WAYU 3
3
It Ala apuri o Taririt kuwak eeko nogogwaarak nogo yoragagerak wone
1”Ndi, ambi, at melaikat Ala apuri o Taritit inarum menggerak nogo nen apuri yoraawak nduk, yokkiri o.
An laaluguragan 7 neenggime porogo logonet, aakumi inogoma kokwak Ala ake eeko menggaarak ineebe 7 unde minggirak nogo nen, Ala apuri o Taririt eerit nogo menggaarak nogo an abu neenu aret o. It abu ndeyak kambak negen aret wonogwe iigak kwe, aakumi nen, Lek o. Aap eenik omaawi nege menggerak nogo kokwak, nggereya ti mondok omaawi aret wonage kogo, yinuk, yogwe nogo ti neenu aret kwe, 2it eerit nogwe nogo an nogoba Ala nen, Op aret eekwi o, mbaka'lek me, it abu ndeyak kambuurak negen aganake nogo mbet-mbet ineenik a'nuk, Ala wone mbuuluk mugurok nogwe iigirak nogo nggwok togon eerit nogo logowak nduk, inomaawi eekkolaawak o. 3It wone mamunirogwe iigak, inaruk konembunuk waganggo nogogwaarak nogo abeppunuk, inomaluk mbo pogo logomenggaarik, wone koneneegwaarak nogo aret liirogon porogo logorak yoraawak nduk yokkigi o. Ndi, iniki yungguppunuk, inomaluk mbo pugwi lek iinok perak, aap yogoot woorak nduk wage minggi kwak, an o ndiyom paga woroorak ineenggo'lek iigak, togop aret abera'lek me perak togon inowagam woraagin o. 4Togop kwe, it Taririt mendek ando mbuuluk inayum mili eekkolaga'lek obeelom mban eerit nugwi me, Kit obeelom aret o, yinuk, inayum laambu abe yirik ninom nugu logogun o. 5Ndi, it Ala wone mbo pega'lek mondok nu'lek porogo logonet, mugurok nogwe me, an wage logominggirik, aakumi mondok-mondok ineenik logowak nduk inendage mbuku paga liiru mbanak wonage nogo, an kagari woraagin lek o. It togop aret inayum abu laambu yippiige logominggirik, an nogoba inom, at ayonggo mbogut paga nugu menggaarak inom, inenggaanom paga, It aap yi an nawuri aret o, yinuk, yoraagin o.
6Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o, yinuk, wone yagarak nogo abok aret at melaikat Ala apuri o Taririt inarum menggerak nogo nen apuri yoraawak nduk liiru mbanogo nappu o.”
It Ala apuri o Pilarelipiya kuwak eeko nogogwaarak nogo yoragagerak wone
7”Ndi, ambi at melaikat Ala apuri o Pilarelipiya inarum menggerak nogo nen apuri yoraawak nduk, wone yokkiri o.
An Ndawut agunci nogo porogo logonet, tu paake neenok aakumi nen nakwi, ndi, nake neenok paakwi, eekulik an mban unde logonet, niniki kikak naka'lek abet mban ari minggirak nogo nen, 8it Ala apuri o Pilarelipiya eerit nogo menggaarak nogo an abu neenu aret o. Neenu aret me, it an nendage mbo pega'lek porogo logonet, inomaawi mbuuluk wonage nogo paga an noone mugurok nogo menggaarak me, it ambi eeko logowak nduk, tu paarogo piyareegirak nogo, aakumi nen narogo piyoorak mondok meek aret o. 9It aap Ibilit eeke menggerak ndak-ndak eeko logowok nduk, kuwak eeko menggaarak nogo, it Yakuri mendek lek kagak we piliret, Nit Yakuri mendek aret o, yinuk, yogo menggaarak nogo nen, Yi Ala apuri inom iniki abe kunik wonogwe iigo, yinuk, it Ala apuri o Pilarelipiya mendek inabu'me tebe yi wa'nuk inoone konenggo logowak nduk, eeppiige neyaagun o. 10Ndi, Kit kinogogumbuk kiniki kwi'ndak logonet eeko logonip o, yinuk, yoragagirak nogo, konembunuk liirogon aret eekwi me, peebi yi aakumi ndi aakumi nggween paga menggaarak abok aret inabut mbanikit nduk, aaninggin-paaninggin inoba piya woroorak eyom nogo paga it an napuri inoba arukwak, an nen ndegeninake logogin o, 11An abera'lek me perak togon aret woraagin o. Ndi, wage logominggirik, it abet mba'nuk waganeegwaarak nogo liirogon porogo wonogwe paga makoota yippiya woraagin me, aakumi nen lek eerogo piigwi iyo, liippunuk, tum wako logowak o. 12It Ala wone mbo pega'lek liirogon porogo wonogwe me, an wage logominggirik, o omaawi logowak nduk, tiru oolo yinggo mengga kwak, it aakumi ti, Ala awi wurik me togop aret mippiinok, an nogoba Ala endage inom, Ala awi wurik o koota Yerutalem ngget mendek nogoba Ala mbogut paga nen wuppi woraagin nogo endage inom, an nendage ngget toonak nogo inom, inalitak lombok inoba mbanogo piyaaminggirak me, it peebi time nen wundi nagun abu lek o.
13Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o, yinuk, wone yagarak nogo ti, abok aret at melaikat Ala apuri o Pilarelipiya inarum menggerak nogo nen apuri yoraawak nduk liiru mbanogo nappu o.”
It Ala apuri o Laworikiya kuwak eeko nogogwaarak nogo yoragagerak wone
14”Ndi, ambi at melaikat Ala apuri o Laworikiya inarum menggerak nogo nen apuri yoraawak nduk, yokkiri o.
At Ala nen yi mendek ndi mendek wakkaakit mbake kagak, wakkagagirak alom an aret me, Ala nonggop menggerak mondok liirogon abet aret paganogo ari minggirak nendage Amin nogo nen, 15it Ala apuri o Laworikiya eerit nogo menggaarak ti abok neenu aret o. Iniki miin lek aganggen togon lek we tarom ombat negen wonogwe iigirak me, iniki aganggen logorak mbakwi kenok, aganggen aret wonogwe, ndi, iniki miin logorak mbakwi kenok, miin aret wonogwe, eeko logorak op aret mbake kwe, 16iniki we tarom ombat neen wonogwe me, niyo kulubit ombat kenok inambeme nen kilirogo wumbogo mengga kwak, it ineebe togop aret kilirogo wumbiyoorak mbake agarik o. 17It nogo nen, Ninigen mbuk ninagap mbelenak nineenggi lek niniki ale'nggen mondok lek aaninggin ndugu aago nugu logonet, agan nugu monggoorak kogo o, yinuk, mbaka'lek logonet, Nit ninamendek ambi lek lek, abok aret wonage me, ninenggi warak aret o, yinuk, yogo menggaarak me, It eeko logorak yoraanu o, yinuk, yo'nok nduk, wone ambi yokkiri o. 18It inagap mbelenak nugwi me aakumi nen inigen iinok, inenggali ogwe iyo, inayum laambu yanggwi negen yikkolaawak nduk kunggologwe, inigen mbuk nogo obeelom a'nuk yi mendek ndi mendek inigen kaawak nduk, amburu inigen me nabenggoloorak kunggologwe, ndi, abe mendek paga ineenggi warak aruwak nduk, an nawu mbuti emas abe kani paga worarak nogo mendek inom onggo kunggologwe, eeko logorak yoraawak nduk yokkigi o. 19It aakumi an ninom niniki kunik eeginake minggirak nogo ti, inaruk wake, iniki koonnaruwak nduk yawi inooke, eeke minggirak me, iniki koombunuk, inomaluk abu aret nggaruk togon mbo puwak o. 20An tunggambe paga mi'ndak logonet, tu puk-puk eeke nogo liippanuwak o. Aap ambi an tu puk-puk eeke nogo, aruk konembunuk, tu paa'neege kenok, an ka unggwage logominggirik, nimbirak niniki ambi lambuni nore-kore logonet, mbi nonggo logogun o. 21Ndi, it an noone mbo pega'lek mondok nu'lek porogo logonet mugurok nogwe iinok, an nogoba wone lengganogo yorage minggim nimbirak kwi'ndak wonage nogo ndak-ndak, it kunduk an noone lengganogo yorage minggim ninom kwi'ndak logowak nduk, Neya woraanip o, yinuk, yoraagin o.
22Aberiniki nen it Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o, yinuk, wone yagarak nogo ti abok aret at melaikat Ala apuri o Laworikiya inarum menggerak nogo nen apuri yoraawak nduk, liiru mbanogo nappu o,” yinuk, yo'nege kagarak o.
Currently Selected:
WAYU 3: WNO
Highlight
Copy
Compare
Share
Want to have your highlights saved across all your devices? Sign up or sign in
