1 TIMOTIYUT 1
1
PAWULUT NEN LIIRU AA'NDUK TIMOTIYUT AKE
MBANEEGERAK WONE
1-2Naput Timotiyut wae. At ninagap ndakak Ala inom, niniki luunik Keritut Yetut nogo inom, imbirak nen wone lengganogo yo'nireegwaarak paga an Pawulut Yetut Keritut ayonggo mippaneegwaarak nogo nen aret, wone nit apit abet mbakwi nogo paga nen an naput lombok agagindak me, wone ambi yokkiri o.
At ninogoba Ala ninowe Keritut Yetut imbirak iniki kunik nen wokkugwi, kabuwa nen obeelom eeppagagwi, ndi, kiniki ugun obeelom logonok nduk, eeppagagwi, eeko logogun o.
Pilit wone agan wogwe iinok, eeko logorak wone
3-4An o Makendoniya naakit nduk, nage logonet, ”Kat o Epetut taati logot o,” yokkereegirak nogo ti, ”It aakumi tiimbayok mbininggwi, wone alom mbininggo logonet, puk aga'lek niikkenok nogwe, eekwi iinok, niniki abet mbakwi paga Ala nen ee'ninaburak kooneegerak nogo nineenu ariyak nduk ee'ninakwi lek we wone alom kwaako logonet, noone-koone yogwe me, liippugup o,” yinuk, yorage, ndi, it aakumi ando wone alik agan nugwi nogo, ”Mamuniroorak mage o,” yinuk, yorage, eeke logonok nduk, ”Taati logot o,” yinuk, yokkereegirak nogo o. 5Nit wone lengganogo yokkereegurak nogo ti, it iniki abe paga aakumi inabuwa mbakwi, obeelom koonnage kenok mban eekwi, iniki abu abet aret mbakwi, eeko logowak nduk, yokkereegurak nogo o. 6Nit wone yokkugwi yi nogo ti, eeriyak kagak aakumi ando nomonogo mbo punuk, wone lek ariyak mendek mban aanom warogo mbininggo menggaarak. 7It aap ti, ”Ala wone lengganak liiru mbanak mamuniraga mendek logokit o,” mbako menggaarak kwe, it yogo menggaarak inom, ndi, inoone omaawi paga, ”Ti ndogop kaamunggup o,” yinuk, yogo menggaarak nogo inom, it iniki we ugun kobak mban logonet, yogo menggaarak.
8Ala wone lengganak liiru mbanak nogo ndak-ndak eeruwok nduk, waganggwi kenok ti, obeelom aret kogo monggoorak. 9Ala wone lengganak nogo ti, aap maluk eeka'lek iniki obeelom wonogwe iinok yoroolik. Ata, it aap Ala wone lengganak tagangga inom, inogobamini inoone koneniyak ineebi mbaka inom, Ala ayuk wuka'lek meek eerogo pega inom, it maluk eeka inom, iniki liirak lek ugun-ugun eerit nega inom, inagalo-inogoba inooka inom, aakumi ugun-ugun inoorit nega inom, 10kumi ugun wurinaka inom, aap-aap wut-wut yaga inom, aakumi inapuri kumaarinaka inom, pilit pugungga inom, pilit wone inoba pega inom, ti eekwi abok aret Ala wone kole wone kagak alik eekwi iinok, inake aret lengganogo yoragagerak. 11Ala wone kole wone nogo ti, nit alut eeko monggoorak tiyanak menggerak Ala nogo nen obeelom wone an unde logowak nduk, yo'nereegerak nogo aret o.
Ala nabuwa nen obeelom eeppanege me, ”Wa,” ari nagagerak wone
12An nomaawi eeppanege menggerak nowe Keritut Yetut nogo nen, ”Aap yi ambi eeke logowak nduk, unde eeppege neenok, liirogon aret eeke logogin o,” nombake nagagirik, yabu ambi an eeke logowak nduk, unde eeppaneegerak me, ”Wa,” yoge minggirak. 13An aa'nduk noone maluk at yoge, nanini wuulo logonet, at oone waganggwi mendek inoorit nage, at miyuk-meya eerogo pege, eeke nagagirak kwe, abet mbaka'lek ugun neenggo'lek logonet, eeke nagagirak me, Ala nabuwa mba'nuk, teppaneegerak o. 14Ninowe Keritut Yetut ninom kunik me, obeelom eeppanegak mban eeke logonet, an Ala wone abet mbaruwak nduk ee'nake, ndi, aakumi niniki kunik aganabuwak nduk ee'nake, eereegerak. 15”Aakumi maluk eeko menggaarak nogo inagap ndaruwak nduk, Keritut Yetut o yime wambi wagagerak o,” yinuk, yogo menggaarak nogo ti, wone abet aret me, woorak op aret o. ”Aakumi maluk eekwi o,” yogo menggaarak nogo ti, maluk eeka abe iyagalo an aret kwe, 16at nabuwa mba'nuk teppaneegerak. Peebi it aakumi ineenik mondok logorak mbarumenggaarak nogo nen iniki at oba panggombunuk, abet mbakwi paga waganggo logorak nogo inogut wakkagak eeko logorak an neebe aret o. Nit nen Yetut Keritut maluk eeppugwi kwe, onggo mbet-mbet wo'nirage lek liippunuk wo'nirage menggerak nogo maluk eeka abe iyagalo an neebe nogo paga kin aruwak nduk, nabuwa mba'nuk, teppaneegerak. 17Ndi, yogondak, naput o. Yi o ndi o aakumi aa'nduk wonogogwaarak inom, yogondak wonogwe inom, peebi logorak inom, ninogoba endagembogut kanggeelik, mondok itok eenik menggerak ninigen kogolik Ala alik menggerak nogo endage mondok-mondok tiyanak ayuk warak logogin o. Amin!
18-19Ndi, naput Timotiyut wae. Wone lengganogo yokkigirak ti, mondok unde logonok nduk, yokkigi o. Kat awo eeka'lek keegak, ”Peebi ndogop eeke logomunggun o,” yinuk, yokkereegwaarak wone nogo ndak-ndak aret yokkigi o. Kiniki abet mba'nuk wagangge inom, obeelom koonnage kenok mban eeke inom, mondok unde a'nuk, wone yokkigirak abeke logonet, aap wim waka'ngget minggi kwak, kat togop aret kalilaakwi eerit nage logot o. It aap ando iniki obeelom koonnage nogo taganogo punuk, alik eerit nugwi me, yiiro eyo paga lik ari logonet, yigirik-noonom age minggi kwak, it abet mba'nuk waganeegwaarak wone nogo togop aret yigirogo mbo pereegwaarak me nduk yokkigi o. 20It aap Kimeneyut kunduk, aap Aletaret kunduk, togop eereegwaarak me, an nen Ala endage miyuk-meya eerogo pugwi inagabiti mbaruwak nduk, Ibilit unde eeppereegirak aret o.
Currently Selected:
1 TIMOTIYUT 1: WNO
Highlight
Copy
Compare
Share
Want to have your highlights saved across all your devices? Sign up or sign in
