WAYU 11
11
Aap mbere Ala wone yorogwe iinok, inooreegwaarak wone
1Ti yo'nege kaga nagarik, wakkagak waanggun negen ogobakkigirik ambi wo'nege logonet, ”Ala awi wurik inom, Ala aanggo warogo kani kunggo menggam inom, wakkage, ndi, aakumi Ala awi wurik me alut eeri unggwogo menggaarak nogo, ineebe keenggi linggininake, eeri nak o. 2Wakkanet nage logonet, Ala awi wurik me oorenggam endekem nogo ti, it aakumi endekem mendek nen o koota obeelom agagim iniyok aambele eerogo pit nogo logonet, Ala awi wurik me oore'nggam endekem time inom aambele eerogo pit nogwe iigak, tut 42 peneniyak koonak me, wakkoorak mage o. 3Ndi, it aap ineebe mbere ambi noone yorogo logowak nduk, nappiyaminggirak nogo nen aakumi inabuwa mba'nuk iniki puru ari logonet yorogwe yelok iyaawak nduk, inayum anggi'ngget kwi kagak yirik logonet an noone yorogwe iigak, nogo 1,260 yogo logogun o,” yinuk, yo'nege kagarak.
4I taitun mbere inom, ndi, ndi wuninik pogo menggam mbere inom, at yi mendek ndi mendek alom unde ninogoba abu'me menggerak nogo pogom ti, it Ala wone yorogo menggaarak ineebe mbere nogo aret o. 5It aap mbere ti, inambeme nen kani wunuk agan wundi wage logonet, it inom ogoorak wonogwe nogo inooko menggaarak ineenggo'lek me, ”Aap mbere ti inooruwi o,” yinuk, inooriyak nduk eekwi iigak, it inambeme nen kani wunuk agan wundi wage logonet, inom ogoorak wonogwe nogo, ineebe kani wunuk togon nunggwi iigirak o. 6It aap ineebe mbere nogo ti, iniki koombunuk, ”O kibi paga wone yorogo logowam mayu woraagun o,” yinuk, yogwi iinok, mayu waga'lek puk wonage, ”Niyo yi amiya aru o,” yogwi iinok, amiya aret age, ndi, ”O nggween paga yime kugi lengga ndi wu'naru o,” yogwe iinok, andi aret nappi wage, togop aret eerit nogo logowak nduk, Ala nen awone kilirirage kagarak o.
7Kage nagarik, at wone yo'nege nogo nen ambinom yo'nege logonet, ”Wone yorogo logowak nduk, nappiyaminggirak nogo age yobok togon yorogo mbarumengga, nggwiya nggwok lombok o mbuun ambena nen lagi wage logominggirik, aap ineebe mbere nogo nggugiranet muguren nage logonet, nibininake kenok, kanggo mbarumengga, 8ineebe o koota nggwok ninowe eyo karo-karo paga warogo pereegwam tu nggwok yarak nogo paga, pili ogo logowak nduk, mbo piyaagun o. O koota nggwok yogo monggoorak nogo, it ando wone eegu laarogo yogo logonet, O Torom o, o Metit o, yinuk, yogo menggaarak nogome aret ineebe mbo piinok, 9it aakumi inanebunu alitak lombok inom, inoone alitak inom, inagabolo alitak inom, yi aakumi ndi aakumi apit aret, Wi, yinuk, pegiya wogwe iigak, nogo kenagan abu yippunuk, o ambi weeremenggerak liingge paga nggween taambiyoorak me, mbo piyaanip o, yinuk, yugun o.
