2 TETALONIKA 3
3
Ninake tamban eeko logorak yoragagerak wone
1Ndi, noreewi o. Wone abu aret yokkirogoorak kwe, irip paga iluk ambi yi aret me yokkiraawi o. Nit ninowe wone waganggo nogogutik, wiganinuk wundi nogo logonet, tiyappit nogo nogogutak nogo kokwak, togop aret yi awi ndi awi wiganinuk nage logowak nduk, ninake tamban eeko logonip o. 2Ndi, it aakumi abok aret abet mbaka'lek me, it aap maluk eeka abu maluk lombok eerit nugwi nogo nen, nit maluk eerogo pinanukwak, ninogoba nen ninagap ndaruwak nduk, ninake tamban eeko logonip o.
3At ninowe perak, mbo pinanegeelik, mondok liirogon ninake eeke menggerak me, at nen kinomaawi eeppinagage, ndi, at maluk eeke menggerak nen maluk eeppinagakwak kinarum wake, eeke logogin o. 4Kit eeko logorak wone lengganogo yokkirogo monggoorak nogo ti, muk eekwi nineenu aret kwe, ambinom eeko logobagip nduk, ninowe nen eeppinagagin abet aret mbako ogoorik o.
5At Ala nen yi aakumi ndi aakumi iniki kunik aganake menggerak nogo kokwak kit nen ndak-ndak eeppiinet nugwi, ndi, Keritut maluk mendek oba age kagak, yanggonak wonagagerak nogo kokwak, kit togop aret yanggonak wonogwe, eeko logobagip nduk, Ala nen eeppinagage logowak lak, ”Ao,” mbako ogoorik o.
Kineenggi omaawi paga eeko logorak yoragagerak wone
6Ndi, it kinoreewi ando wone, ”Ndogop eeko logonip o,” yokkirogo nogogurak nogo eeka'lek ineenggi tanep we nugwi iinok, kinom nugu logorak mage o. 7Kit ninom logonet, nit ugun-ugun eeko logolik kineenu lombok aret me, eerit nogogurak nogo kit ndak-ndak eerit nogo logonip o. 8Ninom logonet, kinambi onggo lek we ambi nonggo logolik o. Nit wogo nogogurik, kit aaninggin ambinom kinoba pinagakwak, ko'lu-kii'me eerit mban nogo logonet, ndeyak eerogo pinaneegerak nogo kineenu aret o. 9Kinamendek wo'nugwi we noorak op aret kwe, nit eerit nogwe paga ninogut wakkagak kit ndak-ndak eeko logobagip nduk, eereegurak. 10Ninom logonet, ”Aap ambi yabu eeka'lek kenok, mbi magariyak mage o,” yokkirogo nogogurak nogo o.
11Kit ando kit kinobaalombok eekkolaga'lek aakumi inobaalombok mban eerit nugu logonet, yabu eeka'lek we ugun-ugun eerit nugwi yogwe iigirak me nduk, yokkirogo. 12”It aap togop eekwi ti, ineyabu liirogon eekkologo logonet, it inambi mban nonggo logowak o,” yinuk, wone ti abok aret ninowe Yetut Keritut nen yo'niragagerak me, lengganogo yokkiragi o.
13Ndi, noreewi o Kit perak, obeelom eeppiinet nogwe paga ndeyak eekkinake kenok, nineebi mbarugup o. 14Nit wone yokkirogwe liiru mbanak yi, at ambi nen, ”Eeriyak, neebi o,” ari kenok, aap ti liippunuk, enggali aruwak nduk, kinom nugu logorak mage o. 15Wim ogoorak kokwak me nduk, eeppuurak ti lek o. Ata, ”Ninore aret me,” mba'nuk, we aruk liirogon aret wa'nip o. Wone yokkirogoorak yi ti, ninowe Yetut Keritut nen yo'niragagerak me, lengganogo yokkirogo o.
Abu yorage nagagirik, keyage wappiyareegwaarak wone
16Ndi, yogondak nit ugun obeelom logowak nduk, eeppinanege menggerak ninowe endagembogut nogo nen yi eekak ndi eekak abok aret eerit nogwe kiigak, kiniki ugun obeelom logobagip nduk, kinarum logonet, eeppinagit nage logogin o. Kit abok aret ninowe kinom logogin o.
17”At Pawulut nen aret liiru yi mbanggerak kagi,” yinuk, yelok kaawak nduk, irip paga keyage wappiige wone ti an nen aret mbangge minggirak me, liiru yi, ”At nen aret yo'niragaarak,” mbarubagip nduk, irip paga keyage wappinagage wone yi an nen aret mbanggiragi o.
18At ninowe Yetut Keritut kinabuwa mbake me, kit abok aret kinarum logogin o. Wa!
Currently Selected:
2 TETALONIKA 3: WNO
Highlight
Copy
Compare
Share
Want to have your highlights saved across all your devices? Sign up or sign in
