WAYU 2
2
It Ala apuri o Epetut kuwak eeko nogogwaarak nogo yoragagerak wone
1Yo'nege kage nagarik, ”At melaikat Ala apuri o Epetut inarum menggerak nogo nen apuri yoraawak nduk, yokkiri o.
An neenggi abe'nggan paga laaluguragan ineebe 7 porogo logonet, ndi mbuti emas paga ogobakkigirik ineebe 7 inenggela'me nege minggirak nogo nen 2Ala apuri o Epetut eerit nugu menggaarak nogo an abu neenu aret o. It ndeyak aganake kagak mbo pega'lek mondok nabenak mban eerit nogwe, It aap maluk mendek nit ninenggela'me yime logorak mondok lek o, yinuk, ineebi mbakwi, it aap ando nappiigak mendek lek kwe, wogo nagaatik, Ala nen nappinani wagaarak o, yinuk, yorogwe iinok, inabut mbambunuk, Yi pilit agan wagaarak o, yinuk, mbo piigwi, 3ndi, an nendage mban yi awi ndi awi wigak yuwak nduk, eerit nogwe paga aaninggin-paaninggin eeppiinet nogwe iigak, iniki kwippunuk waganggo logonet, ta'liila eeginake kagak mondok nabenak mban eekwi, eerit nogo menggaarak nogo ti, an neenu aret kwe, 4ambit iluk mbuuluk ambi eekwi iigirak nogo perak, apuri yoraawak nduk, yokkiri o. Aa'nduk it an ninom iniki kunik aret wonogogwaarak kwe, yogondak perak, ninom kunik lik mbo panugwi iige nagarik, yagi o. 5It aa'nduk an ninom kunik logonet, iniki aganggen paga noone mugurok nogo nogogwaarak nogo mbo punuk, yogondak mondok alik eerit nogwe nogo, liippatinuk, inomaluk mbo pogo logomenggaarik, yungguninuk iniyok paga woraanuk, aa'nduk eeko nogogwaarak nogo ndak-ndak eerit nogo logowak o. It iniki koombunuk inomaluk mbo pugwi lek iinok perak, an wage logominggirik, ndi wuninik inenggela'me wonage nogo nggiginogo mbo wumbi woraagin o. 6Ndi, ambi op negen eekwi iigirak nogo ti, it aap Nikolawut oone mugurok nogo logonet, eerit nogo menggaarak nogo ti, an neebi mbake minggirak nogo it ndak-ndak ineebi mbakwi iigirak me op aret o.
7Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o.
Ndi, it Ala wone mbo pega'lek, iniki nu'lek porogo logonet, liirogon mugurok nogwe iinok, eyoonggen aakumi ineenik eeginake menggerak Ala eyabu me wonage nogo, It noorak op aret yoraagin o, yinuk, wone yi yagarak nogo abok aret at melaikat Ala apuri o Epetut inarum menggerak nogo nen apuri yoraawak nduk, liiru mbanogo nappu o.”
It Ala apuri o Timerina kuwak eeko nogogwaarak nogo yoragagerak wone
8”Ndi, at melaikat Ala apuri o Timerina inarum menggerak nogo nen apuri yoraawak nduk, yokkiri o.
An kangge nagagirik, neenik a'nuk mi'nagagirak nogo aa'nduk togon wonagagirak me, peebi irip paga mondok logogin nogo nen 9it Ala apuri o Timerina eerit nogo menggaarak nogo an abu neenu aret o. It aaninggin-paaninggin inoba piigo logonet, ineenggi lek eerogo piigwi kwe, agi mendek paga ineenggi warak negen wonogwe, ndi, it Yakuri mendek lek Ibilit eeke menggerak ndak-ndak eeruwok nduk kuwak eeko menggaarak nogo mendek kagak, we piliret, Nit Yakuri mendek aret o, yinuk, Ala apuri o Timerina mendek inoone miyuk-meya eerogo piigwi, eekwi nogo ti an neenu aret kwe, 10it Ala apuri eeppiyoorak koonak wonage nogo ti, lek aga'lek awo aret wonage me, inagabiti mbakwi iyo, apuri yoraawak nduk, yokkigi o. Ibilit nen, Aaninggin-paaninggin inoba piige neenok, nonggop eekwi iyaamun? yinuk, inabut mbanikit nduk, aakumi iniki nggagangge mbariminggi, it Ala apuri o Timerina ineebe keele maarogo o mbuuluk me mambiya-menggaarak iigak, nogo aap ambit eenggi aret yugun o. It nogo nen, Eeppanugwi iigak, kambuurak op aret o, yinuk, mondok inogogumbuk logonet, waganggwi iinok, Kit peebi kambumunggup lek o. Mondok-mondok kineenik aret logomunggup o, yinuk, nggare-nggare mendaarak makoota nogo yippiyaagin o.
11Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o.
Ndi, it aaninggin-paaninggin nogo mendek abok aret inoba age kwe, kagak, Ala wone mbo pega'lek mondok inogogumbuk logonet liirogon mugurok nogwe iinok, ne mbere paga kambugun lek o, yinuk, wone yi yagarak nogo abok aret at melaikat Ala apuri o Timerina inarum menggerak nogo nen apuri yoraawak nduk liiru mbanogo nappu o.”
It Ala apuri o Peragamut kuwak eeko nogogwaarak nogo yoragagerak wone
12”Ndi ambi, at melaikat it Ala apuri o Peragamut inarum menggerak nogo nen apuri yoraawak nduk, yokkiri o.
An mbuti togowa ngget peenok-peenok maarak porogo minggirak nogo nen, 13it an napuri o Peragamut eerit nogo menggaarak nogo an abu neenu o. It Ibilit wone konenggo menggam inenggela'me inom time aret menggaarak kwe, naput ambi noone liirogon wappunuk ko'lukii'me yoranet nege nagagerak Andipat nogo, it inenggela'me Ibilit wonage minggim time aret wako mbareegwa, it an noone waganeegwaarak nogo, Mugurok noorak nineebi o, yinuk, yuurak kwe, kagak, Lek o. Nit ninowe Keritut aret me, at oone waganggoorak nogo ti, mondok aret porogo logowok o, yinuk, yogwe iigirak kwe, 14mbuuluk ambi ninggin eekwi iigirak nogo perak, yoraawak nduk yokkiri o. It aakumi Iterali mendek nen Ala wone mbo punuk kugi aanggo warak nunggwi, ndi, kumi we ugun-ugun wurinabit nogwe, eeko logowak nduk, at Mbileyam nen aap Mbalak mamunege mbareegi, aap Mbalak nen Iterali mendek mamuniragagerak wone nogo, Ala apuri o Peragamut wonogwe nogo it ando nen wone ti mugurok nogwe, 15ndi, ando nen at Nikolawut oone mugurok nogwe, eekwi iigirak me, 16it maluk eekwi nogo ti, iniki koombunuk, mbo pogo logowak o. Mbo pega'lek iinok perak, an mbet-mbet wage logominggirik, mbuti togowa an nambeme wonage yi nogo paga inoori wambi woraagin o.
17Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok liirogon aret konenggo logowak o.
It Ala wone mbo pega'lek nu'lek porogo logonet liirogon mugurok nogwe iinok, mbi mbogut paga mendek kumaarak wonage nogo wogorage, ndi, it waamenggaarak nogo mban ineenu logowak nduk, inendage ngget toonogo yugum yanggwi negen lan ari nogo paga liiru mbanogo wogorage, eerigin o, yinuk, wone yi yagarak nogo abok aret at melaikat Ala apuri o Peragamut inarum menggerak nogo nen apuri yoraawak nduk liiru mbanogo nappu o.”
It Ala apuri o Tiyatiriya kuwak eeko nogogwaarak nogo yoragagerak wone
18”Ndi, ambi at melaikat Ala apuri o Tiyatiriya inarum menggerak nogo nen apuri yoraawak nduk, yokkiri o.
