IBERANI 8
8
Yetut ti Ala unde ninowe nggwok aret o
1Nit wone yogwe yi nogo, alom liirogon yokkira o. Ala unde ninowe nggwok togop aret wonage o. At ninogoba endagembogut mondok tiyanak mbogut paga wone lengganogo yorage minggim eenggi abe'nggan paga kwi'nari laganeegerak logonet, 2it aakumi nen ooliya negen wureegwam nogome eeke lek o. At ooliya abe Ala nen wureegim mage lombok minggim time aret ninake eeke agaarik o.
3At Ala unde inowe nggwok logowak nduk, leenogo mippugwi nogo ti, yi mendek ndi mendek Ala ake pege, at aanggo warogo wogoge, eeke logowak nduk, leenogo mippogo menggaarak nogo ndak-ndak, Ala unde nit ninowe nggwok yi nogo kunduk ninake eeke logonet, at we eeke logorak meek o. At togon amendek ambi Ala ake puurak op aret o. 4Nit Ala unde ninowe nggwok yi nogo ti, nggween paga yime ninom logonetak en, at Muta nen, ”Ala ndogop wogogo logonip o,” yinuk, lengganogo yoragagerak nogo ndak-ndak, wogogo logowak nduk, ineebe muk wonogwe me, at Ala unde ninowe nggwok logonetak lek o. 5At Muta nen Ala unde logonet, eeke logowam ooliya negen wuriyak nduk eeke me, Ala nen, ”Kat puurom nimbirak logonet, yogop wuriyak titikkereegirak nogo ndak-ndak wuke logonok nduk, liippege logot o,” yinuk, yoreegerak me, o eebe mbogut paga wurik wonage kagak, it Ala unde inowe nogo ti, we ogut wakkagak wurik paga eeko menggaarak kogo ogoorik o. 6Ndi, yogondak ee'ninaburak mbareegerak nogo ti, mondok iya lombok me, wone maan yugu eeko logonet, ee'ninaburak meek kenok, Yetut nen Ala ninom lambunninabuwak nduk, wone alik ngget mendek koonogo pinanege nagagirik, yogondak ninowe nggwok logonet, mondok alik negen ninake eeke agaarik o.
7Wone aa'nduk Ala nen lengganogo yo'niragagerak nogo, op eeppiyaanetak en, peebi ee'ninaburak wone ti, koonogo yoraanetak lek kwe, 8Ala nen at apuri wone lengganak kagak alik eekwi iige nagagirik, inaruk wake logonet,
”Kit aakumi Iterali mendek inom, Yekura mendek inom, kit wone alik ngget mendek koonogo yokkiroorak eyom panggoni wage o, yinuk, an kinogoba Ala nen abet aret yokkiragi o.
9Wone alik ngget mendek koonogo yokkiroorak yagarak nogo ti, it kinombomini o Metit nen neenggi pigiren wundi wage nagagirik, Ndogop eeppinagagin o, yinuk, wone koonogo yoragagirak nogo pogom lek o.
Ndogop eeppinagagin o, yinuk koonogo yoragagirak nogo, it liippunuk, eerit naga'lek mbareegwa, an inogoba Ala nen aret mbo piyareegirak me, wone ti mendek ambinom yokkiraagin lek o.
10An kinogoba Ala nen, Kit Iterali mendek kinake peebi eeriyak wone alik ngget mendek koonogo yokkiraagin o, yinuk, yagi o.
An nen, Yogop ee'nu, ndogop ee'nu, yinuk, wone lengganogo yorage minggirak nogo ti, aberak logobagip nduk, kinikime mambinagage, ndi, kobak ogwe kiyo, kinikime liiru negen mbanogo pinagage, eeke logonet, an kinogoba Ala aret logogin o.
Ndi, kit perak, an napuri aret logomunggup o.
11It aakumi inanggok inom, elege-aabologwe inom, abok aret inogoba an aret ineenu arugun me, owe ambi nen awot ambi yoge logonet, Kogoba Ala keenu ilik, lek a? yinuk, yoge, ndi, ore ambi nen ore ambi yoge logonet, Ala togop eeke menggerak o, yinuk, mamunege, yinuk, togop eeko logogun lek o.
12It maluk eekwi iinok, an aberak logogin lek o.
Inabuwa mbake logonet, inomaluk mondok lek eerogo piige logogin o,”
yinuk, yereegerak nogo ti, 13”Wone alik ngget mendek koonogo yokkiraagin o,” yereegerak ti paga, wone aa'nduk yugu nogo meek negen agagerak me, yi mendek ndi mendek maan mendek etenggen maluk agaatak kenok, mbo pugu menggaarak nogo kokwak aret teppereegerak o.
Currently Selected:
IBERANI 8: WNO
Highlight
Copy
Compare
Share
Want to have your highlights saved across all your devices? Sign up or sign in
