WAYU 7
7
Aakumi Iterali mendek ineebe 144,000 leenogo piyareegerak wone
1Ti eekwi iige nagarik, o yi irip 4 wonage me nen o wiya ndak-ndak 4 aret warit wundi wage menggerak me, o nggween paga inom, yi yenggenak inom, iri'ngga-kale'ngga inom, o wiya nen abolok eerit nage kero, melaikat ineebe 4 nen panggomborogo wonogwe iigirak. Iige nagarik, 2melaikat ambi oonegen wundi wage minggim nen wundi wage logonet, Ala eenik menggerak apuri leenogo punuk, ineraambe yelok logowak nduk, amburu wonok wage nagaarik, nggween inom, niyo yenggenak inom, maluk eerogo puwak nduk, it melaikat ineebe 4 unde eeppiyareegerak nogo, oone nggwok paga yorage logonet, 3”Nit ninogoba Ala ayeloman leenogo piinok, yelok logowak nduk, amburu inenggaawak paga labumbiiga'lek neegak, nggween inom, yi yenggenak inom, iri'ngga-kale'ngga inom, maluk eerogo puurak mage o,” yinuk, yorage nagaarik, 4”Aakumi Iterali mendek inanebunu lombok alitik-alitak ineebe lambuk togon 144,000 leenogo piya o,” yinuk, ari naruk konengge nagarik,
5anebunu Yekura mendek 12,000 leenogo piige,
anebunu Uruben mendek 12,000 leenogo piige,
anebunu Nggat mendek 12,000 leenogo piige,
6anebunu Ateyet mendek 12,000 leenogo piige,
anebunu Natali mendek 12,000 leenogo piige,
anebunu Manatiye mendek 12,000 leenogo piige,
7anebunu Timeyon mendek 12,000 leenogo piige,
anebunu Leewi mendek 12,000 leenogo piige,
anebunu Itakat mendek 12,000 leenogo piige,
8anebunu Tebulon mendek 12,000 leenogo piige,
anebunu Yutup mendek 12,000 leenogo piige,
anebunu Mbeniyamin mendek 12,000 leenogo piige,
eeke logonet, Ala apuri yelok logowak nduk, amburu inenggaawak paga labunogo piinet nagaarak nogo ti, ineebe lambuk togon 144,000 aret iigirak o.
Aakumi apit kuwak eerak wonogwe iyareegerak wone
9Ti eeke kage nagarik, yi aakumi ndi aakumi inanebunu alitak lombok inom, inoone alitak inom, inagabolo alitak inom, inenggela'me nen ambitak nggigik kuwak eereegwaarak nogo ti, ineebe ambik ineenggi lingginiyak abu meek iigirak. It aakumi ti, inambogoyum nggorek yanggwi negen yippunuk eyoongga kalenak wik-wik eeko logonet, at wone lengganogo yorage minggim i ndoonak paga kwi'ndak wonage nogo inom, Ala andomba nogo inom, imbirak inabu'me mi'na'nuk, inoone nggwok yogo logonet, 10”Wone lengganogo yorage mengge'nom kwi'ndak wonage kat ninogoba Ala nogo inom, kat ninowe Yetut Ala andomba nogo inom, kimbirak nen ninagap ndareegutak me, wa,” yinuk, yorogwe iigak, 11it melaikat at wone lengganogo yorage minggim enaagan-ambokan wonogwe nogo inom, it mbogut paga wonogwe inoweewi ineebe 24 nogo inom, it aakumi nen iigulik mendek ineebe 4 nogo inom, it abok aret at wone lengganogo yorage minggim kwi'ndak wonage nogo, abu'me tebe yinuk, Ala alut eeko logonet, 12”Kat ninogoba Ala aret me, yi aakumi ndi aakumi abok kabu'me tebe yinuk, inale'nggen kombakwi, kendage tiyappagagwi, Yi wone ndi wone abok kat keenu o, yinuk, yokkugwi, Wa, yogo logonet kayuk wukwi, kat kalik komaawi ambik mondok kalilaakwi me, wigugwi, mondok-mondok togop aret eeko logogun o, yinuk, amin,” yogwi iigirak o.
13Yogo mbaka, it mbogut paga wonogwe inowe ambi nen an yo'nege logonet, ”It aakumi inayum yanggwi negen yirik ti, ngge mendek o? Ndi, nggeeme nen wagaarak mbaken o?”
14Yo'nege mbaki, ”Nogoba o. An neenggo'lek me, kat nen mban yu o,” yoge mbaki, at nen an yo'nege logonet, ”Lek o. It aakumi aaninggin-paaninggin mondok alik negen eeppiigwi iigak, inenggela'me nen wundi wagaarak nogo ineebe yi aret o. It nogo ti, inayum laambu yanggwi negen aruwak nduk, Ala andomba amiya nogo paga inayum kookkologogwaarak me, 15wone lengganogo yorage minggim Ala enggaanom time logonet, ko'lu-kii'me Ala awi wurik me ake eekwi iigak, at wone lengganogo yorage minggim i ndoonak paga kwi'ndak wonage ninogoba Ala nogo nen maluk inoba age kero, abu'me piirogo wonogwe o. 16-17Ndi wone lengganogo yorage minggim oolo lombok menggerak Ala andomba nogo nen ineebe liirogon aret ndegeninake, ineenik mondok logowak nduk, niyo eneeri abe mili me piya nage, eeginabigin me, mbi abu aganake, niyo abu aganake, mo andi inooke, o aganggen nen ndeyak aganake, eerigin mondok lek o. It le yogwe iinok, Ala nen aret inale amburu lek eerogo piyamenggerak logogun o,” yinuk, yo'nege kagarak.
Currently Selected:
WAYU 7: WNO
Highlight
Copy
Compare
Share
Want to have your highlights saved across all your devices? Sign up or sign in