An nenegen kani omoonuk wunuk ari pogom logonet, mbuti tembaga kani kunik me mambugwi iinok, eyak kwindagalan eerogo pegetak me, abinak pigan-pigan eeke minggi kwak, niyok togop ndak-ndak pigan-pigan eeke minggirak nogo nen, 19it Ala apuri o Tiyatiriya eerit nogo menggaarak nogo an abu neenu aret o. It aakumi inom iniki kunik aganakwi, abet mba'nuk iniki noba panggombanugwi, inoreewi yeenggwaaranet nugwi, aaninggin-paaninggin eeppiigwi iigak, inogogumbuk logonet waganggwi, eerit nogwe nogo abok neenu aret o. Ndi, aa'nduk we mbuuluk eeko nogogwaarak kwe, yogondak nggwok togon eerit nogwe ti neenu mban aret kwe, 20mbuuluk ambi ninggin eekwi iigirak me, yoraawak nduk, yokkiri o. Kwe Iteben nogo nen, An Ala wone yorage minggirak mendek aret o, yinuk, an nayeloman ineebe ambik nomoniren nage logonet, kumi ugun-ugun wurinabit nogwe, ndi, kugi aanggo warak nunggwi, eerit nogo logowak nduk, mamunirage kagak, it nen mberega'lek, Op aret o, yinuk teppugwi iigirak me, abu neebi ee'nake kenok yagi o. 21At kwe nogo iniki koombunuk, omaluk mbo puwak nduk, tokkagarak kwe, An eerit nage minggirak nogo mbo puurak neebi o, yinuk, kulinik mban eerit nage me, 22it ando kwe ti inom maluk eerit nogo menggaarak nogo ti, iniki koombunuk inomaluk mbo pugwi lek iinok, andi yagan yobak-nggolak wako logowak nduk, aaninggin mondok luurik-maarak agago inoba kwippiige neyaagun o. 23Kwe ti inom eerit nogo menggaarak aagalogwe nogo abok aret inoorit nage neenok, it an napuri yi awi ndi awi kuwak eeko menggaarak nogo abok nen, Nit niniki koonggwi inom, eerit nogwe inom, abok aret liippinaninuk onggo ndak-ndak wo'nirage menggerak at aret o, yinuk, an neebe ineenu arugun kwe, 24it ando o Tiyatiriya wonogwe nogo, kwe ti nogo oone inom, ndi, Ibilit eeke menggerak kote kumaarak yogo menggaarak wone nogo inom, it mugurok naga'lek mbo pereegwaarak me, an nen aaninggin mendek ambi inoba piyoorak mbarulik kwe, 25it abet mba'nuk waganeegwaarak nogo mondok nu'lek porogo wonogwe me, An aret woraagin, yegerak o, yinuk, yoraawak nduk, yokkigi.
26-27It Ala wone mbo pega'lek mondok nu'lek porogo logonet, an eeriyak mbake minggirak nogo eerit nogwe me, o age yobok an wage logominggirik, an nogoba nen aakumi inanebunu lombok inarum logowak nduk mippaneegerak nogo kokwak, it togop aret, yi aakumi ndi aakumi inabu'me logonet, it inoone mban konenggo logowak nduk, mippiyaminggirak inarum logonet, yawi paga niyoowak yigirik-noonom eerogo nappogo mengga kwak, it inoone omaawi paga togop aret yorogo logogun o. 28Ndi, it Ala wone mondok nu'lek porogo wonogwe me, an wage logominggirik, o weerikit nduk eeke kagak laaluguragan abinak kere ari kogo monggotak nogo aret wogora woraagin o.
29Aberiniki nen Ala apuri yi awi ndi awi kuwak eeko menggaarak yorage nogo ti, inaruk wonage kenok, liirogon aret konenggo logowak o, yinuk, wone yagarak nogo abok aret at melaikat Ala apuri o Tiyatiriya inarum menggerak nogo nen apuri yoraawak nduk liiru mbanogo nappu o.”
Currently Selected:
WAYU 2: WNO
Highlight
Copy
Compare
Share
Want to have your highlights saved across all your devices? Sign up or sign in
