IBERANI 4
4
1Togop me, at ninom yonggonggola ungguurak nduk, ”Woraanip o,” yinuk, abok yo'niragagerak nogo, lek aga'lek awo aret wonage me, nit ambi eerumonggoorak paga, ninom yonggonggola ungguurak meek age kero, liippunuk, eeko logowok o. 2Ninombomini iniki ale'nggen mbaruwak nduk, wone yorogogwaarak koneneegwaarak kwe, iniki abet mba'nuk woolik me, ambi obeelom eekkoloolik we aanom warogo koneneegwaarak nogo kokwak, nit togon ndak-ndak, obeelom wone yo'nirogogwaarak nogo, abet mba'nuk wagangga'lek kenok, unggwi noorak meek age kero, liippunuk eeko logowok o. 3At Ala nen,
”An yonggonggolage minggim, kit ninom yonggonggola
ungguurak abu lek o, yinuk, Nanini nen nowak mbanogo abu aret yoragagirak o,”
yinuk, yereegerak liiru mbanak nogo ti, mbogut-nggween wakkage logonet, at eeriyak mbareegerak nogo, worok togon eeppunuk, muk tat yonggonggolage logonet, yereegerak me, ti ngge nduk yereegerak mbakop? Lek o. Ti, nit abet mbakwi ninom peebi yonggonggola ungguurak nogo aret nduk, yereegerak o. 4Ti'nuk, aap ambi nen Ala wone nogo 6 yippunuk 7 paga eeriyak liiru mbanak nogo, mbiningge logonet,
”At Ala nen yi eekak ndi eekak abok aret eeke nagagirik, nogo 6 yippunuk 7 paga tat yonggonggolage puk wonagagerak o,”
yinuk ari, 5ndi, aap alik ambi nen ari logonet,
”An yonggonggolage minggim, it ninom yonggonggola ungguurak abu lek o,”
yinuk, ari, eereegwaarak liiru mbanak wonage ti paga 6it aa'nduk obeelom wone yorogogwaarak nogo, taganogo mbo pogo mbareegwa, Ala yonggonggolage minggim unggwi noolik me, inobaane'me aakumi alik mendek inom yonggonggola ungguurak nduk yereegerak kogo o.
7Ndi, wone,
”Yogondak kit Ala nen yokkirage kenok, Nineebi o, yinuk,
kinogogumbuk arugup o,”
yereegerak wone aginggwe aa'nduk mbininogo yokkiragarak nogo aret yi tahun ndi tahun eeppunuk, o peebi aap Ndawut nogo togop aret yoreegerak liiru mbaneegerak me, wone, ”Yogondak o,” yinuk, Ndawut yoreegerak nogo ti, Ala nen ne alik ambi eyom paga, aakumi alik mendek inom yonggonggola ungguwak nduk, iniki koombunuk, yoreegerak kogo o.
8Aap Yutak nen yonggonggologo menggam ninombomini piya woraanetak en, Ala nen ne alik ambi eyom paga yonggonggoloorak yereegerak wone nogo ti, yenetak lek kwe, 9-10yereegerak aret me, Ala nen ne 7 paga tat yonggonggolage wonagagerak nogo kokwak, yogondak nit Ala apuri kunduk yonggonggologo logowak nduk, ne ambi puunogo pereegerak wonage o. Ala yonggonggolage minggim ninom yonggonggola ungguurak mbakwi kenok, Ala nen yi mendek ndi mendek abu wakkage nagagirik, tat yonggonggolagagerak nogo kokwak, nit ndak-ndak tat yonggonggologo logogun o. 11Togop me, it Iterali mendek aa'nduk Ala wone taganogo mbo pogo mbareegwa, ”Kit yonggonggola ungguurak lek o,” yinuk, yoragagerak nogo kokwak, nit ndak-ndak yo'nirage kero, unggwi noorak nduk, wakkenet unggogo logowok o.
12At Ala mondok eenik logonet, alik en eerit nage minggi kwak, at oone ti ndak-ndak mondok omaawi alik en ninikime nggaganogo yo'nirage menggerak. Mbuti nggawi ngget peenok-peenok maarak ti, ngget mbuuluk negen me, ninendobanggun yunggu'me mondok pene'na unggwage logonet, ninowak kin eeke menggerak kwe, Ala wone yi perak, ngget mondok alik negen aret me, ninikime mondok nggoguk yi unggwage logonet, eeriyak niniki koonggo monggoorak nogo, abok aret leenogo kin eeppege menggerak. 13Nit aakumi inom, yi mendek ndi mendek ogobakkigirik inom, abok aret at Ala enegen kage menggerak me, ambit-ambi at enegen nega'lek me nduk, kumaa'nariyak abu meek o. At enggaanom paga yi mendek ndi mendek abok aret kin paga menggerak me, nit eeko monggoorak abok at eenu aret me, nit nen mbininogo at yoriyak togon meek aret kogo ogoorik o.
Ala unde ninowe nggwok Yetut aret o
14Nit Ala unde ninowe nggwok Ala aput Yetut nogo, mbogut ta'mban-mban aago kagak irimbaga agi lombok tiyarogon kwi'nari lagangge nagagirik, yogondak ninake eeke wonage me, nit wone abet mba'nuk waganeegurak nogo mondok nggirik-nggerok agago porogo logowok o. 15Nit ninowe nggwok Ala unde nogo nen nit aap nggween paga mendek me, ninobaabut ninggin-nanggin eekwi niinok, ”Eebi,” ninomba'nuk ninake ugun-ugun eekeelik o. Ata, nit ninabut mbaniyak nduk, aaninggin-paaninggin ninoba age menggerak nogo, at togop aret eeke kagak maluk eeka'lek ogogumbuk logonet, waganeegerak eenu me, 16yogondak aaninggin ambi ninoba age kenok, ninabuwa mbake logonet, omaawi ee'ninake kaawok nduk, ninagabiti mbaka'lek at Ala iniki kunik en eeppinanege minggim nogome panggo yi ungguwok o.
Currently Selected:
IBERANI 4: WNO
Highlight
Copy
Compare
Share
Want to have your highlights saved across all your devices? Sign up or sign in
