2 KORINDUT 8
8
Inabuwa mba'nuk, inamendek kuwak eerogo wogorogogwaarak wone
1Noreewi o. It Ala apuri o Makendoniya kuwak eeko menggaarak abok nen Ala iniki kunik en eeppiige kagak eereegwaarak nogo yokkiraawi o. 2Aaninggin-paaninggin mondok iya tit inoba age kagak, ”Yi ninabut mbanikit nduk eeppinanege o,” yinuk, iniki ale'nggen ambik mbako logonet, ineenggi abu lek tit kwe, aakumi inabuwa nen inamendek mondok alik negen inake kuwak eekaarak. 3It nen, ”Yi op kuwak eeriyak,” mbakaarak nogo mban kuwak eerulik o. Ata, ”Ti kuli kuwak eeriyak meek,” mbakaarak nogo kagak ambinom mondok iya tit kuwak eekaarak naruk konenggirak me, yokkiragi o. 4-5”It mbuuluk yeenggwaaroorak op aret o,” mbakoorak nogo kagak, it inalik en iniki koombunuk, ”Nit kunduk it abet mbakwi Ala apuri o Yureya inabuwa lombok mbako monggoorak me, inake kuwak eeko logowok o,” yinuk, inoone nabenak mban yo'nirogo nagaarik, nggwok aret kuwak eekaarak. It inamendek aa'nduk kuwak eerulik o. Ata, aa'nduk ineebe apit aret Ala wogogo nagaarik, at Ala nen, ”An mippiige nogo inoone konenggo logowak,” mbake menggerak me, nit ninoone liirogon aret konenggo nagaarik, kuwak eekaarak. 6Togop me, at Titut nogo it Ala apuri inabuwa nen inake pugu nogo kuwak eerit nage me, kit ando awo pega'lek nogo mbet-mbet pumonggotak me, waganggak woraawak nduk aruk wakoorak o. 7Kit kiniki abet mbakwi, iniki ale'nggen paga konenggwi iigak yorogwe, Ala ari menggerak wone kineenu ogwe, kiniki abe paga yeenggwaaranet nugwi, kiniki kunik ee'ninakwi, eekwi ti nogo abok aret nggwok wigak ari me, aakumi inabuwa nen inake kuwak eeriyak yi nogo inom ndak-ndak nggwok aret eeko logobagip nduk, yokkiragi o.
8An wone yokkiragi yi nogo ti, kit mondok eeko logobagip nduk, noone omaawi paga yokkirage lek o. Ata, it ando an noone konembunuk, iniki aganggen kerek togon eekaarak nogo ndak-ndak, kit an noone konembunuk, ”Ndak-ndak eekwi kiyaamun ilik?” yinuk, yokkiragi o. 9Ninowe Yetut Keritut nen kinabuwa mbake logonet, eeppinagareegerak nogo kineenu aret o. At nen, ”An aap nggwok mondok tiyanak aret minggirak kwe, it ninom ndak-ndak tiyanak logowok nduk, an tebeppati wambi o,” yinuk, at nggween paga tebekkola wambi wagagerak nogo o.
10Ala apuri inake kuwak eeko logorak an mbake nogo ambi yokkira o. Tahun aa'nduk nogo paga, kit aa'nduk Ala apuri inake kuwak eegiroorak koombunuk, pereegutak kwe, 11kit ando pega'lek nogo yogondak mondok age yobok togon pogo logorak ti op aret mbaki o. Kiniki aganggen kerek togon kuwak eeriyak koombunuk, ando kuwak eereegutak nogo ndak-ndak, yogondak kinageerok ambi wonage kenok, ti aret kuwak eegirogo logonip o. 12Ninamendek lek me, wogoga'lek kenok ti paga, Ala nen eebi ninombake menggerak lek o. Wonage kagak wogoga'lek kenok perak, eebi ninombake menggerak me, eebe wonage kenok wogogwi, ”Wogorikit lak eebe lek me, ao,” mbakwi, ti imbirak wogogwi mban aret me, inikilom mbake menggerak.
