2 KORINDUT 11
11
Aap pilit wone agan wogwe iinok, eeko logorak yoragagerak wone
1An aap kumili-kumili negen logonet, wone yi yokkirage kwe, kagak konenggo logobagip nduk, yokkiragi o, noreewi. 2Kit an napuri, kwe aap kigin waka'lek nogo kokwak logonet, kinogonggelo ambit Keritut aret kolaabagip nduk, abok yokkirage nagagirak nogo kagak, aap alik koloorak nduk, eekwi kiige nagarik, Ala nen apuri at oone mbo punuk, alik mugurok nogwe iinok, iniki wakkolage minggi kwak, an ndak-ndak niniki abu wakkolage agarik o. 3Waalo oone amburu ndik-ndik kwe Kawa yoge logonet, at ambokan laganeegerak pogom, it aap alik en inoone amburu ndik-ndik yokkirogwe iinok, ”Ninogonggelo Keritut oone mban konenggo logowok o,” yinuk, abet aret miireegutak nogo mbo punuk, nomonggiren nogwe iyo, nagabiti mbake logonet, yokkirage agarik o. 4It aakumi alik en wogo nagaatik, kit Yetut waabagip nduk, wone aa'nduk yokkirogo nogogurak nogo kagak, aap alik ambi nen we piliret, ”Yi Yetut aret o,” yinuk, yokkira wogwe, Aberiniki waganeegutak nogo kagak, we piliret, ”Aberiniki ambi yi aret o,” yinuk, yokkirogwe, ndi, obeelom wone abet mba'nuk, waganeegutak nogo kagak, ”Wone obeelom wone ambi yi o,” yinuk, agan wogwe, eekwi iigak, ”Nonggop yogwe iyaamun?” yinuk, ”Puk wonogwe,” yogwe iigirak me, nagabiti mbake logonet, yokkirage agarik o.
5It wone yokkira wagaarak mondok iya mba'nuk, tiyappiigwi nogo ti, an meek nomba'nuk yogo ogotik? 6Noone ninggin negen ari minggirak kwe, neenu logonet aret ari minggirak kineenu aret o. Nit kinenggela'me logonet, eerit nogo nogogurak nogo ti, abok aret kineenu me, ngge yokkiroobok aga o.
7Kit obeelom eeppinagakit nduk, an niniki tebeppatinuk, Ala eeke menggerak obeelom wone nogo onggo lek we aret yokkirage nagagirak ti paga maluk eeppinagareegirak kero. 8An kit kinake eeke neegak kwe, kit nen yeenggwanega'lek kiinok, Ala apuri nggereya-nggereya alik me nen yeenggwanogo nogogwaarak me, it inageerok yogoot negen waganeegirak kagi o. 9An kinenggela'me wonage neegak, namendek lek kenok, noreewi Makendoniya mendek nogo nen wogo nogogwaarik, inamendek abok aret wo'niri wogogwaarak me, kit ambi wo'nirububagip nduk, an abu nggino yokkiroolik o. An yokkirage paga aaninggin ambinom kinoba arukwak, an neenggi paga mban liirogon eekko'net nage nagagirak me, yogondak kunduk ndak-ndak aret eekko'net nage logogin o. 10”At Pawulut o Korindut Ala wone yorage kagak kwe, at ake eeka'lek iinok, alik nen mban eekko'net nage nagagerak me, wi!” yinuk, o Akaya enagan-ambokan tiyappanit nugwi nogo, ”Mage,” yoraagin lek o. An Keritut wone waganeegirak paga pilit yuurak lek me, abet aret yagi o. 11”An tiyappanit nugwi nogo, Mage, yoraagin lek,” yokkirage nogo ti, kinabuwa mbaka'lek logonet, yokkirage mbakop? Lek o. An mondok kinabuwa mbake nogo ti, Ala eenu aret o.
12An wone yokkiragarak nogo alom ti, yi aret o. It aakumi wone alik yokkirogo menggaarak nogo nen, ”Pawulut inom eeko menggaarak nit ndak-ndak eeko monggoorak o,” yinuk, wogoppatit nugwi nogo, inoone mondok lek eerogo piyaakit nduk, an eeke minggirak nogo ti, mondok ndak-ndak aret eeke logogin o. 13It aap ti nen, ”Nit Keritut nen nappinani wagaarak o,” yinuk, inoone eegu yimela-nimela agan wogo logonet pilit pugunogo yoranet nugwi, aakumi wi-wi aganako logonet inambokan laganggwi, eerit nogo menggaarak. 14At Ibilit kunduk it Ala yonggo nugu menggaarak maluk eeka'lek abe mban menggaarak melaikat nogo inetenggen negen kumbunuk, eerit nage menggerak me, ”Wi!” yugup o. 15Inogoba eerit nage kokwak, apuri ndak-ndak aap abe eeko menggaarak inetenggen negen kumbunuk, eerit nugwi iinok, ”Iya!” inombarugup o. It eerit nugwi nogo ti, irip me time onggo ndak-ndak eeppiige kaagun o.
