2 KORINDUT 10
10
Pawulut eeke nagagerak alom liirogon mbininogo yoragagerak wone
1”At Pawulut nda wonage logonet, agabiti mbaka'lek mondok lok togon yo'nirage, ndi, nit ninenggaanom kenok perak, agabiti mbakak oone yanggorogon yo'nirage, eeke menggerak o,” yogo monggotak kwe, Keritut ninabuwa nen oone yanggorogon yo'nirage menggerak kokwak, an Pawulut togon ndak-ndak niniki, ”Ao,” mbake logonet, wone ambi yokkira. 2It aakumi ando nen yogo logonet, ”It nggween paga mendek eeko mengga kwak, Pawulut oreewi inom ndak-ndak ambi kolaawak nduk eerit nogo agaarik o,” yogwe iinok, an noone omaawi paga it yoroorak mbakirak nogo kokwak, kiya wage logominggirik, kit togop ndak-ndak yokkirookwak, noone yanggorogon yokkirage ti aret liippunuk, eeko logonip o. 3Nit nggween paga yime nugu monggoorak ti abet aret kwe, it nggween paga mendek eeko menggaarak nogo kokwak, nit ambi kolaawok nduk, eerit nogwe abu lek o. 4It tebembinaniyak nduk eekwi nogo, ninom perenggolaawok nduk, it nggween paga mendek ineegin nogo mendek nit porogo wonogwe lek o. Ata, yigin unde Ala nogo ninenggaawak paga punuk, pak mondok nu'lek wurik kagak toguk togon eerogo pegak inoori ungguurak nogo mendek aret porogo ogoorik o. 5At Ala mban ninenggaawak paga punuk, it abe wone taganogo punuk inoone we ugun agan nugwi nogo inoone lek eerogo piigwi, ”Ala wone mban kineenu a'nuk logorak ti meek o. Ata, yi wone ndi wone abok aret kineenu ariyak perak op o,” yinuk, wogoppatit nugwi nogo tebenogo piigwi, ndi, nit niniki mba'nuk eeriyak koonit nugwi nogo tebenogo punuk, Keritut yo'nirage kenok mban eekwi, eerit nogo ogoorik o. 6Nit nen kit yokkirogwe niigak, alik eekwi kiinok, ninoone omaawi paga onggo yokkiroorak kwe, kit nen nit ninoone konembunuk, ”Eeko logomunggup ilik lek a?” yinuk, eeko logorak kinabut mbangga'lek me, we yanggorogon aret yokkirogo ogoorik o.
7It ando nen, ”Nit mban Keritut apuri ogoorik o,” yinuk, yogwe nogo nen, ”It togon ninom ndak-ndak Keritut apuri aret iigo,” yinuk, ninombako logowak o. Wone ti, kenom paga aret wonage me, kit nonggop nduk, liippega'lek ogotik? 8Kit maluk eerogo pinagakit nduk, at nogoba nen awoneninu kili'nirulik o. Ata, obeelom eeppinagakit nduk, kili'nireegerak nogo paga yokkirage me, ”At wogoppake logonet, yo'nirage o,” yogwe kwe, an nenggali mbaka'lek aret agarik o. 9-10”At Pawulut nen liiru paga mbannirage logonet, oone omaawi mondok lok togon yo'nirage menggerak kwe, pe'niya wage nagaatik perak, eebe abu meek logonet, wone nano agan nage negen yo'nirage menggerak o,” yinuk, yogwe kiigirak me, ”Ninagabiti mbaruwak nduk liiru mbanogo nappinani wage kagi,” yinuk, nombakwi ti mage o. 11It aap wone togop yogo menggaarak nogo nen, ”Pawulut ndogop eerigin o,” yinuk, liiru mbanogo nappinani wage menggerak nogo eebe niya wage kenok, liiru mbanak nogo ndak-ndak yo'nira woraagin abet aret mbako logowok o.
12It aakumi ando wogoppatit nugwi nogo it iya me, ninom lambunggwi, ninom ndak-ndak wakkogwe, eeriyak meek aret mbako ogoorik o. It aap togop mbakwi ti, an iya kat iya yogo logonet, it eekwi mban wakkagak mbininggo menggaarak me, it abu wi negen yogwe iigo o. 13Nit nineebe nen aret Ala wone yora naga'lek kenok, we ugun, ”Nit ninapuri aret o,” yinuk, yugun lek o. Ata, Ala nen, ”Time aret yora nogo logonip o,” yinuk, yo'niragagerak nogo liirogon yorogwe niigak, obeelom wone waganeegwaarak nogo kenok mban, ”Ninapuri aret o,” yinuk, niniki ale'nggen mbako ogoorik. Ndi, ”O Korindut kunduk yora nanip o,” yinuk, yo'nirage mbareegi, liirogon yokkirogwe niigak, obeelom wone waganeegutak me, kit ninapuri aret kinombako logorak op o. 14Nit Keritut eereegerak obeelom wone yokkira wogogurak nogo, at Ala mbaka'lek kagak, nit nen mban yokkira woroolik o. Ata, Ala nen, ”O time yora nanip o,” yo'nirage mbareegi, kit kinom yokkira woroorak mbareegerak me, yokkira wogogurak o. 15Ala nen, ”O time yora nanip o,” yo'niraga'lek kenok, aap alik en yorogwe iigak obeelom wone waganggwi iinok, ”Nit ninapuri aret o,” yinuk, yugun lek kwe, kit abet mbakwi nogo mondok mugurok nogwe paga kiniki kole ogwe kiinok, nit yoranet nugu logorak Ala nen koonogo pereegerak nogo ti, nggwok togon wiganinuk noorak, ”Ao,” mbako ogoorik o. 16It aap alik nen yoramenggaarak kagak, ”Nit ninapuri o,” yinuk, inapuri ndinggo'nok wogoppatiyak ti nineebi o. Ata, kit kiniki kole ogwe kiinok, it Ala wone konengga'lek o ambokan time mban yora noorak mbako ogoorik o.
17Kit ambi nen wogoppatiyak mbakwi kenok, kit eeko monggotak paga lek o. Ata, Ala nen eeppinagage kagak, eeko monggotak me, at mban wogoppogo logonip o. 18Ndi, aap ambi nen, ”An obeelom aret o,” ari kenok, aap ti abet aret obeelom ombariyak ti lek o. Ata, Ala nen ari kenok perak, aap ti abet aret obeelom ombariyak o.
Currently Selected:
2 KORINDUT 10: WNO
Highlight
Copy
Compare
Share
Want to have your highlights saved across all your devices? Sign up or sign in
