IBERANI 1
1
IT AAKUMI IBERANI MENDEK INAKE
LIIRU MBANAK WONE
Ala nen aput yoge kagak, apuluk nen yo'nirage menggerak wone
1Maan aa'nduk at Ala nen ninombomini at oone ineenu aruwak nduk, it Ala wone yaga nabi-nabi nogo, kulinik-kalinik inabi paga yorage, eerubok mendek inenggela'me eeppiige, anebunu alitak lombok abok aret eeppiige, eeke kagak, it nogo nen, ninombomini nogo, yorogo nogogwaarak kwe, 2yogondak irip paga perak, ninenggela'me logonet, ogoba oone yo'nirage logowak nduk, aput lombok nappi wagagerak. ”Naput mban yi mendek ndi mendek unde logowak o,” yinuk, mippege nagagirik, ogoba nen, ”Yogop ee'nu, ndogop ee'nu,” yoge kagak, aput nogo nen yi o ndi o abok aret wakkagagerak. 3Ogoba mondok tiyanak eebe eya ndelenak-welenak aago kenok, wiigwi nogo kokwak, aput ndak-ndak aret mengerak. Aput nogo ti, ogoba iniki ndak-ndak aret. Yi mendek ndi mendek wakkagagerak abok aret, at oone omaawi paga pipporogo menggerak. Ninomaluk abok aret lek eerogo mbo nappege nagagirik, at agi mbogut paga mondok tiyanak menggerak nogo, eenggi abe'nggan paga tiyarogon kwi'nari laganeegerak wonage o.
Melaikat tebenak iigak, Ala aput tiyanak menggerak wone
4-5At Ala nen melaikat mendek ambi yoge logonet,
”Yogondak an nen aret ndakkakirak me, kat an naput aret o,” yinuk, ti yorulik. Ndi, ambi ari logonet,
”An kat kogoba aret age, ndi, kat an naput aret age,
eerugun o,”
yinuk, ti yorulik mban. 6Ata, at Ala nen aput ambolom ndarak nogo, o nggween paga yime wuppi woraakit nduk, eeke logonet,
”Kit an nayonggo nugu monggotak melaikat abok aret at mban
alut eeko logonip o,”
yinuk, yorage, 7ndi, ti'nuk, it melaikat eeko menggaarak nogo mbiningge logonet,
”It an yonggo nappiige minggirak nogo, o wiya pogom nugu
logowak nduk, agago piige, ndi, an nayeloman nake kani
omoonuk paga negen eeko logowak nduk, eeppiige, eeke minggirak o,”
yinuk, mbiningge, eereegerak kwe, 8aput nogo eeke logorak awone ari logonet perak,
”Kat nogoba Ala wae.
Kendagembogut mondok-mondok tiyanak aret logomunggun o.
It kabu'me menggaarak inawone mondok koonak mban
mbangge menggendak.
9It obeelom eekwi iinok ti, kinikilom mbake, ndi, wone yugu kagak taganogo punuk, maluk eekwi iinok ti, keebi mbake, eeke menggendak me, iniki ale'nggen inombako logonet, amburu kilippiigo mengga kwak, an kogoba nen niniki ale'nggen kombake logonet, kat koreewi iigak, togop aret leenogo pagareegirak o,”
yinuk, yoge nagagirik, 10wone alik ambi ari logonet,
”Nogoba o.
O maan aa'nduk nggween yi, alom wakkaga'lek me, kat nen
aret wakkagagindak o.
Ndi, mbogut kunduk kat nen mban ogobakkigireegindak o.
11Mbogut inom, nggween inom, ti lek arigin kwe, kat perak,
kitok mondok aret logomunggun o
Yum maan yugu me, nibik ari kenok, mbo pogo mengga kwak,
mbogut-nggween yi togop aret lek eerigin o.
12Yum etenggen maluk agaatak kenok, yuwi-mbuwi eerogo mbo
punuk, obaane'me alik ngget mendek yikkologo mengga kwak, mbogut-nggween yi, togop eerigin kwe, kat perak,
yi tahun ndi tahun paga aakelo a'nuk, kambumunggun lek o
Kat mondok kitok aret logomunggun o,”
yinuk, aput yoreegerak kwe,
13”It kinom wim mbanak mendek nogo aan lebenogo kabu'me
piiga'lek neegak, kat neenggi abe'nggan kwi'nari mok o,”
yinuk, yoreegerak nogo ti, it melaikat nen eeruwak nduk yoroolik o. Ata, aput nen eeruwak nduk, yoreegerak ti paga, nonggop mbakop? Lek o. At Ala nen, ”Naput o,” yoge nagagerak nogo ti, it melaikat mendek ambi togop yoroolik me, it melaikat mendek tebenak negen iigak, at aput mondok tiyanak aret kogo o.
14Ndi, it melaikat ti nonggop negen menggaarak mbakop? Lek o. It nogo aakumi inogoma ninigen iiga'lek nogo pogom logonet, Ala ake eeko menggaarak me, aakumi inagap ndaruwak nduk, leenogo piyareegerak nogo, yeenggwaaraawak nduk, Ala nen yonggo nappiige menggerak o.
Currently Selected:
IBERANI 1: WNO
Highlight
Copy
Compare
Share
Want to have your highlights saved across all your devices? Sign up or sign in