At Pawulut wone yoranet nege kagak, aaninggin oba age nagagerak wone
16”Aap kumili negen ari nombarugup o,” yinuk, ne ambinom yokkirage o, noreewi. Ndi, kumili negen mban nombakwi kiinok perak, an togop aret logonet, kit wogoppanubagip nduk, eeke minggirak mbininogo yokkirage neegak, konenggo logonip o. 17Kit wogoppanubagip nduk, yokkiraakit mbakirak nogo ti, Ala nen yo'nege kenok yigin lek o. Ata, kumili negen logonet, yokkirage neyaamunggup o. 18It aakumi nggween paga mendek wogoppako logonet, yogo menggaarak me, an togon ndak-ndak wogoppake logonet, wone ambi yokkira. 19It aap wi nen yogwe iinok, ”Nit abok nineenu nogo ari me, ari logowak a,” yinuk, teppiigo monggotak me, an ndak-ndak ari neegak teppanugo logobagip nduk yokkiragi. 20It aakumi nen inayeloman eekkinakwi, kinamendek lek eerogo nanet nugwi, keele maarogo tebembinagagwi, tiyappako logonet, meek eerogo pinagagwi, kinetenggen paga tela eerogo kinookwi, eekwi iigak, ”Op aret o,” yinuk, puk ogwe kiigirak kwe, 21nit perak, togop eeppinagarak ninagabiti nen inoone yanggorogon yokkirogogurak me, ninenggali aga o.
It aap kumili negen ugun yogo mengga kwak, an togop yuurak neebi mbake kwe, it aakumi ando inagabiti lek, ambi eekaarak paga wogoppakwi me, an togon nagabiti lek mbuuluk wogoppatiyak mban tit mbake agarik o. 22It wogoppako logonet, ”Nit Iberani mendek o,” yinuk, yogwe me, an kunduk Iberani mendek aret o. It nen, ”Iterali mendek nit aret o,” yogwe me, an togon Iterali mendek aret. It nen yogo logonet, ”Abarakam ombo wologwe nit aret o,” yogwe nogo an togon Abarakam ombooluk aret o. 23Keritut ayeloman logonet, ake eeko monggoorak mbakwi me, an kunduk Keritut ayeloman mondok iya lombok eeke minggirak. Wone yi aap kumili nen yogo mengga kwak ari kwe, abet aret me, konenggo logonip o. Keritut ayeloman logonet, ake eerit nage neegak, ndonggoppanege, keele maarogo mambiigo menggam mambanugwi, kineengi lingginiyak meek nookwi, kambuwak nduk, nabenak mban ee'nabeegerak mendek neenik age, it ando teeluk negen eeppiigo logonet, an perak mondok iya lombok eeppanugo nogogwaarak. 24It aakumi Yakuri mendek nen mbam yawi paga ne 5 paga nooko logonet, ne 39 kuli nookwi, 25mbut yawi mbanak ne kenagan paga nggwiirit nookwi, ne ambit paga yugum togu agago panugwi, yiiro paga nage me, ne kenagan paga yigirik-noonom eerogo panege, niyoome tabunogo wuppaneegerak logonet, ngguumo wake tit neegak, nogo ambi yege, 26yi awi ndi awi nege me, niyo wurik wage logonet, wo'neren noorak eeke, aap yogoot wagangga nen nooriyak eekwi, an nowe-nawot aap endekem mendek inom nen maluk eeppanugwi, koota inom, karume inom, yi nggwok yenggenak me inom, noreewi pilit yogo menggaarak inenggela'me inom, it abok nen maluk eeppaniyak nduk, eereegwaarak kwe, a'me lik yulik, mbeyok yereegerak. 27Yoranet mban nage neegak, ndeyak eerogo panege, kulinik-kalinik nogo yega'lek neenik mban wonage, mbi abu ee'nake, yi abu ee'nake, mbi lek kenok abu nogo yege, kani lek kenok togwi aret nogo yege, nayum lek me we aret nege, eeke nagagirak nogo ti, an neenu aret o. 28Ti we nagabolo paga mban ee'nabeegerak me, yagi o. Ndi, niniki nen perak, Ala apuri yi awi ndi awi wonogwe nogo abok aret inoba aberit nage minggirak ti inom aaninggin mban aret o. 29It aakumi iniki aaninggin ogwe iinok, an kunduk niniki aaninggin age, it maluk eekwi iinok, ”Ao,” mbake logonet, niniki wakkolage, eeke minggirak.
30An eeke minggirak mbininogo yokkirage nogo ti, an obeelom eeke minggirak paga kit wogoppanubagip nduk, yokkirage lek o. Ata, an neebe abu ninggin yinuk-punuk irak logonet, eeke minggirak nogo mbininogo yokkiragi o. 31-33An o Ndametik wonage me, aap endagembogut Aretat awot nggubureno nogo nen an pi'nabuwak nduk, awori yigin unde yoragagerak wundi wage neyo, tu pak ambe paga enaarak wonogwe iigak, noreewi nen muun yum me yonggologo yagat obaga mbo wumbanogo mbareegwa, it inambeme nen aret mbaganeegirak. Ti eereegirak ti, abok aret nit mondok-mondok alut eeko monggoorak Yetut Keritut ogoba Ala nogo, eenu aret me, an pilit lek, abet aret yokkiragi o.
Currently Selected:
2 KORINDUT 11: WNO
Highlight
Copy
Compare
Share
Want to have your highlights saved across all your devices? Sign up or sign in
