2 KORINDUT 6
6
1-2At Ala nen ari logonet,
”Ndiyom paga inoone konembunuk, inagap ndarikit o,
yinuk, kooneegirak nogo ndak-ndak, kinoone
konembunuk aret kinagap ndareegirak o,”
yinuk, yereegerak liiru mbaneegwaarak me, konenggo logonip o, noreewi. ”Ndiyom paga inagap ndarikit o,” yinuk, kooneegerak nogo ti, yogondak aret kinagap ndariyak mba'nuk, yereegerak me, Ala ninom yabu ambit eerit nogwe niigak, at kinabuwa nen obeelom eeppinagage nogo, ”We aanom warogo eeppiige agarik kagi,” kinombake kero, niniki, ”Ao,” mbako logonet, yokkirogo ogoorik o.
3Nit ambi eerumonggoorak paga yiluk ari kenok wone yokkirogo logorak unde eeppinaneegerak nogo, meek eerogo pukwak nduk, nit mondok liippunuk mban eeko ogoorik o. 4Aaninggin-paaninggin ninoba kwi'nage, maluk ninoba age, ”Nonggop eeruwi,” yinuk, niniki piirik ee'ninake, 5keele maarogo mambinanugwi, yawi ninookwi, keekok paga niniki taganggwi, yoranet nugu niigak, anggon-panggon ee'ninake, wu yega'lek nogo yega'lek kinoba aberak mban wonage, mbi abu tit nogo yugwi, 6niniki mondok abe paga yokkirogwe, nit wone nineenu abok aret kineenu eeppinagagwi, ninaanaganggenggwi lek kwi'ndak logonet yokkirogwe, kinabuwa nen yanggorogon kinaruk wakwi, Aberiniki ninom kunik logonet mamunggirogwe, nineebi mbaka'lek ninom abu kunik logonet yokkirogwe, 7Ala ari menggerak wone yokkirogwe, Ala omaawi paga eeppinanege kagak eerit nugwi, obeelom mban eerit nogo logonet, wone ti nineegin-ninomaale kwak li'luk eerak wonok nugwi, 8tiyappinanugwi, tebembinanugwi, ninabok mbanggwi, ninayuk wukwi, abet kenok mban yorogo monggoorak kwe, pilit ninoba pinanugwi, 9it ando, ”Aap inendage lek mendek o,” yinuk, ninombakwi kwe, ando perak, maloppinanugwi, kambuurak kwe, nineenik wonogwe, ninookwi kwe, kangga'lek aret wonogwe, 10niniki puru ari kwe, kagak ale'nggen mbakwi, nineenggi lek kwe, it apit ineenggi warak eeppiigwi, ninamendek lek aret kwe, yi mendek ndi mendek abok aret unde eerogo pakwi, eerit nogo monggoorak nogo abok aret, ambi eerumonggoorak paga yiluk ari kenok, nit wone unde eeppinaneegerak nogo meek mbarukwak, Ala ayeloman logonet, ”Eerit nogwe yi iya,” yuwak nduk, mondok liippunuk aret eerit nogo ogoorik o.
11Kit Korindut mendek yi wae. Nit niniki ee'ninake nogo ambi teppega'lek abok aret paganogo yokkirogo o. 12Kit ninom niniki kunik me, ee'ninake ugun paganogo yokkiroorak op mbakwi kwe, kit perak, eekkinake nogo paganogo nit yo'niroorak meek aret kiigo o. 13Togop me, kit nit niniki kunik kinombakwi kwak, kit ndak-ndak ninombako logonet, eekkinake nogo abok aret paganogo yo'niroorak nduk, kit napuri an kinogoba negen logonet yokkiragi o.
”It abet mbaka'lek mendek kinom nugu logorak mage o,” yoragagerak wone
14O eya inom, apit inom, imbirak lambuniyak op mbakop? It obeelom eeko menggaarak inom, Ala wone yugu taganggo menggaarak inom, inom lambunik logonet, eekkoloorak op mbakop? 15-18Keritut ari kenok Tile nen, ”E o,” ari, ndi, Tile ari kenok Keritut nen, ”E o,” ari, yogo menggaarak mbakop? Ala awi wurik me nen eekwi inom, kugi awi wurik me nen eekwi inom, ti imbirak ndak-ndak eekwi me nduk yogo ogotik? Ndi, it abet mbakwi inom, abet mbaka'lek inom, nano paga iniki ambit eeppunuk, lambunik logorak mbakop? Mondok lek aret me, it aakumi abet mbaka'lek nogo, ”Ninom niniki ambit aret o,” yinuk, ugun kinom nugu logorak ti mage o. At Ala nen ari logonet,
”An aakumi inenggela'me logonet, it ninom nege logogin.
Ndi, it an napuri a'nuk, wonogwe iigak, inogoba Ala an aret logogin o,”
yinuk, ari nagagirik, ti'nuk, ninogoba nen wone ambi ari logonet,
”Togop kenok, it eeko menggaarak mbo punuk, ineebe kinom ogookkolaanip o.
Ogookkologo logomonggotik, maluk mondok eeka'lek kiinok,
an nen keyage warogo wokkinabigin o.
Wokkinake logominggirik, an kinogoba aret age, ndi, kit komologwe inom, wologwe inom, an napurilogwe ogwe, eerumunggup o, yinuk,
an kinogoba Ala nggwok nen aret yokkiragi o,”
yereegerak nogo ndak-ndak, nit nineebe ti, Ala eenik menggerak awi wurik aret me, it aakumi abet mbaka'lek iinok, ”Ninom niniki ambit aret o,” yinuk, ugun kinom nugu logorak lek o.
Currently Selected:
2 KORINDUT 6: WNO
Highlight
Copy
Compare
Share
Want to have your highlights saved across all your devices? Sign up or sign in
