WAYU 4
4
Mbogut paga Ala alut eekwi iyareegerak wone
1Ti yo'nege mbaki, nabinggaanggo ambi kage logonet, o mbogut paga time tungga ambi paarak kage nagarik, nogome nen aap ambi mbuti luu'ngget oone pogom aa'nduk yo'negerak nogo ambinom yo'nege logonet. ”Yogondak eeriyak kagandak nogo eeppunuk peebi eeriyak nogo titikkirikit nduk lagi mok o,” yinuk, 2awo aret yo'nege kagak, Aberiniki ninikime lik ari nagaarik, wo'neren pani laganggerak mban kagarak. Pani laganggerak wonage me, wone lengganogo yorage minggim i ndoonak nogo paga, aap ambi kwi'ndak wonage kagarak. 3Aap kwi'ndak wonage nogo etenggen ti, yugum yaripit inom, yugum taririt inom, wu kirin abinak nogo pogom wonage kagarak. Ndi, at kwi'ndak minggim irimbaga mbulu, yugum tamurut etenggen kunik negen wanggerak wonage kagak, 4it mbogut paga wonogwe inoweewi ineebe 24 nen inayum yanggwi negen inom, ndi, mbuti emas paga nggare-nggare mendaarak inom, yirippunuk, at eebe oolo kagak, it wone lengganogo yorogo menggam i ndoonak 24 nogo paga kwi'ndak wonogwe iigirak. 5At wone lengganogo yorage minggim time nen o kimbik eeke logonet, oone ngguurubu agan wundi wage kagarak. Ndi, wone lengganogo yorage minggim inaame kin paga taati ndi 7 wuninik wonage kagarak. Ndi 7 nogo ti, aakumi inogoma kokwak Ala ake eeko menggaarak ineebe 7 nogo aret o. 6Wone lengganogo yorage minggim i ndoonak abu'me taati wukagi abu abe tabak lombok yila'nggun kole yenggenak nogo kokwak kagarak.
Ndi, aakumi nen iigulik mendek ineebe 4 enaagan-ambokan inigen warak me, wone lengganogo yorage minggim oolo taati wanggerak wonogwe iigirak. 7Ineebe nogo ti, ambi nggeewo singa etenggen pogom, ndi, ambi sapi aagaluk etenggen pogom. Ambi ti, aap etenggen pogom, ndi ambi ti, towe wu a'naabit wiganak nogo pogom wonogwe iigirak o. 8Aakumi nen iigulik mendek ineebe 4 nogo ti, inalitak lombok ina'naabit 6 aret me, ineebe paga apit aret inigen warak wonogwe iigirak. It nogo puk aga'lek ko'lu-kii'me inoone yogo logonet,
”Aa'nduk inom, yogondak inom, peebi inom, kat mondok
kitok komaawi ambik menggendak ninogoba Ala aret me,
kat mondok obeelom aret o.
Kat mondok obeelom aret o.
Kat mondok obeelom aret o,”
yinuk, yagak mban eeko logonet, 9at mondok-mondok eenik menggerak wone lengganogo yorage minggim kwi'ndak wonage nogo, ”Wa,” yinuk, alut eekwi, endage tiyappugwi, eekwi iigak, 10-11it inoweewi ineebe 24 nogo nen at mondok eenik menggerak wone lengganogo yorage minggim i ndoonak paga kwi'ndak wonage nogo, abu'me tebe yinuk, alut eeko logonet,
”Ninogoba Ala wa.
Kat kiniki koombunuk yi mendek ndi mendek abok aret
wakkaakit o, yinuk, wakkagagindak kat mban
kalik nggwok aret me, yi aakumi ndi aakumi
abok kat kabu'me tebe yinuk, tiyappagago logonet,
kalut eeko logowak o,”
yinuk, inenggare-nggare yirik nogo nggoorogo at abu'me pi wogwe iigirak o.
Currently Selected:
WAYU 4: WNO
Highlight
Copy
Compare
Share
Want to have your highlights saved across all your devices? Sign up or sign in