13Kit eeriyak yokkirage nogo ti, it ando ugun puk iigak, kit Korindut mendek nen mban pogo logobagip nduk, yokkirage lek o. Ata, it o alik me mendek togon kinom ndak-ndak pogo logonet, yeenggwa-yeenggwa eeko logobagip nduk, yokkirage agarik o. 14-15Peebi aaninggin kit kinoba age kenok, it Ala apuri o Yureya mendek nen kit yeenggwaagirogo logowak nduk, yogondak kit kinamendek we mbuuluk ka'let agaarak me, kit nen it yeenggwaaroorak op aret mbake agarik o.
”At ageerok ambik kuwak eereegerak nogo ndiinogo
pake, ndi, at amendek mbuuluk kuwak eereegerak nogo
mbet-mbet lek age, eerukwak, ndak-ndak yeenggwa-yeenggwa eeko nogogwaarak o,”
yinuk, liiru mbanak nogo ndak-ndak kit togon yeenggwa-yeenggwa eekwi paga kit kineebe ndak-ndak obeelom aret logomunggup o.
Titut oreewi inom eereegwaarak wone
16Nit nen kinoba aberak me, yeenggwagiroorak mbako monggoorak nogo kokwak, aap Titut togop aret yeenggwagirage logowak nduk, Ala nen iniki koonggerak me, Ala wa yogo monggoorak. 17”An yeenggwaaraakit lak ao,” mbake me, ”Kat o Korindut op noorak ilik, lek a?” awo yogwi niigak, iniki nen aret, ”An aret naakit o,” yinuk, kiya wage ti o. 18Kiya wage me, ninoreeluk ambi obeelom wone yi nggereya ndi nggereya abok aret yoranet nege paga endage ineenu ogogwaarak nogo, imbirak nappiya wogo ti o. 19Nit nen ninowe endagembogut tiyappugwi, ndi, aakumi inabuwa nen yeenggwaarogwe niyaawak nduk inake kuwak eekwi, eerit nogwe nogo, at ninom eeke logowak nduk, Ala apuri nen leenogo mippegaarak me, kiya wage ti o.
20Aakumi inamendek nggwok kuwak eekaarak wogorogo logonet, ninggin ambi eerumonggoorak paga aakumi nen ninenggali wappinanukwak nduk, liippunuk aret eeko ogoorik o. 21Nit ninogoba Ala enegen wonage me nduk mban eekwi lek o. Ata, aakumi inom inigen wonogwe iigak eekwi me, ira naga'lek kagak, nonggop togon eerogo wogora noorak nogo, aa'nduk koonogo pogo ogoorik o.
22It kiya wogwe nogo, ninoreeluk ambi inom nappi wogo o. At ninom eerit nogo logonet, mondok liippunuk eerit nage kogoorak me, ninoone konembunuk mondok abet aret kuwak eerugun mbake logonet, ”An kunduk, liirogon yeenggwaarage logokit o,” yinuk, kiya wagi ti o. 23At Titut nogo an nawot aret me, nimbirak yeenggwagiroorak nduk eeko ogoorik. Ndi, it ninoreewi ando kiya wogwe nogo ti, Keritut endage tiyappogo menggaarak me, Ala apuri nggereya-nggereya lombok nen leenogo nappiya wogwe ti o. 24It Ala apuri nggereya-nggereya alik nogo nen, kit kiniki kunik paga Ala apuri ugun wogonakwi, ndi, ”Pawulut oreewi inom nen it o Korindut mendek tiyappiigwi nogo ti, ti eekwi paga tiyappiigwi iigo,” yinuk, yogwe, eeruwak nduk, inapuri wogwe ti, kiniki kunik paga liirogon wogoninako logonip o.
Currently Selected:
2 KORINDUT 8: WNO
Highlight
Copy
Compare
Share
Want to have your highlights saved across all your devices? Sign up or sign in
