IBERANI 3
3
Muta tebenak kagak, Yetut tiyanak menggerak wone
1Togop me noreewi o. At mbogut paga menggerak nogo nen, kit at apuri arubagip nduk, kinayonggo pege nagagirik, at apuri leenogo pinagareegerak me, nit wone abet mba'nuk mugurok nogwe niigak, ninowe nggwok Ala unde logonet ninake eeke logowak nduk, nappi wagagerak Yetut nogo, liippogo logowok o. 2At Muta nogo, Ala awi wurik me logonet, eeriyak puk aga'lek ko'lu-kii'me eeke nagagerak nogo kokwak, at Ala nen ninake eeke logowak nduk, at Yetut mippereegerak nogo ndak-ndak eerit nage menggerak. 3O wurik tebenak kagak, aap o wuketak nogo tiyappogo mengga kwak, Muta tebenak kagak, Ala nen Yetut mondok tiyanak logorak mbareegerak o. 4Yi o ndi o ti, aakumi nen aret wuko menggaarak kwe, yi mendek ndi mendek perak, Ala nen aret ogobakkigireegerak. 5At Muta nen, ”An Ala ayeloman aret me,” yinuk, ake eerit nage logonet, peebi eeriyak wone aakumi ineenu aruwak nduk, Ala awi wurik me puk aga'lek ko'lu-kii'me eeke nagagerak kwe, 6Keritut perak, ogoba Ala awi wurik unde aput at aret me, togop aret ko'lu-kii'me eeke menggerak. Ndi, nit perak, nit niniki luunik ale'nggen mbakwi nogo, ”Abet aret ee'ninabi woraagin o,” yinuk, at woroorak tokkogo logonet, mbo pega'lek mondok nu'lek porogo wonogwe niinok, Ala awi wurik ti, nit nineebe aret mbaruwok o.
Ala ninom yonggonggologo logorak wone
7-8Togop me, Aberiniki nen ari logonet,
”Kinombomini karume nogo logonet, inogogumbuk a'nuk,
Ala wone, Nineebi o, yinuk, Ala anini wunduwak nduk liirit-laarit yorit nogo nogogwaarak nogo kokwak, yogondak Ala nen wone kit yokkirage kenok, Nineebi o, yinuk, kinogogumbuk arugup o.
9Karume time 40 tahun paga kinombomini inenggela'me
eerit nage nogo, inigen neego logonet kwe,
Anini wungge kaamun ilik, lek a? yinuk, liirit-laarit
yo'negak mban eeko nogogwaarak me, 10nanini nen mondok mberiragagirak.
Mberirage logonet,
An yokkirage eeka'lek logonet, kiniki mondok worookot-liinik
monggotak yi neebi a, yinuk, 11An yonggonggolage minggim,
kit ninom yonggonggola ungguurak abu lek o, yinuk, Nanini nen nowak mbanogo wone ti abu aret yoragagirak o,”
yinuk, yereegerak me, 12noreewi o. Kit togon Ala mondok eenik menggerak kagak, mbo punuk, abet mbaka'lek kiniki maluk koonit nugwi kiyo, tum wakkologo logonip o. 13”Ala nen ninooka'lek kagak,” mba'nuk, maluk eerit nogo logonet, kiniki omaawi eekkinake kero, wone, ”Yogondak o,” yereegerak nogo ti, lek aga'lek awo aret wonage me, Ala nen yokkirage nogo, konenggo logonet, kiniki eyak wat-wat yogo logonip o. 14Nit aa'nduk wone konembunuk, ”Yi abet aret o,” yinuk, waganeegurak nogo, nggirik-nggerok agago porogo wonogwe niinok, Keritut ninom kunik logonet, eeppinaniyak mbareegerak nogo, eeppinanege logogin aret o.
15”Inogogumbuk a'nuk, Ala wone, Nineebi o, yinuk, Ala anini
wunduwak nduk liirit-laarit yogo nogogwaarak nogo kokwak, yogondak Ala nen wone yokkirage kenok, Nineebi o, yinuk, kinogogumbuk arugup o,”
yinuk, yereegerak liiru mbanak nogo ti, 16taani nen Ala wone konembunuk, ”Woorak nineebi o,” yinuk, at anini wunduwak nduk yogo nogogwaarak mbakop? Lek o. At Muta nen it aakumi Iterali abok aret o Metit nen wogoren wundi wagagerak nogo nen aret liirit-laarit yogo nogogwaarak nogo lek a? 17Ndi, Ala nen anini inoba piige kagak, 40 tahun eereegerak nogo, taani o? Lek o. It maluk eerit nogo mbareegwa, inooreegerak karume kambit nogogwaarak, inowak nggininit nagagerak nogo lek a? 18Ndi, ”An yonggonggolage minggim kit ninom yonggonggola ungguurak mondok lek o,” yinuk, at owak mbanogo wone yoragagerak nogo ti, taani yoragagerak mbakop? Lek o. It at oone taganogo punuk alik eerit nogo nogogwaarak nogo lek a? 19It kinombomini nen aret, at oone abet mba'nuk iniki at oba panggombunuk, mugurok nogo logolik me, it unggwi noorak meek aret agagerak iigo o.
Currently Selected:
IBERANI 3: WNO
Highlight
Copy
Compare
Share
Want to have your highlights saved across all your devices? Sign up or sign in
