WAYU 8
8
Age yobok togon keele 1 maarak nogo piingge mbareegi, eeke kagagerak wone
1Ndi, age yobok togon keele aa'nduk maarak 1 nogo piingge mbaki, mbogut paga time inoone inom, inabolok inom, mondok lek puk wonogwe iigak, setengah jam age mbaki, 2it melaikat ineebe 7 Ala abu'me mi'ndak menggaarak nogo inambuti luu'ngget 7 wogorage kagarak.
3Kage nagarik, melaikat alik ambi togolowak mbuti emas paga ogobakkigirik eenggime wonok, Ala aanggo warogo kani kunggo menggam mi'nari wage mbaki, ”It abet mbareegwaarak Ala apuri tamban eekwi inoone inom, kemenyan amburu obari inom, imbirak Ala wonage me, unggwi nawak o,” yinuk, kemenyan kani kunggo menggam mbuti emas paga ogobakkigirik Ala wone lengganogo yorage minggim abu'me wonage nogome, kani kuni ungguwak nduk, kemenyan amburu apit toologo wogoge kagarak. 4Ndi, at melaikat nen kani kungge kagak, ka'luk obari nogo Ala nen obari obeelom kage, ndi, it abet mbakwi Ala apuri tamban eekwi inoone nogo aruk konengge, eeke kagarak o. 5Kemenyan amburu nogo kani kungge minggim nogome nen kani kunik anggen wagangge nagaarik, togolowa'na mambunuk, mbo nggween paga wuppi wage mbaki, o ngguurubu oone inom, o kimbik inom, eeke logonet, mi nggwok nuk-nuk eeke kagarak.
Mbuti luu'ngget oone eekwi koneneegerak wone
6Ti eeke kage nagarik, it melaikat ineebe 7 mbuti luu'ngget wogoragaarak porogo wonogwe nogo, oone eeruwok nduk, li'luk eekwi iigirak.
7It mbuti luu'ngget porogo wonogwe nogo ambi aa'nduk oone eeke mbaki, mayu kumuli'nggen inom, kani inom, amiya inom, nenggelak-kenggelak eerogo punuk, o nggween paga mbo wuppit wage mbaki, nggween inom, i inom, ando mogonogo teppunuk, ando mogonogo 1/3 nogo kani nengge logonet, iri'ngga-kale'ngga ki wonage nogo tigitogon nenet nage kagarak.
8Ti'nuk, melaikat ambi ambuti luu'ngget oone eeke mbaki, inore ambi eeke kagak, puut nggwok negen ambi kani wunuk agan yi yenggenak me kwi'nari wangge mbaki, yi yenggenak ando mogonogo teppege logonet, ando 1/3 nogo amiya eerogo pegerak me, 9yi mendek ndi mendek niyo inikime nugu menggaarak nogo ando mogonogo teppege logonet, ando 1/3 nogo kambit nogwe, ndi, yiiro nggwok niyo ogombaga nugwi nogo ando mogonogo teppege logonet, ando 1/3 nogo kalenak-pugunik arit nage, eeke kagarak.
10Melaikat mbere inambuti luu'ngget oone eeko mbaka, ti'nuk, ambi oone eeke kagak, laaluguragan nggwok ambi ndi wunuk ari nogo pogom mbogut paga nen wunuk agan wambi wage nagaarik, niyo eneeri-eneeri abok aret ando mogonogo teppege logonet, ando 1/3 nogo ale eerogo pit nagaarak. 11Laaluguragan nogo ti, endage Wonabu Aleegwi aret me, niyo eneeri-eneeri ando mogonogo 1/3 nogo ale eerogo pit nagaarak me, aakumi nonggo nagaarik, kambit nogwe iigirak o.
12Melaikat kenagan inambuti luu'ngget oone eeko mbaka, ambi nen oone eeke kagak, oonegen eya inom, tut eya inom, laaluguragan eya inom, abeenok mogonogo 1/3 nogo abinak lek eerogo pege kenok, o liingge nogo eya mbuuluk age, ndi, oonikiya kenok, o abu apit age, eeke logowak nduk, oonegen eya inom, tut eya inom, laaluguragan eya inom, ando mogonogo teppege logonet, ando 1/3 nogo abinak lek age kagarak.
13Ti age kage nagarik, towe wu negen mbogut paga wuga agan nage logonet, ”Melaikat ineebe 4 inaluu'ngget oone muk eekaarak kwe, ineebe 3 perak eeruwok nduk, abu li'luk eekwi wonogwe me, kit aakumi nggween paga mendek yi, kinabuwa o. Kinabuwa o. Kinabuwa o,” yinuk, oone nggwok paga agan nage naruk konenggirak.
Currently Selected:
WAYU 8: WNO
Highlight
Copy
Compare
Share
Want to have your highlights saved across all your devices? Sign up or sign in