10Ndi, it aakumi nggween paga wonogwe nogo abok nen, It aap Ala wone yaga mbere yi nen inoone yagaatak paga nit andi-pandi mondok alik negen eeppinanit nugu nagaarak me, kwayiga! Op kangga o, yinuk, inale'nggen mbako logonet laago lakwi, inamendek tumbut-tumbut eekkologwe eerugun o,” yinuk, yo'nege kagarak. 11-12Kage nagarik, nogo kenagan yippunuk, o ambi wegerak liingge paga Ala nen ambebubu aap mbere nogo inikime mambiige kagak, it apit inenggaanom paga ineenik ogo mbaka, oone nggwok ambi mbogut paga nen yorage logonet, ”Lagi wa'nip o,” yorage mbaki, inaruk konembunuk, ”It op kangga o,” yinuk, inale'nggen mbakwi nogo inigen iigak, ndugwi enggela'me mbogut paga laganggwi iinok, aakumi nogo nen, ”Iya!” yinuk, iniki ma'nogo logonet, inagabiti ambik ogwe iigirak. 13Awo wiirogwe iigak, mi nggwok nuk-nuk eeke logonet, aakumi inawi ambik wurik nogo ando teppege logonet, ando 1/10 langgu-langgu nage logonet, aakumi apit ineebe 7,000 aret aambeleninake mbaki, it ando teppiigerak nogo inagabiti nen at mbogut paga menggerak Ala nogo mondok tiyappugwi iigirak.
Melaikat ambi 7 nogo ambuti luu'ngget oone eeke kagagerak wone
14Ti'nuk, at mbogut paga oone yo'nege nogo nen, ”Kinabuwa o, yinuk, ne kenagan paga ari konenggendak nogo ti, mbere muk eeke kagandak kwe, ambiret nogo mbet-mbet eerikit nduk eeke me, kenegen logot o,” yinuk, yo'nege mbaki, 15nenegen wonage me, melaikat ambi 7 nogo luu'ngget oone eeke mbaki, it mbogut paga nen inoone nggwok yogo logonet,
”At ninogoba inom, at leenogo mippereegerak Keritut inom,
imbirak inabu'me logonet, inoone konenggo logowok nduk,
yi aakumi ndi aakumi nggween paga time menggaarak abok aret it inowagam kuwak ari waga o.
Kuwak ari wagaarak wonogwe me, it inowe endagembogut
Keritut nogo nen mondok-mondok inarum logogin o,”
yinuk, yogo mbaka, 16it mbogut paga wonogwe inoweewi ineebe 24 wone lengganogo yorogo menggam i ndoonak paga Ala abu'me kwi'ndak menggaarak nogo nen inetenggen wandu-wandu Ala abu'me nggin ari nogo nagaarik, alut eeko logonet,
17”Kat ninogoba Ala nggwok komaawi ambik me, aa'nduk inom,
yogondak inom, mondok kitok aret wonage o.
Kat yi aakumi ndi aakumi abok inowe kendagembogut logonet,
inarum logonok nduk, unde eeppagareegerak nogo, yi eyom paga aret eeke logorak nduk, mi'nagandak me, wa, wa, yokkogo o.
18Yi aakumi ndi aakumi abok inanini kombako logonet,
At ninowe endagembogut ninarum logorak mondok nineebi o, yinuk, agan nogwe nogo, kat nen kanini inoba piige, it kambit nogogwaarak nogo inawone amburu mbanogo inowak loonogo piige, ndi, it kayeloman nabi-nabi inom, it abet mbareegwaarak kat kapuri inom, it kayuk wuko menggaarak inendage lek inendage warak abok aret obeelom eekwi iinok onggo wogorage, ndi, it o nggween paga time maluk eerogo pugwi nogo pup eerogo piige, eeriyak eyom abu panggo yi wagaarak me, wa,”
yinuk, yogo mbaka, 19Ala awi wurik mbogut paga nogome tu paake mbaki, Ala aloobut mbanak wone yoragagerak liiru mbanak yonggolak wonage nogo, kin ari wage kage neegak, o yabok eeke, o ngguurubu ari, o mi nuk ari, mayu kumuli'nggen mondok lubu-lubu wangge, eeke kagarak o.
Currently Selected:
WAYU 11: WNO
Highlight
Copy
Compare
Share
Want to have your highlights saved across all your devices? Sign up or sign in
