iigirak. 19It kunda inage waalo muru anobak warak nogo pogom nen aakumi inoorit nogo nagaarak me, inambe inom, inage inom, ti mondok omaawi ambik aret iigirak o.
20It ando andi nen kambulik teppiigerak ineenik wonogwe nogo nen, ”Nit togop aret kambit nogwe niyo, ninaguguwak nogo ti, yi mendek ndi mendek inigen kogwe, ninoone inaruk konenggwi, tu nogwe, eekulik kagak we aanom warogo mbuti emas paga inom, mbuti perak nogo paga inom, mbuti tembaga etenggen kunik negen nogo paga inom, yugum paga inom, i paga inom, ogobakkigirogo punuk, kugi inendage tiyappiigwi, 21aakumi inookwi, magagirak inookwi, kumi ugun wurinakwi, yogoot waganggwi, eeko monggoorak abok aret mbo punuk, niniki koonuwi o,” yinuk, yuurak op aret kwe, mbo pega'lek iniki kundugu logonet, eerit nogwe iigirak.
Currently Selected:
WAYU 9: WNO
Highlight
Copy
Compare
Share
Want to have your highlights saved across all your devices? Sign up or sign in
