2 KORINDUT 9
9
Ala apuri o Yerutalem mendek inake wu kuwak eereegwaarak wone
1It abet mbakwi Ala apuri o Yureya mendek yeenggwaaroorak wone nogo, nit liiru ambinom mbanogo nappinagi woroorak lek aret kwe, we mbuuluk irip paga iluk yi aret yokkirogo. 2Kit kiniki nen yeenggwaaroorak mbakotak nogo an abu neenu aret o. ”Tahun aa'nduk nogo paga it o Akaya mendek nen Ala apuri o Yureya mendek yeenggwaaroorak iniki aganggen kerek togon muk kooneegwaarak o,” yinuk, it o Makendoniya mendek inenggaanom paga kit kooneegutak nogo wogoppinagage logonet, mbininirage mbaki, it ando nggwok nen, ”Ndi, nit togon ndak-ndak yeenggwaaraawok o,” yinuk, koonggaarak. 3Kit wogoppinagage logonet, yoragarak nogo, ”Yi we aret yegerak,” mbarukwak, an noone yagarak nogo abet aret mbaruwak nduk, kuwak eeriyak kooneegutak nogo woorak nduk, wologwe nappiya wagi ti o. 4”Kit abet aret kuwak eerumunggup,” kinombake logonet, yoragarak nogo, an Makendoniya mendek ninom pekkiya wogo logomonggoorik, ”Yi kuwak eeka'lek kagak yo'niragaarak kogo,” mbakwi iinok, kit ninom ninenggali arukwak, mbet-mbet kuwak eeko logonip o. 5Togop me, aa'nduk, kit kuwak eeriyak yo'nireegutak nogo, ”Yi we ineebi mbako logonet, kuwak eekaarak lek o. Ata, inabuwa nen iniki mba'nuk kuwak eekaarak,” kinombaruwak nduk, an awo waga'lek neegak, it wologwe ti nen pugu nogo kuwak eeko logowak nduk, nappiya wagi ti o.
6Wone yi ti, liippogo logonip o. Aap ambit-ambi nen yabu mbuuluk waganogo yake kenok, mbi mbuuluk aret ndakkolage, ndi, ambi nen yabu nggwok aret waganogo yake kenok, mbi nggwok aret ndakkolage, eeko menggaarak me, 7it aakumi iniki ale'nggen paga kuwak eekwi iinok, Ala inabuwa mbake menggerak me, kit kuwak eeko logonet, kiniki aaninggin nen kineebi mbakak kuwak eeko logogup o. Ata, kinalitik-kinalitak kiniki mba'nuk nen ale'nggen paga kuwak eeko logonip o.
8-9”Aap ambi nen aakumi ineenggilek kenok, inabuwa nen
amendek apit wogorage logomenggerak paga oba
mondok-mondok aberak logogun o,”
yinuk, liiru mbanak nogo ndak-ndak, kit kiniki ale'nggen paga kuwak eekwi kiinok, Ala nen kit, ”Ndi mendek uugwe,” mbarumonggotak kagak, mbaka'lek mendek ambinom kalo logonogo wokkirage logogin me, kit ambi mendek lek kenok uugwe mbarumunggup lek o. Ndi, aakumi inabuwa nen yeenggwaaroorak kunduk, wonage mban aret kaamunggup o. 10It aap mbi awi yako menggaarak nogo nen awi yakwi iinok, ki eeke, ti'nuk, eebe ndaruwak nduk kole eeke, eeke menggerak Ala nogo nen kit kunduk, aakumi yeenggwaaroorak nduk, awi negen pipuk agago nggwok aret wokkirage, ti'nuk, eebe kole eerogo wokkirage minggi kwak, aakumi inabuwa nen wogorogwe kiinok, Ala nen obeelom aret eeppinagage, eeke logogin o. 11Kiniki lek ndoobu logonet, aakumi inake nggwok aret kuwak eekwi paga Ala nen kit kineenggi warak eeppinagage logogin o. Ndi, nit yokkirogwe konembunuk, kiniki ndoobu paga kuwak eekwi me, it aakumi ambik aret Ala, ”Wa, wa,” yogo logogun o. 12Aakumi inabuwa mba'nuk, kuwak eerogo wogorogwe nogo ti, it abet mbakwi Ala apuri aaninggin inoba wonage nogo, lek age, ndi, Ala endage mondok alik negen tiyappugwi, eerugun me, yeenggwaarogo logorak op aret o. 13Kit Keritut eeke nagagerak obeelom wone abet mba'nuk waganggwi kiigaarak nogo ndak-ndak eerit nugwi, ndi, kiniki lek ndoobu logonet, kinamendek it aakumi abok aret o Yureya mendek inom yeenggwaarogwe, eekwi paga, kinabut mbambunuk, ”Ala apuri abet aret iigo,” yinuk, Ala endage tiyappogo logogun o. 14Ala iniki kunik en mondok alik eerogo pinagage kagak, kiniki ndoobu logonet kinamendek it aakumi yeenggwaarogwe kiinok, it aakumi abok aret iniki kunik eekkinako logonet, kinake tamban eeko logogun o. 15Ala ninabuwa nen mondok alik negen wo'niragagerak nogo mbininogo yuurak meek me, at mban, ”Wa, wa,” yogo logowok o.
Currently Selected:
2 KORINDUT 9: WNO
Highlight
Copy
Compare
Share
Want to have your highlights saved across all your devices? Sign up or sign in
