WAYU 10
10
Melaikat nen mbuku mbuuluk pirik-perek aago pekkage kagagerak wone
1Eekwi nogo iige nagarik, ti'nuk, melaikat alilaakwi ambi ndugwi nogo ayum negen pirik-perek eerak mbogut paga nen wambi wage kagarak. Anobak paga luwore negen nggare-nggare yirik logonet, etenggen ti, oonegen pogom, ndi, iyok ti, i yinik paga kani wunuk ari nogo pogom logonet, 2mbuku mbuuluk pirik-perek eerak ambi eenggime mbigamborogo wonage kagarak. Iyok abe'nggan niyo nggwok yenggenak ogombaga pege, ndi, iyok kwaare'nggan nggween paga pege, eeppunuk logonet, 3nggeewo singa oone mondok ku ari minggi kwak, oone nggwok ari mbaki, o oone ne 7 paga ngguurubu ari naruk konenggirak. 4O oone ne 7 paga ngguurubu ari naruk konembunuk, ari nogo liiru mbanikit nduk eeke me, mbogut paga nen oone ambi yo'nege logonet, ”O oone 7 paga ngguurubu ari konenggendak nogo ti, liiru mbanugun o. Ata, kinikime mban kumaapporogo logot o,” yinuk, yo'nege mbaki, 5melaikat iyok ambi niyo nggwok yenggenak ogombaga pege, ndi, ambi nggween paga pege, eeke kagarak nogo nen, abet aret ari mbaruwak nduk eenggi abe'nggan mbogut paga nippunuk, 6-7at mbogut, nggween, niyo nggwok yenggenak, yi mendek ndi mendek abok aret wakkagagerak mondok-mondok itok eenik menggerak nogo endage kungge logonet, ”At Ala nen, Kit nagote wone kumaarak nogo ando yokkiragagirak kwe, irip pagaluk ando kumaarak wonage nogo, peebi kineenu arumunggup o, yinuk, at ayeloman nabi-nabi yoragagerak nogo ambinom kumaapporogo logogin lek o. It melaikat ineebe 6 nogo inambuti luu'ngget oone muk eekaarak kwe, ambiret 7 nogo ti, awo eeka'lek me, eeke kenok, wone nogo pagak yigin o,” yinuk, ari naruk konenggirak.
8Naruk konengge nagarik, ti'nuk, mbogut paga oone ambi yo'nege kagarak nogo nen ambinom yo'nege logonet, ”At melaikat iyok peenok nggween paga, ndi, peenok niyo nggwok yenggenak paga punuk mi'ndak mbuku mbanak eenggime mbigamborogo wonage ti, kola nak o,” 9yo'nege mbaki, melaikat nogo owagam nage nagarik, ”Mbuku mbuuluk ti, wo'niru o,” yoge mbaki, at nen wo'nege logonet, ”Waganogo namen o. Nengge logominggindik, kambe paga nggiin amburu negen ombat abe kaamenggendak kwe, kaanagale paga perak, ale mbere agan nage kaamunggun o,” yinuk, yo'nege mbaki, 10mbuku nogo waganogo nengge nagarik, nambe paga nggiin amburu negen ombat abe kagarak kwe, naanagale paga perak, ale mbere agan nage kagarak o.
11Mbuku nogo nengge mbaki, mbogut paga oone yo'nege kagarak nogo nen ambinom yo'nege logonet, ”Aakumi inanebunu alitak lombok inom, inagabolo alitak inom, inoone alitak inom, aap inendagembogut inom, yi aakumi ndi aakumi apit aret wone yi abok aret yorage logonu o,” yinuk, yo'nege kagarak.
Currently Selected:
WAYU 10: WNO
Highlight
Copy
Compare
Share
Want to have your highlights saved across all your devices? Sign up or sign in
