2 TETALONIKA 2
2
At maluk lombok eeke menggerak nogo nen eeke logorak wone
1At ninowe Yetut Keritut wage kenok, nit at ninom kuwak eeriyak wone nogo yokkiraawi o. 2It aakumi nen, ”Ninowe woroorak eyom abu panggoni wagaarak o,” agan wogo logonet, at ambi nen, ”Ala nen wone yo'nege kenok, yokkiragi o,” ndi, ambi nen, ”Lek o. An wone alik ambi yokkira o,” ndi, ambi nen, ”Lek o. Pawulut nen liiru mbaneegerak me, yokkira o,” yinuk, yokkirenet wogwe iinok, kinagabiti nen kiniki ma'nogwe kiyo nduk yokkirogo o. 3It aakumi pilit togop agan wogo logonet, kinambokan laganukwak, liippiigo logonip o. Ninowe woroorak nogo ti, aakumi nen Ala wone, ”Nineebi o,” yinuk, mbo pogo mbarumengga, at mondok maluk eeke menggerak lek eerogo puurak ake lengganak nogo, kin ari waga'lek kagak, woraagin lek o. 4It aakumi nen yi mendek ndi mendek mippunuk, ”Ninogoba Ala aret o,” yinuk, ayuk wukwi, kuguwak amili kumbunuk, alut eekwi, eeko menggaarak abok aret, at mondok maluk lombok nogo nen tebenogo piinok, at alik tiyappake logonet, Ala awi wurik me mi'nari unggwage logominggirik, ”Kinogoba Ala an aret o,” yinuk, yorage logogin o.
5An aa'nduk kit ninom logonet, wone yi apit yokkiragagirak nogo abeko ogotik ilik, lek a? 6At maluk eeke menggerak nogo ti, mbet-mbet woraagin lek o. Ndiyom paga kin ari woroorak koonak wonage nogo paga mban woraawak nduk, at ambi nen tebemborogo wonage nogo kineenu aret o. 7At kumaat-kumaat maluk eerit nage menggerak nogo ti, muk eerit nage kwe, at tebenogo pege menggerak nogo wonok lagangga'lek kagak, maluk nggwok wigak yigin lek o. Tebenogo pege logogin aret o. 8-12Wonok lagi nage kenok perak, at maluk lombok eeke menggerak nogo kin ari woraagin o. Kin ari wage logominggirik, at Ibilit eeke menggerak ndak-ndak at omaawi paga inagabiti worak mendek inom, we piliret eerubok mendek inom, eerit wage logonet, it aakumi Ala nen inagap ndaruwak nduk, wone abet aret ari menggerak nogo, ”Ao,” yinuk, woolik paga maluk agago piyoorak nogo inambokan laganuwok nduk, oone alik negen pugunogo yoranet unggwage logogin o. It aakumi Ala ari menggerak wone wagangga'lek maluk eeriyak mban inikilom mbarit nugwi nogo abok aret, at Ala nen inowak loombunuk, maluk inoba piyaawak nduk, pilit wone agan wage nogo abet mbaruwak nduk, iniki apit agago piyaagin. At maluk lombok ti nen togop eerit wage me, ninowe Yetut mondok tiyanak ayuk worak wage logonet, ambe aagi paga eebe mondok warogo lek eerogo pi woraagin o.
Inagap ndaruwak nduk miiginabeegerak wone
13Kit noreewi o. Nit ninowe nen iniki kunik eekkinabeegerak nogo kit aret kiinok, ”Ala wa,” yoriyak mban ee'ninake menggerak. Kit Ala ari menggerak wone abet mba'nuk waganggwi paga kinomaluk lek eerogo punuk, Ala apuri logobagip nduk, Aberiniki nogo nen leenogo pinagage kagak Ala nen kinagap ndakkinabuwak nduk, kit kinaa'nduk togon miikkinabeegerak me, ”Ala wa,” yoriyak mban ee'ninake menggerak. 14Kit togop eekkinabuwak nduk, nit obeelom wone yokkirogwe niigak wiigiragagerak nogo o. Nit ninowe Yetut Keritut mondok tiyanak menggerak kit kinom ndak-ndak tiyanak logobagip nduk, wiigiragagerak. 15Ti eereegerak me, noreewi o. Ninoone paga yokkirogo nogogurak inom, liiru mbanak paga yokkirogo nogogurak nogo inom, kiniki me nu'lek agago porogo logonip o.
16At ninabuwa mba'nuk iniki kunik logonet, niniki mondok-mondok eyak wappinanege, niniki luunik abe nogo mendek wo'nirage, eeke menggerak ninogoba Ala nogo inom, ninowe Yetut Keritut inom, 17imbirak nogo nen kit obeelom eerit nugwi, wone obeelom mban yoranet nugwi, eeko logobagip nduk, kit kiniki eyak wappinagagwi, kinomaawi eerogo pinagagwi, eeko logowak nduk, kinake tamban eeko monggoorak o.
Currently Selected:
2 TETALONIKA 2: WNO
Highlight
Copy
Compare
Share
Want to have your highlights saved across all your devices? Sign up or sign in
