2 KORINDUT 5
5
1Ooliya wurik kwak ninagabolo yi, mi-mi wangge kenok, obaane'me ambi mbogut page wurik wonage nineenu aret o. Mbogut paga wurik ti, aakumi nen wurogo pinaneegwaarak lek o. Ata, Ala nen aret wurogo pinaneegerak me, mondok-mondok aret logogin o. 2-3Ninagabolo mbogut paga mendek nogo awo yippinanega'lek kagak, ninagap mbelanak niyookwak nduk, ooliya wurik kwak ninagabolo maan mendek yi, lek eerogo obaane'me mbogut paga mendek mbet-mbet yippinanuwak lak, ”Ao,” mbako ogoorik. 4Nit ninagabolo maan mendek yi, ”Nineebi o,” yinuk, mbo punuk, we ninagap mbelanak logorak mbakwi lek o. Ata, nabelan-kabelan eeppinanege logonet, ngget mendek mbet-mbet yippinanuwak lak ”Ao,” mbarit nogo logonet, ooliya maan wurik yi paga aaninggin kagak aret nogo ogoorik o. 5Nabelan-kabelan wo'niroorak nduk, niniki pipuk eerogo pinanege menggerak nogo ti, Ala aret o. Nit nabelan-kabelan ti, abet aret eeppinanigin, mbaruwak nduk, Aberiniki aret wo'niragagerak me, niniki tayenak ale'nggen aret ogoorik o.
6-7Ninagabolo maan mendek yi wonage kagak, ninogoba awoore'nggam unggwi noorak meek nineenu kwe, Ala nen, ”Eekkinabigin o,” yereegerak nogo ninigen kenok eekwi lek o. Ata, ninigen kaga'lek logonet, abet mba'nuk, eerit nugwi me, niniki ale'nggen aret kenok yokkirogo. 8Ninagabolo yi nggonenogo mbo punuk, ninogoba wonage me, mondok-mondok ka noorak uugwe lombok mbakwi kwe, Ala iniki koongga'lek kenok wonogo ogoorik o. 9-10Togop me, ninagabolo yi nggonengga'lek logonet, maluk-obeelom eeko nogogurak nogo, Keritut nen ninowak loonogo onggo ndak-ndak wo'niraawak nduk, nit abok aret at owagam kuwak agago pinanigin me, ninagabolo yi nggonengga'lek kagak, nggonenak kagak, Ala inikilom ninombaruwak nduk mban eerit noorak mbakoorak me, niniki ale'nggen mban ogoorik o.
Ala nen Keritut eereegerak paga ninom lambumbinaneegerak wone
11Nit abok at owagam kuwak eeppinanigin nineenu me, ninagabiti mbako logonet, yi aakumi ndi aakumi abok abet aret ninoone aganggen kerek togon yorogo monggoorak kwe, alom ti nduk, yorogo monggoorak nogo ti, Ala eenu aret o. Ndi, kit togon kinikime togop aret eekkinake me, kineenu aret mbake agarik o. 12Nit wone yokkirogwe ti, nit iya me, kit wo'ninabubagip nduk, yokkirogwe ti lek o. Ata, it inobaabut liippiiga'lek logonet, inetenggen liippunuk mban iya mbakwi nogo nen ninabok mbanggwi iinok, kit puk arugup o. Ata, ”Ninogobamini aret me,” yinuk, ninaana'le mbanggo logobagip nduk, yokkirogo ogoorik o. 13Nit yorogwe paga, ”Kumili o,” yo'nirogwe iigak kwe, Ala tiyappuurak nduk, agan nugwi niigak, yo'nirogwe me, op aret o. Ndi, ”Aap iniki warak logonet, yo'nirogwe o,” yinuk, yogwe iinok ti, kit ambi eeppinagawok nduk, yokkirogwe me, op mban o. 14-15Aap ambit Keritut nogo nit aakumi abok ninobaane'me kambeegerak nogo paga nit abok at ninom kunik me, kangge logonet, ninom aret kambeegurak nogo lek a? Ndi, ”Nit ninobaane'me kambeegerak nogo ti, nit ninobaalombok mban eerit nugu logowak nduk, kambulik o. Ata, at ninake kangge mbareegi, eenik agago mippereegerak nogo, ake eerit nugu logowak nduk, ninobaane'me aret kambeegerak kogo,” yinuk, Keritut ninabuwa nen eeppinaneegerak me, eereegerak wone ti, nit puk aga'lek yoragak mban eeriyak ee'ninake o.
16Togop me, it aakumi alik mbeenak abe iinok mban yorogo mengga kwak, nit togop yorogo logogun lek o. Aa'nduk abet aret, ”Keritut ninowe endagembogut ninom mondok logorak nduk niya wagagerak yi aret o,” yinuk, niniki at oba panggombereegurak kwe, yogondak at eebe togop mban wonage me nduk yokkirogwe lek o. Ata, yi aakumi ndi aakumi abok ninabuwa nen ninobaane'me kambeegerak kenok, yokkirogo ogoorik o. 17Aap ambi Keritut imbirak kunik wonage kenok, at iniki ngget ogobakkigirogo pemenggerak me, obaabut maan mendek lek age logonet, obaane'me ngget mendek aret arigin o. 18Wone apit yogoorak nogo ti, Ala nen aret eeppinanege menggerak. Ala ninom ogoorak wonogogurak kwe, at nen Keritut eereegerak paga ninom lambumbinaneegerak me, nit Ala ninom lambumbinaniyak wone yi, yorogo logowak nduk, unde eeppinaneegerak. 19At Ala nen, ”An nogo ti yi aakumi ndi aakumi abok an noone taganggwi iigak kwe, neenggi linggingga'lek aret logonet, Keritut eereegerak paga ninom lambunnogogurak o,” yinuk, yorogo logowak nduk, wone unde eeppinaneegerak eebe nogo ti aret o.
20Togop kenok, nit Keritut obaane'me oone wonok yoranet nugu logowak nduk, mippinaneegerak logonet, Keritut eereegerak ti paga, ”Ala kinom ogoorak logorak lek o. Kinom lambuninip o,” yinuk, Ala nen oone nabek togon yokkirage negen nit aret yokkirogo ogoorik o. 21At Ala nen nit Keritut ninom kunik niige logominggirik, ”Kit abu obeelom o,” yinuk, yo'niraawak nduk, Keritut maluk eeke logolik kwe, nit ninomaluk nogo at oba lenggenogo pereegerak.
Currently Selected:
2 KORINDUT 5: WNO
Highlight
Copy
Compare
Share
Want to have your highlights saved across all your devices? Sign up or sign in
