WAYU 6
6
Keele 7 maarak nogo piinogo wondekkagagerak wone
1Ti eekwi iige nagarik, Ala andomba nogo nen keele 7 maarak nogo ambi piingge kagak, aakumi iigulik mendek ineebe 4 nogo ambi nen oone o ngguurubu pogom ari logonet, ”Omok o,” ari naruk konengge nagarik, 2nenegen neegak, wam kunda yanggwi lombok me aap ambi amborowak paga kwi'ndak eegin eenggime wage mbaki, ”Aakumi tebembiya nak o,” yinuk, nggare-nggare ambi yippunuk, nappege mbaki, tebembiinet nage kagarak.
3Ti'nuk, keele ambi 6 maarak nogo piingge kagak, ineebe 4 nogo ore ambi nen ari logonet, ”Omok o,” ari naruk konengge nagarik, nenegen neegak, 4wam kunda eeruwak maa'ngga kunik me aap ambi amborowak paga kwi'ndak wage mbaki, ”It aakumi o nggween paga ogu time iniki ugun tayenak ale'nggen nugu logorak lek o. Ata, it-it wat-wat yogo logowak o,” yinuk, mbuti wooluwak nggorek lombok wogoge kagarak o.
5Ndi, keele ambi 5 maarak nogo piingge kagak, ineebe 4 nogo inore ambi nen ari logonet, ”Omok o,” ari naruk konengge nagarik, nenegen neegak wam kunda mili lombok me, aap ambi amborowak paga kwi'ndak aaninggin wakkagak nogo mendek eenggime wonok wage mbaki, 6it aakumi iigulik mendek ineebe 4 nogo, inenggela'me nen wone ambi ari logonet, ”Mbato yum mbuuluk ambi yonggolak nogo ti, wu dinar nggwok paga kungge, ndi, mbi yum mbuulogwe kenagan ndarak nogo ti, wu dinar nggwok apit nogo paga kungge, eeriyak kwe, wam amburu inom, anggur amburu inom, ti perak, it ineenggi warak nen nonggo logowak nduk maluk eerogo puurak mage o,” yinuk, ari kagarak.
7Ti'nuk, keele ambi 4 maarak nogo piingge kagak, aakumi iigulik mendek ineebe 4 nogo inore ambi nen ari logonet, ”Omok o,” ari naruk konengge nagarik, 8nenegen neegak, aap kambuurak nduk eeke logonet, etenggen ndoongga kere agago pege minggi kwak, wam kunda togop aret aap ambi endage Kanggwi Unde nogo amborowak paga kwi'ndak wage kagak, aap ambi endage Kambunuk Nogo Menggam ambokan wage kagarak. Wogo mbaka, yorage logonet, ”Kit nen aakumi nggween paga ando mogonogo teppiigo logonet, ando mogonogo 1/4 nogo wooluwak paga inoorit nugwi, mbi abu nen kambuwak nduk, mbi noogalo wogorogwe, andi nen kambuwak nduk, kugi lengga ndo warogo piigwi, ndi, wam nggwiya nen nibininabuwak nduk, nappiigwi, eerit nogo logonip o,” yinuk, unde eeppiige kagarak.
9Ndi, keele ambi 3 maarak nogo piingge mbaki, it aakumi Keritut inake eereegerak wone abet mba'nuk, mbo pega'lek Ala wone mondok liippunuk mugurok nogwe iinok, inooko nogogwaarak nogo, inogoma Ala aanggo warogo kani kunggo menggam abu'me taati wonogwe iigirak. 10It nogo nen inoone nggwok yogo logonet, ”Ninogoba wae. Kat kalik mondok nggwok obeelom mban eeke logonet, irip-kunduk eeke menggendak me, it ninooreegwaarak ninamiya wambit nagagerak nogo, inowak loonogo ninane'me inooka'lek logonet, ne mande logomunggun o,” yinuk, yogo mbaka, 11”Lek o. Kit kinowe-kinawot inom, it kinom Ala wone mondok liippunuk mugurok nogwe inom, kit kinooreegwaarak kokwak inookwi iinok perak, kinane'me ambugwi lambuk togon inoorigin aret me, we ne ambit iluk puk logomunggup o,” yinuk, mbogoyum nggorek yanggwi negen yippiige kagarak o.
12Ti'nuk, keele ambi 2 maarak nogo piingge mbaki, o mi nggwok nuk ari, kilu worarogo inetenggen paga kiik eeko mengga kwak oonegen apit age, tut aakumi inamiya negen age, 13o wiya nggwok omaawi wake logonet mbogom anggen ki kagak nggaru-nggaru nggween paga oone ndu wambit wage minggi kwak, laaluguragan mbogut paga nen nggween paga wambit wage, 14mbuku pirik-perek eeko mengga kwak mbogut nggoguk ari logonet, pirik-perek arit nage, ndi, puut inom, niyo inikime nggween kup mbanak inom, abok aret ambi me ari nagak eeke, eeke kagarak. 15-17Ti eeke kage nagarik, it aakumi nggween paga mendek inendagembogut inom, aap yo'nggok inom, it aap wim ndugure inendage warak inom, aap inenggi warak inom, aap inoone omaawi inom, aakumi inayeloman inom, aakumi wee'lek mendek inom, abok nen yogo logonet, ”Ala anini eeppinaniyak eyom muk panggo yegerak me, nit nineenik logorak meek aret kagi o,” yinuk, inagabiti nen, ”Nggeeme nawi?” yinuk, ndoome inom, yugum abu'me inom, kumaa'nari nogo nagaarik, ”At wone lengganogo yorage minggim i paga kwi'ndak wonage nogo inom, Ala andomba inom, imbirak inanini nen nit ninoorukwak, puut yi paga inom, yugum nggwok yi paga inom, aan lebenninabu o,” yinuk, puut inom, yugum inom, yogwi iigirak o.
Currently Selected:
WAYU 6: WNO
Highlight
Copy
Compare
Share
Want to have your highlights saved across all your devices? Sign up or sign in
