2 KORINDUT 4
4
Togolowak nggween mendek ogobakkigirik nogo paga mbogut paga mendek yonggolak wone
1Nit wone ti, yorogo logowok nduk, Ala nen ninabuwa mbake logonet, unde eeppinaneegerak me, wagangga'lek iinok, niniki maluk arugun lek o. 2Inenggali ariyak mendek kagak, kit ninapuri arubagip nduk, mbabok ambi eeppinagagwi, kit nen nineebe wo'ninabubagip nduk, koonggo'net nugwi, Ala wone kagak alik pugunogo yokkirogwe, ti eeko logolik o. Nineebe mbo pinaniyak mbakwi kenok, wo'ninaburak mbakwi kenok ti, ”Ala mban koonigin o,” mbako logonet, nit we at ari menggerak wone nogo mban paganogo yokkirogo monggoorak. 3Nit obeelom wone yorogo monggoorak nogo yelok kaga'lek wonogwe iinok ti, it abet mbaka'lek logonet, kambit nogwe nogo nen mban yelok kaga'lek wonogwe o. 4It aakumi ti, at Ala etenggen ndak-ndak mondok tiyanak aakumi, wiigwi Keritut wone nogo, yelok kogo logomenggaarik, abet mbarukwak nduk, at o yime unde menggerak Ibilit nogo nen iniki apit eeroog piyareegerak me, yelok kaga'lek aret wonogwe o. 5”Nit aap iya o,” yinuk, eeko monggoorak mbininogo yokkirogwe lek o. Ata, at Yetut yereegerak ndak-ndak, nit kit kinayeloman logonet, ”Keritut Yetut ti, ninogoba aret me, at mban iya o,” yinuk, yokkirogo monggoorak. 6At nen ari logonet, ”O apit me eya aruwak o,” yinuk, eya eereegerak nogo inom, ndi, Keritut etenggen liippunuk, Ala mondok tiyanak, wiigwi wone nogo nineenu age kenok, ninikime eya kaawak nduk, eya ee'ninabeegerak nogo inom, ti eebe ambit Ala nen mban aret eereegerak o.
7Nit Ala unde eeppinaneegerak nogo ti, ninageerok niniki kundugu kwak aret me, aakumi abet mba'nuk, waganggwi iinok, inikime mondok alik lombok eeppiinet nage kogo logomenggaarik, ”Yi aakumi inomaawi paga eekwi lek o. Yi Ala omaawi paga aret eeppiinet nage o,” yinuk, kin kogo logowak nduk, togolowak nggween mendek ogobakkigirik nogo paga yonggolak wonage o. 8Aaninggin aan mbele agago pinanegaatak kwe, kagak, aret wonogwe o, ”Nonggop eeruwi o,” yinuk, niniki piirik wonogwe kwe, lek aga'lek, kagak aret monggoorak. 9Piyak-payak eerogo pinanugwi iigak kwe, Ala nen mbo pinanegeelik o. Ndi, ninookwi kwe, kanggwi lek mban aret o. 10Nit nineebe eeppinanugwi ti paga, at Yetut nggween paga logonet eeke nagagerak nogo, kin kaawak nduk, Yetut wako mbareegwa, kambeegerak nogo kokwak, nit togon ndak-ndak ko'lu-kii'me nineebe ninookwi paga kanggwi negen aret eeko ogoorik. 11Nit ninagabolo kanggwi yi paga, Yetut nggween paga logonet eeke nagagerak kin kaawak nduk, nit nineenik awo wonogwe yi, Yetut eereegerak wone agan nugwi paga ko'lu-kii'me nineebe ninookwi paga kanggwi negen aret eeko ogoorik o. 12Nit wone yokkirogo monggoorak ti paga, nineebe ninookwi iinok, kanggwi niigak kwe, kit perak, waganggwi paga kineenik eekkinake agaarik o.
13Togop ee'ninake tit kagak, at ambi nen ari logonet, ”An wone ti, abet mbake logonet yagarak o,” yinuk, liiru mbaneegerak nogo, nit niniki at mbareegerak ndak-ndak me, obeelom wone abet mbako logonet, yogo ogoorik o. 14At ninowe Yetut eenik agago mippereegerak nogo nen peebi nit ndak-ndak nineenik agago mippinanege logominggirik, kit ninom ndak-ndak at owagam pinani nagin nineenu me, obeelom wone ti, mondok abet mbako logonet, yogo ogoorik o. 15Togop me, aaninggin ninoba pinanugwi nogo ti, kit kinake aret eeppinanugwi me, op aret o. Ala ninabuwa nen obeelom eeppinaniyak wone at ambi waganggak, at ambi waganggak, eerit wiganinuk nage paga it aakumi apit Ala, ”Wa,” yinuk, at alut eeko logowak nduk, eeppinanugwi me, op aret o.
Abet mbako logonet, eerit nogo logorak wone
16Togop kenok, aaninggin ninoba pinanugwi kwe, niniki lek-lek ee'ninakeelik o. Eerit nogo logonet, ninagabolo lebenak arit unggwage logonet, kambuurak kwe, niniki perak, ko'lu-kii'me nineenik ngget mendek eeppinanit unggwage menggerak. 17Yogondak piyak-payak eerogo pinanugwi yi, peebi eeppinaniyak ndak-ndak abu lek o. Peebi eeppinaniyak nogo ti, yi mendek ndi mendek tebenak kagak, nit tiyappinanemenggerak nogo mondok-mondok tiyanak logogun me, yogondak eeppinanugwi yi, ”We luulu mbuuluk aret eeppinanugwi o,” mba'nuk, niniki kwi'ndak logonet, waganggo ogoorik o. 18Nit yi mendek ndi mendek ninigen kogwe ti, luulu aret me, niniki yi paga panggombunuk, wonogwe lek o. Ninigen kaga'lek nogo mendek perak, mondok-mondok menggerak me, niniki ti paga panggombunuk ogoorik o.
Currently Selected:
2 KORINDUT 4: WNO
Highlight
Copy
Compare
Share
Want to have your highlights saved across all your devices? Sign up or sign in
